ዎዚናፔ ጊዶንታ ማሮቴ
1 ዴሬዚ፥ «ሃ ዪቴ፥
ኣኔ ጎዳኮ ሲሞስ!
ኢዚ ኑና ሜንዳ ማላ
ኢዚካ ኑና ዛሪዲ ኮላና፤
ኢዚ ኑና ማዱንዳ ማላ
ዛሪዲካ ኢዚ ኑ ማዱን
ፓና።
2 ናምኡ ጋላሳታፔ ጉዬ
ኢዚ ኑና ቤጎና፤
ሄን ጋላስ
ኢዚ ኑና ዴንና፤
ኑኒካ ኢዛ ሲንን
ፓጻ ዳና።
3 ኣኔ ኑኒ ጎዳ ኤሮስ!
ኑ ኢዛ ሎኤ ኤራናስ
ኣኔ ሚኔቶስ!
ኢዚ ዎንታ ፖኦ ማላ
ኑስ ቆንጫና፤
ቢታ ካልሲዛ ኣሱራ ኢራ ማላኔ
ባልጎ ኢራ ማላ
ኢዚ ኑኮ ያና» ጌስ።
4 ጎዳይ፥ «ኤፍሬሜ ኣሳቶ!
ዩሁዳ ኣሳቶ!
ታ ኢንቴና ዎስቲኮ ሎኦ?
ኢንቴ ታና ሲቂዛ ሲቆይ
ማላዶ ሻራ ማላኔ
ማላዶ ጻዛ ማላ
ጮ ቲምኢ ጊ ኤሶን ዬስ።
5 ሄሳ ጊሻስ
ታኒ ታ ናቤታ ባጋራ
ኢንቴና ቃንጼሬዲስ፤
ታ ዶናፔ ኬኢዛ ቃላን
ታ ኢንቴና ዎዲስ።
ታ ፒርዳይካ ኢንቴ ቦላ
ዎልቃን ማላ ፖኢዴስ።
6 ታኒ ያርሾፌ ኣዳ ማሮቴ ዶሳይስ።
ጹጌቲዛ ያርሾፌ ኣዳ
ጾስ ኤሮ ዶሳይስ።6፡6 ማቶ 9፡13፤ 12፡7
7 ኢስቲ ቃሴ ካሴ ኣዳሜ
ጌቴቲዛሶን
ታናራ ጌሊዳ
ጫቆ ቃላ ላሊዳ፤
ሄንካ ኢስቲ ታናን
ኣማኔቲቤቴና።
8 ጋላኣዴይ ሱን ሞሬታዱስ፤
ኢታ ኣሳታ ዱሳሶ ጊዳዱስ።
9 ፓንጋቲ ኣሴ ዎናስ
ዛማዲዛ ማላ
ቄሴቲካ ዙፔቲዲ ሄሳ ኦቴስ።
ጌዴ ሴኬሜ ኤፊዛ ኦጌ ቦላካ
ናጊ ናጊ ኣስ ዎቴስ፤
ዬላቺዛ ኢታ ሚሽ
ኦቴስ።6፡9ሴኬሜይ ጾሳ ኬ ዲዛሶ።
10 ዲዢጊንዛ ኢታ ሚሽ
ኢስራኤሌን ቤያዲስ፤
ኤፍሬሜይ ኤቃስ ጎይኖኒኔ
ላይማቴን ቱኒዴስ።
11 «ኢንቴኖ ዩሁዳ ኣሳቶ!
ታ ኢንቴና ቃጻያና ጋላስ
ባራ ዎዲስ።