1 ኢስራኤሌ ኣሳይ ዳዪዳ
ዎይኔ ሚ ማላ።
ኢስቲ ዳሮ ኣይፌ ኣይፊዳ፤
ኣይፌዚ ዳሪዳ ኬና
ዳሮ ያርሾሶሆ ሜዳ።
ኢስታ ቢታያ ሎኦ ኣይፌ ኢማዳ
ኢስታ ዱሬሲዳ ማላ
ኢስቲ ጎይኒዛ ቱሳታ ኣሌቄሲዳ።
2 ኢስታ ዎዚናን ጌኔይ ኩሚዴስ፤
ኢስቲ ባ ኦዳ ጌኔዛ
ዋጋ ኤካና።
ጎዳይ ኢስቲ ያርሾ
ያርሺዛሶሆታ
ኡባ ላላና።
ኢስቲ ጎይኒዛ ኤቃ ጾሳ
ቱሳታካ ሾዳና።
3 ኢስቲካ፥ «ኑስ ካዎይ ዴና፤
ኑኒ ጎዳ ቦንቾንታ
ጊሻስ ካዎይ ዲዛኮካ
ኢዚ ኑስ ኣይ ኦኔ?» ጋና።
4 ኢስቲ ዎርዶራ ጫቂዲ
ቃላ ጌሌቴስ፤
ሃዳ ሂዶታ ኦቴስ፤
ሄሳ ጊሻስ ካ ጊዶን
ማርዜራ ዲዛ ሃሩማ ማታይ
ሞኪዛ ማላ
ኢስታ ጊዶን ጌኔ ፒርዳይ ዳራና።
5 ሳማሪያ ካታማን ዲዛ ዴሬይ
ቤቲ-ኣዌኔን ዲዛ
ማራ ሚስሌን ኦሴቲዳ
ኤቃ ጾሳስ ያዬስ።
ኢዛፔ ቦንቾይ ቃሬቲ
ኪቺዳ ጊሻስ
ኣሳይ ዬኬስ።
ሄ ኤቃ ሚስሌዛ ቄሴቲካ
ዋሴቴስ።
6 ሄ ኤቃ ሚስሌዚ ጊታ ጊዲዳ
ኣሶሬ ካዎስ ኪያቴ ኢሜታና።
ኤፍሬሜይ ካዉያና፤
ኢስራኤሌይካ ባንታ ኤቃ
ጾሳ ጊሻስ ዬላታና።
7 ሳማሪያ ካዎይ
ሃ ጎፖንቶ ማላ
ጮ ያና።
8 ኢስራኤሌስ ናጋራ ጊዲዳ
ቤት-ኣዌኔን ጎይኒዛሶሆ
ዙምቡላዚ ያና፤
ኦካይኔ ኦሃይ ሞካና፤
ሄ ዎዴ ዴሬይ ዙማታ፥
«ኑና ቆቲቴ!»
ዙምቡላታካ
«ኑና ካሚቴ!» ጋና።10፡8 ሉቃ 23፡30፤ ኣጁ 6፡16
ጎዳይ ኢስራኤሌ ኣሳ ቃጻያና
9 ጎዳይ፥ «ኢስራኤሌ ኣሳዉ!
ጊቢኣን ናጋራ ኦሶፔ
ሃች ጋካናስ
ጌባኦኔን ናጋራ ኦዛይታ
ኦላይ ዉርሲቤኔ?10፡9 ዳና 19፡1-30
10 ታኒ ኮይዛ ዎዴ ኢስታ ቃጻያና፤
ኢስቲ ኦዳ
ዳኮ ናጋራ ጊሻስ
ቂጻቴይ ኢስታ ቦላ ጋካና፤
ካዎቴቲ
ኢስታ ቦላ ዴንዳና።
11 ኢስራኤሌይ ካ ቡካናስ
ዶሲዛ ሜሄ ማላ፤
ጊዶ ኣቲን ሎኢዛ ኢዚ ሞርጌ ቦላ
ቃምባራ ዎና፤
ኤፍሬሜ ዋጻና፤
ዩሁዳይ ጎያና፤
ያቆቤ ናይቲ
ዋጼቲዲ ቢታ ፒጻና።
12 ጎዳይ ዪዲ ጺሎቴ
ኢንቴ ቦላ ኢራ ማላ
ቡኪሳና ጋካናስ
ሃና ኢንቴ ኢዛ ኮይዛ ዎዴ
ጊዲዳ ጊሻስ ኦ ጎዪቴ፤
ኢንቴስ ጺሎቴ ዜሪቴ፤
ሚኖ ሲቆ ኣይፌ ማጺቴ።10፡12 ኤር 4፡3
13 «ኢንቴ ጊዲኮ ኢንቴ ዎልቃኒኔ
ኢንቴ ኦላ ቃራታ ዳሮቴን
ኣማኔቲዲ ኢታቴ ዜሪዴታ፤
ናጋራ ሺሺዴታ፤
ዎርዶቴ ኣይፌ ሚዴታ።
14 ሺሊማኔይ ቤቲ-ኣርቤሌ
ጌቴቲዛ ካታማ ኦላን ካሴ
ላሊዳይሳኔ
ኣዬታ ናይታራ ጋ
ቢታ ቦላ
ዲንጬሬ ዉርሲዳ ማላ
ሺሮይ ዴራ ቦላ ያና።
ኢንቴ ዴሬ ኣሳ ቦላ ዎልቃማ
ኦላይ ያና፤
ኢንቴ ሚጻይ ላሌታና።
15 ቤቴሌ! ኔ ኢታቴ
ጊታ ጊዲዳ ጊሻስ
ኔ ቦላካ ሄሳ ሃናና፤
ሄ ጋላሳያ ጋኪዛ ዎዴ
ኢስራኤሌ ካዎይ
ሙሌራ ያና» ጌስ።