1 ጎዳይ፥ «ኢስራኤሌይ ቡሮ

ዪን ዲሺን ዶሳዲስ።

ሂስታዳ ታ ናዛ

ታ ጊብጼ ቢታፌ ጼይጋዲስ።✝

2 ጊዶ ኣቲን ታ ኢስታ ጼይጊዳ ኬና

ኢስቲ ታፔ ጌዴ

ሃኪ ሃኪ ቢዳ።

ባኣሌስ ያርሾ ሺሺዳ፤

ኢዛ ሚስሌታሲካ

ኤጻኔ ጩዋሲዳ።

3 ኤፍሬሜስ ኩሼዛ ኦይካዳ

ሄሜ ታማርሲዳይ ታና፤

ጊዶ ኣቲን ኢስታ ፓዳይ

ታና ጊዲዳይሳ

ኢስቲ ኤሪቤቴና።

4 ታ ኢስታ ቃታ ዎዶሮኒኔ

ሲቆ ሳንሳላታን

ታኮ ሺሻዲስ፤

ኢስታ ሞርጌፌ

ቃምባራ ዴንዲስ፤

ዚቂ ጋ ሆካዳ ኢስታ ሚዛዲስ።

5 «ሂስቲን ኢስቲ

ማሮቴን ጌሎንታ ጊሻስ

ዱጌ ጊብጼ ሲሜቴኔ?

ኣሶሬይ ኢስታ ሃሬኔ?

6 ኢስታ ኢታ ሃልቾ ጊሻስ

ሞርኬ ቶራይ ኢስታ

ካታማታ ኦላና፤

ኢስታ ካታማታ ፔንጌታካ

ሜንሬ ዬጋና።

ኢስቲካ ሙሌራ ያና።

7 ታ ዴሬይ

ታፔ ሃካናስ ኮዪዴስ፤

ጊዲኮካ ኢስቲ ታኮ ኡባፌ

ዎልቃማ ጾሳኮ ዋሲኮ

ታ ኢስታ ኣሺኬ።

8 «ኤፍሬሜ! ታ ኔና

ዎስታ ኣጋጋኔ?

ኢስራኤሌ ታ ኔና

ዎስታ ኣ ኢማኔ?

ታ ካሴ ኣዳማኒኔ

ጻቦይሜን ኦዳይሳ

ዎስታ ኔ ቦላ ኦ?

ታ ዎዚናይ ጊዶን ቃጺዴስ፤

ታ ማሮቴይ

ኔና ኣሻና ዴንዲዴስ።✝

9 ታኒ ኢንቴ ጊዶን ዲዛ ጌሻ

ጾሳ ኣቲን ኣስ ጊዲኬ።

ታ ሃንቆራ ኢንቴኮ ዪኬ፤

ታ ቦሻ ሃንቆ

ኢንቴ ቦላ ዬዲኬ፤

ኤፍሬሜ ዛራዳ ይሲኬ።

10 «ታኒ ጎዳይ ኢስታ ኣሻናስ

ጻጊዛ ጋሞ ማላ

ታኒ ታ ቃላ ሲሲሺን

ኢስቲ ታና ካላና፤

ታ ናይቲ ኮኮሪሼ

ኣርሼይ ሞኪዛ ባጋፌ ያና።

11 ጊብጼፔ ካፎ ማላ

ኣሶሬፔ ሃራጴ ማላ

ፒራ ያና።

ታኒ ኢስታ ኢስታሶሆን

ዎና» ጌስ።

12 ጎዳይ፥ «ኤፍሬሜ ዎርዶን

ኢስራኤሌይካ ጌኔን

ታና ጊዶዴስ፤

ዩሁዳይ ጾሳስ

ሃሬቶንታዴ፤

ኣማኔቲዳ ጌሻዛራ

ኤቄቲዛዴ» ጌስ።