ኤርማሳ ዚላስ 1

ዬሩሳላሜ ዋዬኔ ካዮ

1 ካሴ ኢዚን ዳሮ ካዎቴይ

ዲዛ ካታማያ

ዋናዳ ኦሌታ ኣታዴ!

ዴሬታ ጊዶን ካሴ ጊታ ጊዲዳራ

ዋናዳ ኣምኢ ማላ ጊዳዴ!

ኣዉራጃታ ጋርሳን

ጎዳቶ ጊዲዳራ

ሃኢ ዋናዳ ኣይሌ ጊዳዴ!

2 ኢዛ ጊዶ

ጫሞ ዬሆ ዬካዉስ፤

ኢዚስ ኣፉንይካ

ሻጋላራ ጎጌስ፤

ኢዚ ላጌታፔ ኢዞ

ሚንዛይ

ኦኒካ ዴና፤

ኡባቲካ ኢዞ ካዲዳ፤

ዛሪዲካ ኢዚስ ሞርኬ ጊዲዳ።

3 ዩሁዳይ ዳሮ ዋዬቲዳፔኔ

ቶሼቲዳፔ ጉዬ ዲኤታዱስ፤

ኢዛ ካዎቴታ

ጊዶን ኡታዱስ፤

ኢዚስ ሼምፒዛሶይካ ይዴስ፤

ኢዛ ሜቶ ጋርሳን ዲሺን

ጎዲዛይቲ ኡባይ ኢዞ ዴሚዳ።

4 ኦኒካ ኢዚ ባኣሌታ

ቦንቻናስ

ዮንታ ጊሻስ ጺዮኔ ኦጌቲ ዬኬቴስ፤

ኢዚ ፔንጌታራ ጌሊዛይኔ

ኬዚዛይ ዴና፤

ኢዚ ቄሴቲ ጬጬቴስ፤

ጌላኦቲካ ሙዞቴቴስ፤

ኢዛካ ጊታ ሜቶ

ጋርሳን ቱጋታዉስ።

5 ኢዚ ናጋራይ ዳሮ ጊዲዳ ጋሶን

ጎዳይ ኢዚ ቦላ ሜቶ ዬጊዴስ፤

ኢዚ ሞርኬቲ ኢዞ ሃሪዳ፤

ኢዚ ናይቲካ ሞርኬታን ዲኤቲዳ፤

ኢዚ ሞርኬታስ ዱሲ ሎኢዴስ።

6 ጺዮኔ ማጫ ናይፔ

ኢዚ ፑላቴኔ ቴማይ

ሻኬቲ ኪቺዴስ፤

ኢዚ ዳናቲ ማታ

ሚዛሶይ ይዳ

ጌኔሳ ማላ ጊዲዳ፤

ኢስቲ ባና ጎዲዛይታፔ

ዎልቃይ ዉሪን ባቃቲዳ።

7 ዬሩሳላሜይ ሜቶቲዳ ዎዴኒኔ

ዋዬቲዳ ጋላሳታን

ካሴ ኢዚስ ዲዛ ኣቆታ

ዩሻ ቆፓዉስ፤

ኢዛ ሞርኬ ኩሼን

ኩንዲዳ ዎዴ

ኢዞ ማዲዛይ

ኦኒካ ባይንዳ ዎዴ፥

ኢዚ ሞርኬቲ ኢዚ ኩንዴ

ቤኢዲ ኢዚ ቦላ ሚጪዳ።

8 ዬሩሳላሜይ ዳሮ ዴጾ

ናጋራ ኦዱስ፤

ካስካ ኣታዱስ፤

ኢዛ ካሎ ዲሺን ቤኢዳ ጊሻስ

ካሴ ኢዞ ቦንቺዳይቲ ኡባይ

ኢዞ ካዳ፤

ኢዛካ ባ ባጋራ ዬላታዳ

ቢታ ጼላሼ ጉዬ ሲማዱስ።

9 ኢዚ ቱናቴ

ኢዚ ማይኦ ቦላ ቤቲዴስ፤

ሲንፌ ኢዚ ቦላ ሃናናይሳ

ኢዛ ቆፓቤኩ፤

ኢዚ ኩንዴ

ዳጋንዛዝ ጊዲዴስ፤

ኢዛ፥ «ታ ጎዳ ጾሶ!

ታ ሜቶቲዛ ሜቶዛ ቤኣ፤

ታ ሞርኬቲ ታና ጾኒዳ»

ጋ ዎሲንካ

ኢዞ ሚንዛይ

ኦኒካ ቤቲቤና።

10 ኢዚ ኣቆታ ኡባ ቦላ

ሞርኬይ ባ ኩሼ ዬዲዴስ፤

ጾሳ ኣሳ ሺቆን

ጌሎንታ ማላ ኔኒ ዲጊዳይቲ

ኤቃ ጾሳታስ

ጎይኒዛ ኣይዛቤቲ

ጌዴ ኢዚ ጾሳ ኬን

ጌሊሺን ቤኣዱስ።

11 ኢዚ ኣሳይ ሚዛ ካ ዴማናስ

ኮሻን ዳቡሬስ፤

ሼምፖራ ፓጻ ዳናስ ባስ ዲዛ

ኣቆታ ማና ካራ ላሜቴስ፤

ዬሩሳላሜ ኣሳይ፥ «ኣቤት ጎዳዉ!

ኑኒ ካዉዪዶስ፤

ኑና ጼላዳ ኑስ ቆፓ።

12 «ጎዳ ጾሲ

ባ ዎልቃማ ሃንቆዛ

ኑ ቦላ ዬዲዳ ዎዴ

ኑ ቦላ ጋኪዳ ሜቶ ማላ

ሜቶይ ጋኪዳ ኣሲ ዲዛ ጊዲኮ

ኢንቴኖ ኦጌራ ኣ ቢዛ

ኡባቶ ኣኔ ቤኢቴ!

ሃ ሜቶይ ኢንቴስ

ካዉሻ ሚሳቲዜ?

13 «ኢዚ ቦላ ቃሶሆፔ

ታማ ዬዲዴስ፤

ሄ ታማዚካ ኑስ

ሜቄን ጌሊዴስ፤

ኑ ቶሆታ ቃቻናስ

ጊቴ ዬጊዴስ፤

ሂስቲዲ ኑና

ጉዬ ዛሪ ኩንዲሲዴስ፤

ኩሜ ጋላስ

ኑና ዳቡርሲዴስ፤

ጮ ሜላካ ቶይላሲዴስ።

14 «ታ ናጋራ ሺሺ ቃቺዲ

ታ ሞርጌን ዎዴስ፤

ታ ዎልቃካ ዉርሲዴስ፤

ታኒ ኤቄታናስ

ዳንዳዮንታ ሞርኬታስ

ጎዳይ ታና ኣ ኢሚዴስ።

15 «ኑ ጋርሳን ዲዛ ኦላንቻታ

ኡባታራ ጾሲ ኤቄቲዴስ፤

ኑ ጊዶፌ ዬላጋታ ይሳናስ

ኦላንቻታ ኑ ቦላ ዬዲዴስ።

ዎይኔ ሚ ኣይፌ

ኡሹ ኬሳናስ

ዬዛ ማላ

ጎዳይ ቦሼቶንታ

ጌላኦ ሚሳቲዛ

ዩሁዳ ኣሳ ዬዴስ።

16 «ሞርኬይ ኑ ቦላ ጎቢዴስ፤

ኑ ናይቲካ ባርካ ኣቲዳ፤

ኑና ዞሪ ሚንዛይቲ

ኑፔ ሃኪዳ፤

ሄሳ ጊሻስ ታ ዬካይሲኔ

ኣፉን ጉሳይስ።

17 ጺዮና ባ ኩሼ ሚጫዱስ፤

ኢዞ ሚንዛዴይ ዴና፤

ያቆቤ ዛሬታስ ሾሮቲ

ኢዛስ ሞርኬ ጊዳና ማላ

ጾሲ ኣዛዞ ኬሲዴስ፤

ዬሩሳላሜይካ ኢስታ ጊዶን

ቱና ሚሻ ማላ ቆዴታዱስ።

18 «ጾሲ ጺሎ፤

ታኒ ጊዲኮ

ኢዛ ኣዛዞ ቦላ ማካላዲስ፤

ኢንቴ ዉሪካ ሲዪቴ፤

ታ ሜቶዛካ ጼሊቴ፤

ማጫ ናይቲኔ

ናቴ ኣቱማ ናይቲ

ታፔ ዲኤቲ ቢዳ።

19 ታኒ ታ ዶሲዛይታ ጼይጋዲስ፤

ኢስቲ ጊዲኮ ታና ካዲዳ፤

ታ ቄሴቲኔ ጪማቲ

ባ ሼምፖ ኣሻናስ

ካ ኮዪሼ

ካታማይ ጊዶን ዉሪዳ።

20 «ኣቤት ጎዳዉ!

ታ ዋዬዛ ቤኣ!

ታ ጊዶ ኣሳቴይ ሜቶቲዴስ፤

ታ ኬሃ ማካላዲስ፤

ታ ዎዚናይካ ሜቂዴስ፤

ካሬን ጊዲን ሶን

ዴራ ሃይቆይ ዉርሴስ።

21 «ዴሬይ ታ ዚላሊዛይሳ ሲዪዴስ፤

ጊዶ ኣቲን ኦኒካ ታና

ሚንዛዴይ

ቤቲቤና፤

ታ ሞርኬቲ ኡባይካ

ታ ሜቶቶይሳ ሲዪዳ፤

ኔኒ ኦይሳካ ኤሪዲ

ኢስቲ ኡፋዬቲዳ፤

ኔ ኢስታ ቦላ ኤሃና ጋ

ቃቺዳ ጋላሳያ ዩ፤

ኢስቲካ ታ ማላ ዚላሌቶ።

22 «ኢስታ ኢታቴ

ኔ ሲንን ቤቶ፤

ታ ናጋራ ጋሶን

ኔ ታ ቦላ ኦይሳ

ኢስታ ቦላካ ኦ፤

ታ ጬጫዳ ዚላሊዛ

ዚላሳይ ዳሪዴስ፤

ታ ዎዚናይካ ዳቡርዴስ»

ጊሼ ዋሴቴስ።