ዬሩሳላሜ ቦላ ጋኪዳ ቂጻቴ
1 ዎርቃይ ዋኒ ታሲዴስ፤
ዋላካይ ባይንዳ ሙሩታ ዎርቃይ
ዋኒ ላሜቲዴ!
ጾሳ ኬ
ኬጼቲዳ ቦንቾ ሹቻቲ
ኦጌ ዶናን ላሌቲዳ።
2 ካሴ ቦንቼቲዳ
ዎርቃ ሚሳቲዛ
ጺዮኔ ናይቲ ሃኢ ዋኒዲ
ኩሼን ኡርቃፌ ቲሊዲ ሜዳ
ማና ሚሻ ማላ ጊዲዶ!
3 ዎራካናቲ ባ ማራታ ዲቻናስ
ባ ን ንቴስ፤
ታ ዴሬይ ጊዲኮ
ባዞን ዲዛ
ያንቻ ካፎታ ማላ
ሜንጼ ኢቲዴስ።
4 ዳሮ ሳሜቲዳ ጊሻስ
ጉ ናይታ ኢንጻርሲ
ፑዴ ጎንጊራራ ኦይኬቲዴስ፤
ናይቲ ካ ዎሲዳ ሺን
ኦኒካ ኢስታስ ኢሚቤና።
5 ካሴ ሎኦ ካ ሚዛይቲ
ሃኢ ሜቶቲዲ
ኦጌ ቦላ ቶይላቲዳ፤
ካሴ ሎኦ ማይኦ ማይኢዲ
ኢሻሎን ዲጪዳይቲ
ሃኢ ቢዲንን ኢቺዳ።
6 ታ ዴሬዛ ቦላ ጋኪዳ ቂጻቴይ
ኦና ኩሼይካ
ቦቾንታ ዲሺን
ኤሶን ኣ ዎዳ
ሶዶሜ ካታማ
ኣሳ ጋኪዳ ቂጻቴዛፔካ
ኬሂ ኢታ።4፡6 ሜ 19፡24
7 ኢስታ ካሌዛይቲ
ሻቻፌ ኣዳ ጌሻ፤
ማፌ ኣ ቦ፤
ኢስታ ቦላይ ዞኦ ኢንቁፌ
ኣዳ ኣሪሳ፤
ቃሴ ኢስታስ ሜይካ
ሲምፔሬ ጌቴቲዛ
ሹቻ ማላ።
8 ሃኢ ጊዲኮ ኢስታ ሜይ
ሻላፔካ ኣ ካሬቲዴስ፤
ኦኒካ ኢስታ ኦጌን ቤኢዲ ኤሬና፤
ኢስቲ ሜቄ ጻላ ኣቲዳ፤
ሜላ ሚ ማላ ጊዲዳ።
9 ኮሻን ሃይቂዳይታፔ
ማሻን ሃይቂዳይቲ ሎኦ፤
10 ታ ኣሳ ቦላ ጋኪዳ ሃንቆ ጋሶን
ናይታስ ሚሼቲዛ ኣዬቲ
ባ ዬሊዳ ናይታ
ባ ኩሼራ ዶይሲ ሚዳ።4፡10 ዛሬ 28፡57፤ ሂዚ 5፡10
11 ጾሲ ባ ዎልቃማ
ሃንቆዛ ቆንጪሲዴስ፤
ጺዮኖ ዲፒ ሂስቲ
ይሲዛ ታማ ኦይሴዴስ።
12 ቢታ ቦላ ዲዛ ካዎታፔ
ዎይኮ ኣላሜ ቦላ ዲዛ
ኣሳፔ ኦኒካ ኢስታ ሞርኬቲ
ዎይኮ ዎራጂዛይቲ
ዬሩሳላሜ ፔንጌታ
ሜን ጌላና ጊዲ
ኦኒካ ቆፒቤና።
13 ሃይሲ ሃኒዳይ ናቤቲኔ
ቄሴቲ ኦዳ
ናጋራ ጋሶና፤
ቃሴ ኢስቲ ጺሎታ ሱ
ጉሲዳ ጊሻሳ።
14 ቆቄ ኣሳ ማላ
ኢስቲ ኦጌ ቦላ ጋዲጋዳና፤
ኢስቲ ሱን ቱኒዳ ጊሻስ
ኢስታ ማይኦ ቦቻናስ
ጻሊዛዴይ ዴና።
15 ሄሳ ጊሻስ ኣሳይ ኢስታ ቦላ፥
«ኪቺቴ! ኢንቴ ቱና! ሃኪቴ!
ኑና ቦቾፍቴ!» ጊ ዋሳና።
ሄሳ ጋሶን ኢስቲ ባቃቲዲ
ካዎቴ ጊዶን ቶይላቲሼ
ኣሳይ ኢስታስ፥ «ኢንቴ ኑናራ
ሃይሳን ዳናስ
ዳንዳዬኬታ» ጊዳ።
16 ኢስታ ላሊዳይ ጾሳ፤
ሃይሳፌ ጉዬ ኢዚ ኢስታስ ቆፔና፤
ኢስታ ቄሴታስ ቦንቾይ ኢሜቴና፤
ጪማታስካ ፑላይ ዴና።
17 ኑ ኣይፌይ ማዶ ዴማናስ
ጼሊሼ ጮ ሜላ ዳቡርዴስ፤
ኑና ኣሻናስ
ዳንዳዮንታ ዴሬታፔ
ማዶ ዴማናስ
ላሞታን ናጊዶስ።
18 ኣሳይ ኑ ጌዶን ኤቂዛ ጊሻስ
ኑ ኦጌራ ሄሜታናስ
ዳንዳይቤኮ፤
ኑስ ዉርሴ ማቲዴስ፤
ኑ ላይ ዉሪዴስ፤
ኑ ይዛ ዎዴይ ጋኪዴስ።
19 ኑና ጎዲዛይቲ ሳሎራ ፓሊዛ
ጎሌፌ ኣ ኤሶቴቴስ፤
ኢስቲ ኑና ዙማ ቦላራ ጎዲዳ፤
ባዞን ኑና ዙጊ ናጊዳ።
20 ኑኒ ኢዛ ኩዋ ጋርሳን
ኡቲ ዴኣና ጊ ቆፒዳይሳ፥
ጾሲ ቲይዳይሳ፥
ኑስ ዴኦ ሼምፖካ ጊዲዳይሳ
ባንታ ዎጺማዴን ኦይኪዳ።
21 ኢንቴኖ ኡጼ ቢታን ዲዛ
ኤዶሜ ኣሳቶ!
ኡፋይስ ኖጮጩ ጊቴ!
ጊዶ ኣቲን ቃዳይ
ኢንቴናካ ጋካና፤
ኢንቴ ማታናኔ
ካሎ ኣታና።
22 ኢንቴኖ ጺዮኔ ኣሳቶ!
ኢንቴ ሞሮ ጋሶን ቃጻዬቶይሲ
ኢንቴስ ጊዳና፤
ሃይሳፌ ጉዬ ኢንቴና
ዲኤቲዳ ቢታን ጋምኢሴና፤
ጊዶ ኣቲን ኤዶሜ ኣሳቶ!
ኢዚ ኢንቴና ኢንቴ
ናጋራ ጊሻስ ቃጻያና፤
ኢዚ ኢንቴ ሞሮዛካ
ቆንጬ ኬሳና።