ማሬቴን ቤቲዛ ሂዶታ
1 ጎዳ ሃንቆ ጉፌን ዋዬ ቤኢዳ
ኣሲ ታና።
2 ኢዚ ታና ባ ሲንፌ
ኬሲ ዬዲዴስ፤
ፖኦይ ባይንዳ ጌዴ ማን
ታና ጌልዴስ።
3 ኢዚ ኩሜ ጋላስ
ዛሪ ዛሪዲ ታና ሾጪዴስ።
4 ኢዚ ታ ኣሳቴካ ጬጊሲዴስ፤
ታ ሜቄታካ
ሜንሬዴስ።
5 ኢዚ ታና ሜቶኒኔ
ኢታ ቱጋ ጊዶ ዬጊዴስ።
6 ሃይቂዲ ጋምኢዳ ኣሳ ማላ
ታኒ ማን
ዳና ማላ ኦዴስ።
7 ታ ኬዞንታ ማላ
ታ ዩሾዛ ዲርዴስ፤
ሚኖ ሳንሳላታን
ታና ቃቺዴስ።
8 ታኒ ማዶ ኮያዳ
ዋሳ ጼይጊንካ
ኢዚ ታ ዋሳ
ሲያናስ ኮዪቤና።
9 ታ ኦጌዛ ማሴቲዳ
ሹቻን ጎርዲዴስ፤
ታ ኣ ቢዛ
ኦጌዛካ ጌላሲዴስ።
10 ኢዚ ታስ ዛማዲ ኡቲዳ
ዛርዶ ማላ ጊዲዴስ፤
ቃሴካ ቆቴቲ ናጊዛ
ጋሞ ማላ ጊዲዴስ።
11 ታና ታ ቢዛ ኦጌፔ
ጎቺ ኬሲዲ
ዱሴሬ ዬጊዴስ፤
ታና ኣሲ ባይንዳሶን ኦላጊዴስ።
12 ኢዚ ባ ዎንዳፌ
ዳፊ ኦይኪዴስ፤
ታና ጫዳናስ
ባ ዪሽ ጊግሲ ዎዴስ።
13 ኢዚ ዪሻ ዬዲዲ
ታስ ዎዚና ኣይፌን ጫዲዴስ።
14 ታኒ ታ ዴሬ ኣሳስ
ቂ ሚሽ ጊዳዲስ፤
ጋላስ ኩሜ ታ ቦላ
ቂ ማዛሙሬ ዬጼቴስ።
15 ኢዚ ታ ዴኦዛ ጫሞን ኩንዴስ፤
ኢዚ ታና ጪዬ ኡሹ ካልሲዴስ።
16 ኢዚ ታ ኣች ሹቻን ሜንዴስ፤
ኢዚ ታና ጉዱላን ዬቲዴስ።
17 ታ ሼምፖይስ ሳሮቴ ይዴስ፤
ኡፋይሲ ኢዚ ኣዛኮኔ
ታ ባላዲስ።
18 ሄሳ ጊሻስ፥
«ታ ቦንቾይ
ታፔ ሻኬቲዴስ፤
ታኒ ጾሳፌ ናጊዛ ሂዶታ
ኡባይ ይዴስ» ጋዲስ።
19 ታ ዋዬኔ ታ ቶይላቴ
ታ ቆፒሺን ታ ዴኦይ
ታና ጫሚዴስ።
20 ኡባ ዎዴካ ታ ሃይሳ ቆፒሺን
ታ ዎዚናይ ጬጬስ።
21 ጊዲኮካ ታኒ
ሃይሳ ቆፒዛ ዎዴ
ታስ ሲንፌ ሂዶታይ ዴስ።
22 ሄሲካ ኑኒ ዮንታ ኣጊዳይ
ጎዳ ሲቆይ
ዳሮ ጊዲዳ ጋሶና፤
ኢዛ ቃታይካ ሜርናስ
ዉሮንታ ጊሻሳ።
23 ኢስቲ ማላዶ ማላዶ ኦራ፤
ኔ ኣማኔቴይካ ዳሮ።
24 ታስ ቃዳይ ጎዳ፤
ሄሳ ጊሻስ ታ ኢዛን ጻላ
ሂዶታ ኦይስ።
25 ጎዳይ ባና ሂዶታ
ኦዛይታሲኔ
ኢዛ ኮይዛይታስ ሎኦ።
26 ጎዳይ ኣስ ኣሺዛ ኣሾዛ
ኢዛዴይ ጮኡ ጊ ናጊኮ ሎኦ።
27 ኣሲ ዬላጋቴ ዎዴን
ቃምባራ ቶኪኮ ሎኦ።
28 ጎዳይ ኢዛ ቶሲዳ ጊሻስ
ኢዚ ባርካ ጮኡ ጊ ኡቶ።
29 ሲንፌ ኢዛስ ሂዶታይ ዳና
ዳንዳይዛ ጊሻስ
ባና ዚቂ ሂስቲ ሃሪሶ።
30 ባቃና ኮዪዳዴስ
ኢዚ ባ ሻጋላ ቤሶ፤
ካዉሻቴካ ኤኮ።
31 ጎዳይ ኣሴ ሜርናስካ
ዬጊ ኣጌና።
32 ኢዚ ኣሳ ቦላ ሜቶ ኤሂኮካ
ባ ሜርና ሲቆን
ሲሚ ቃቴስ፤
33 ኢዚ ኦዲዲ ኣሳ ቦላ ሜቶ
ዎይኮ ዋዬ ኤሂ ኤሬና።
34 ዴራን ዲዛ ቃሾ ኣሳይ
ኡባይ ጌኔን ዬቲሺን፥
35 ኡባፌ ቃ ጾሳይ ቤዪሺን
ኣሳስ ኣሳቴ
ማታይ ዲጌቲዛ ዎዴ፥
36 ቃሴካ ቱማ ፒርዳይ
ጌላቲዛ ዎዴ
ጎዳይ ሄሳ ማላ
ሃኖታ ዴሜኔ?
37 ጾሲ ኣዛዞንታ ዲሺን
ባ ጊዳዝ ፖላናስ
ዳንዳይዛይ ኦኔ?
38 ኢታ ጊዲን ዎይኮ ሎኦ ጊዲን
ባ ጊዳዝ ፖሊዛይ
ኡባፌ ቃ ጾሳ ጊዴኔ?
39 ሂስቲን ሼምፖራ
ፓጻ ዲዛ ኣሲ ባ ናጋራን
ቃጻዬቲሼ ኣዛስ ዙዙሚዜ?
40 ሄሳ ኣጊዲ ኑኒ
ኑ ኦጌ ኣኔ ፒልጊ ጼሎስ፤
ጎዳኮካ ሲሞስ።
41 ኣኔ ኑኒ ኑ ዎዚናኔ
ኑ ኩሼ ሳሎን ዲዛ
ጾሳኮ ፑዴ ዴንዲ፥
42 «ኑ ጎዳዉ! ኑኒ ማካሊዶስ፤
ናጋራካ ኦዶስ፤
ሄሳ ጊሻስ ኔኒ
ኑና ማራቤካ።
43 ኔኒ ሃንቆን ኩማዳ
ኑና ጎዳዳሳ፤
ኔ ኑና
ቃታይ ባይንዳ ዎዳሳ።
44 ዎሳይ ኔኮ ኣ
ቦንታ ማላ
ኔና ሻራን ካማዳሳ።
45 ኔ ኑና ኣይዛቤታ ጊዶን
ኦርጮኔ ቡራ ኬሳዳሳ።
46 ኑ ሞርኬቲ ኡባይ
ባ ዶና ኑ ቦላ ዶይዳ።
47 ኑኒ ባሻኒኔ
ላሌቴን ሜቶኒኔ
ሺሮን ኩምዶስ» ጎስ።
48 ታ ዴሬይ ዉሪዳ ጊሻስ
ታ ኣይፌፔ ኣፉን
ዲኦ ማላ ጎጊዴስ።
49 ሼምፖንታ ኡባ ዎዴ
ታ ኣይፌፔ ኣፉን ጉኬስ።
50 ሄሲ ሃናናይ ጾሲ ሳሎፔ
ዱጌ ጼላና ጋካናሳ።
51 ታኒ ዲዛ ካታማን ዲዛ
ኡባ ማጫሳታ ቦላ
ጋኪዳ ሜቶዛ
ታኒ ታ ኣይፌን ቤኢዳ ጊሻስ
ታ ዎዚናይ ጬጪዴስ።
52 ጋሶይካ ባይንዳ
ታስ ሞርኬ ጊዲዳይቲ
ካፎ ማላ ታና ሻንካቲዳ።
53 ኢስቲ ታኒ ሼምፖራ
ፓጻ ዲሺን ዱጌ ኦላን ዬጊዳ፤
ሹቺካ ታ ቦላ ኦሊዳ።
54 ሃ ኩሚዲ
ታስ ሁኤ ቦላራ ጎጊዴስ፤
ታኒ ያዲስ ጋዳ ቆፓዲስ።
55 ታ ጎዳዉ!
ታኒ ጪማ ኦላ ጊዶን ዳሼ
ኔ ሱን ጼይጋዲስ።
56 ታ ዋሶ ኔ ሲያና ማላ
ታ ኔና ዎሲን ሲያዳሳ።
57 ታ ኔና ጼይጊዳ ዎዴ
ኔ ታኮ ሺቃዳ፥
«ያዮፋ» ጋዳሳ።
58 ጎዶ! ኔ ታስ ሞቴታዳ
ታና ኣሻዳሳ።
59 ጎዳዉ! ኔ ታ ቦላ
ጋኪዳ ቆሆዛ ቤያዳሳ፤
ኔ ታስ ፒርዳ።
60 ታ ሞርኬቲ ታ ቦላ
ሃሎ ኬሳናስ ቆፒዳይሳኔ
ኢስቲ ታ ቦላ
ዙፔቲዳይሳ ኔ ቤያዳሳ።
61 ታ ጎዳዉ!
ኢስቲ ታና ጫዪዳ ጫሻኔ
ታ ቦላ ማቄቲዳ ማቆዛ
ኔ ሲያዳሳ።
62 ጋላስ ኩሜ ታ ሞርኬቲ
ታ ቦላ ሳሱኬቴቴሲኔ
ዙዙሜቴስ።
63 ኔ ኢስታ ጼላ!
ኢስቲ ኤቂዲ ጊዲን ኡቲዲ
ባ ዬን ታና ጫዴቴስ።
64 ታ ጎዳዉ! ኔ ኢስታስ
ኢስታ ኦሶ ማላ ኢማ።
65 ኢስታ ዎዚና ዳሚሳ፤
ኔ ቃንጌ ኢስታ ጋኮ።
66 ኣቤት ጎዳዉ!
ኔ ኢስታ ኔ ሃንቆን ጎዳ፤
ሳሎ ጋርሳፌ ይሳ።