Atos 16

10 So o Paulus o gogelelo magena wamakeka, de gila-gila ngomi mimasidailako la mitagi o Makedoniaka. Sababu miamalo igogou o Gikimoi womisulo so bilasu mitagi o habari ḋaloloha misihabari o bi nyawa o daera magegenaka.

O Filipika de ongo Lidia mopiricayaka

11 So kagena o Troaska de mimajobo o deruku mipane so miside miakahika kadoke o Samotrake ma guraka, de ma langino miakahika kali o Neapolis ma bobaneka, 12 so de o Neapoliska miutika, de mimajobo kali mitatagi kagena mimasidiado o Filipi ma kotaka. O kota magena o kota ilalamo o daera moi o Makedonia ma kuasa ma rabaka, de lo ma nyawa o kota magenaka manga sihino o Romano.*16:12 Kanaga o Makedonia ma tona ma rabaka o daera ngai iha so ma kota ilalago ngai iha. O kota ilalago ma rabaka ma nyawa manga sihino o Romano, o nyawa kagena ipopareta de manga kuasa masirete so o balastengi upa he ifangu o Romaka, sababu ona imatero maro o Roma ma kawasa moi. De o wange muruo naga ngomi kagena migoge. 13 So o Sabat ma wangeka ngomi o kotaka de misupu mitagi o selera ma dateka, kiaka mitemo nagala o Yahudika isosumbayang ma riho kagena naga. Kagena de ngomi migogeku de o bi ngopeḋeka imatolomu o riho magegenaka so mimatekebobicara. 14 Kanaga manga sidongirabaka moi momisigigise, muna magena o Yahudika misowo o Tiatira ma nyawa moi ami ronga ongo Lidia, o baro ḋauungu de ma ija ihali gena momasiiija, de lo modupa mosusuba o Gikimoika. Ma orasi magena o Jou ami sininga wapelenga sidago o Paulus awi demo moi-moi muna masahe de modupa mosigise. 15 So ongo Lidia de ami tahu ma raba moi ona lo yaosi ḋaboloka, de muna asa momikoro de momiaso motemo, <<O dodiao, ngini ninako igogou ngohi o Jou Yesus towipiricayaka, nako ḋaloha de tanu niahino la ai tahuka nimasidodogu.>> So komagena muna momigegego sidago ngomi to muna ami tahuka mimasidodogu.

O Paulus de o Silas yabui o Filipi ma kotaka

16 O wange ma moiku ngomi o Yahudika isosumbayang ma riho magenaka mitagili de o jojaru moi, o nyawa miijaka so muna magena mogogilalo moi, mimakamake de ngomi. Muna magena o toka mipopareta so aku o nyawaka mosingangasu o kia asa idadi o orasi ma simaka. De ami manara magena o nyawa imiiijaka gena asa ifangu ilamo. 17 Muna de ngomi mimakamakeka, de ka momimote-mote de momatoore o bi nyawaka, <<He! O nyawa ona manena o Gikimoi Wikukuruye Awi leleani! Ona yahino inisihabari o ngeko idodooha la ngini aku o salamati niamake!>>