1 Ma orasi o Pentakosta ma Wange ilalamo imasidiadoka, de o bi nyawa ipipiricaya ona magena yangodu imatolomu o tahu moika. 2 Imatodoka o kuguru ḋaiili-ili moi maro o rato ḋapoputuru iuti o sorogaku ikahuku. De o bi nyawa o tahu ma rabaka, kiaka ona imatatamiye, kagena lo yoise o kuguru ma ili magena. 3 Ḋabolo de yakelelo o kia naga koloko o uku ma sora ilaḋe-laḋe de ihaja so itangi de igoge moi-moi ona magenaku. 4 De o Gurumi Ḋatetebi Awi kuasa wowosa ona yangoduku, de manga sininga ma rabaka wopareta so de o kuasa magena ona isolano isibicara de o bi bahasa ma somoa.

5 Ma dongoho magena o Yahudika ma nyawa o Gikimoika wisusuba, ona magena o bi doku o dunia ma ngoguno kagena o Yerusalemka imasidodogu.*2:5 O Yahudika ma nyawa o dunia ma ngoguno gena, ngaroko o Gikimoi iwisuba, duma o Yesus iwinako waasi so Una iwipiricayawa.