1 Midirika de o Paskah ma Wange ma Rarame imasidiado komagena lo o Roti ma Ragi Ihihiwa ma Rarame gena isitodaaka. O imamka ma bi sahe de o bi guru agama manga edekati ma ngeko gena isipongoka, ma ngale o Yesus witago de witooma. 2 Duma ona magena itemo, <<Upa lo paaka ma orasi o rarame ma rabaka, sababu done o gangamo posigoko.>>

3 Ma moiku o Yesus wooḋo o Betania ma dokuka, kagena o Simon awi tahuka, una magena iḋoḋoma wipapado. Kagena asa o ngopeḋeka moi mahino o Yesusno, de o gososo ḋabobou de ihahali o rube moi o teto ihahalino maaho, o gososo magena yaaka o bi ngutu ḋabobouno. Gila-gila o rube ma tolo magena mapolote so o gososo ḋabobou gena moguse Awi saheku de mowisiḋahu. 4,5 Magegena de o nyawa yamuruo naga kagenadahu asa yatoosa so itemo moi de moika, <<Ce! O gososo ḋabobou magena ḋapoosa!>> O nyawa ona magena mingamo, <<Kiaso nofuma komagena!>> De itemo kali moi de moika, <<Ce! Ḋadoohaso muna mapoosa. We, ma ngale ka maumo! Nakoso o gososo ḋabobou magena posiija, de ma ija pahali-haliku la ma pipi de asa o nyawa isususaka pahike.>>

6 Duma Una wotemo, <<He! Nimiḋohaka. Muna maakaka o manara ḋaloloha-loha moi Ngohika. Duma ngini ka nimisisusa. Boloka! 7 O bi nyawa isususa, o wange isigeto-geto nako niadupa de ngini aku niariwo isususa ona magena, sababu ona salalu kanaga igoge to ngini nia sidongirabaka. Duma Ngohi de ngini asa pomakangaho iteka kawa. 8 O manara ilalamo moi o ngopeḋeka muna magena aku maaka, o gososo ḋabobou magena mosiḋahu Ai saheku, so muna asa Ai rohe mosidailako ḋabolo ma ngale Ngohi done bilasu tosone de ipoosu. 9 Ngini tinisingangasu igogou, o ngopeḋeka ami manara manena lo done asa ka yapetoka maro o sosininga moi munaka, kekiaka bato o Gikimoi Awi habari ḋaloloha asa isihabari o dunia manena ma rabaka.>>

10 La o Yudas Iskariot o muri moi, o Yesus Awi muri yamogiowo de sinoto manga dongirabano, awi edekati ḋatorou. So wotagi o imam ma bi saheka la wasibicara ma ngale o Yesus iwisiija. 11 So ona magena manga sininga imore de ḋanali de witolabutu, de wisijaji asa o pipi wihike unaka. So de kagena de una wosolano o ngeko wosisari la o Yesus wisiija.

12 O wange ma nonomaka o Roti ma Ragi Ihihiwa ma Rarameka, orasi magena o Paskah ma duba-duba ma goho yatola. O Yesus Awi muri-muri yosano Unaka, <<Baba, kiaka mitagi la ngomi misidailako to ngone nanga Paskah ma ino.>>

13 So Una wosulo o muri yasinotoka, <<Nitagi kadoka o dokuka done o nyawa moi niwimake o rube de ma akeka waaho. Una magena niwimote, 14 o tahu kiaka wowosa de nitemo o tahu ma duhutu magenaka, <Baba Guru wosano, o ngihi kiaka Una de Awi muri-muri asa ioḋo o Paskah ma ino.> 15 So o nyawa una magena asa wasidumu kadaku ma ḋokuka o ngihi moi ilalamo. Nako ma ngihi magena isidiahi de isidailako ḋaboloka, ma meja de ma bako lo isifatoka. Kagena o ino nisidailako ma ngale ngone inangodu.>>

16 Kagena de Awi muri yasinoto yotagi o dokuka, de kadoka ona yamake maro o kia Una wotetemo. So ona asa isidailako o Paskah ma ino magena.

17 La ḋaputuku Una de Awi muri yamogiowo de sinoto yahino. 18 So kagena ona imatamiye ioḋo, de Una wotemo onaka, <<Ngini tinisingangasu igogou, o orasi manena o nyawa moi to ngini nia sidongirabano, Ai dateka de wooḋo dede Ngohi, done asa Ngohi woisiija.>>

19 O demo magena yoise, so Awi muri-muri manga sininga isusa so ona moi-moi imasano Unaka, <<Baba, ngaroko lo ngohiwa o kia notetemo gena!>>

20 So kagena de Una wosango, <<Una magenena nimogiowo de sinoto nia sidongirabano, naguuna awi roti o lelengaku asa wotono dede Ngohi, una magenena asa Ngohi woisiija. 21 Igogou, Ngohi o Nyawa ma Duhutu manena asa tosone maro o kia isilelefo o Gikimoi Awi Jaji ma Buku ma rabaka. Duma naguuna woisiiija Ngohi o Nyawa ma Duhutu manena, kodo, o nyawa una magena awi bodito ḋatubuso! Lebelaha o nyawa una magena upa lo wisibuo.>>

22 De ma orasi ona imatamiye yooḋo, o Yesus o roti waḋehe so Awi sukuru watide o Gikimoiye. Ḋabolo de o roti magena watepi-tepi de to Una Awi gia, de gila-gila Awi muri-murika wasitoku de wotemo, <<Niaḋehe. Manena to Ngohi Ai rohe.>>

23 Kagena de Una o anggur ma udo-udo waḋehe de Awi sukuru idola o Gikimoiye. De o udo-udo magena wahike Awi muri-murika, de ona magena moi-moi o anggur magena yaudo. 24 Yaudo ḋabolo de Una wotemo, <<Manena to Ngohi Ai au, inisinako igogou o Gikimoi Awi jaji la Ai au ikokopola manena ma meta o nyawa yadadalaka ma ngale o dorou ma apongu. 25 Duma o orasi manena ngini tinisingangasu igogou, Ngohi done o anggur manena taudo kawa, sidago ma orasi imasidiadoka o Gikimoi wodadi o kolano o dunia ḋamomuane ma rabaka, de asa Ngohi o anggur ḋamomuane taudo kali.>>

26 Ḋabolo de ona yangodu yonyanyi wigiliri o Gikimoika. So ḋabolo de ona isupu de itagi o Zaitun ma Talaka.

27 Kagena yahika de o Yesus wotemo Awi muri-murika, <<Ngini ningodu manena done niloḋa so Ngohi nidongosaka, sababu kanaga o Gikimoi Awi Jaji ma Buku ma rabaka asa isilefoka wotemo,

<Ngohi asa ma sowohi towitooma

so ma duba iloḋa imakokitingaka.> 28 Duma ma orasi Ngohi manena tooho kali isosone manga sidongirabano, de Ngohi asa totagi toḋoma o Galilea ma tonaka.>>

29 De o Petrus wotemo, <<Hiwa, Baba! Ngaroko ai dodiao ona Ngona nidoloḋaka, duma ma bati tosone ngohi tonidongosawa, Baba.>>

30 So kagena de o Yesus wotemo o Petruska, <<Ngona tonisingangasu igogou, o putu manena o toko isore ma sinoto waasi gena, ngona he ma para ma saange nomanosu notemo Ngohi noinakowa.>>

31 O Petrus wosango de wotemo, <<Hiwa, Baba! Ngaroko ngohi tosone dede Ngona, duma igogou ngohi tomanosuwa.>> De Awi muri-muri ma binuka lo manga demo komagena.

32 Ona imasidiado o doro moika ma ronga Getsemani, de o Yesus wotemo Awi muri-murika, <<Kanena nigogeku la totagi tosumbayang.>>

33 De Una wasigaro ona yaruwange o Petrus, o Yakobus, de o Yohanes so ona itagi dede Una. O orasi magena de wamalo Awi raba itonga. 34 Kagena de Una wotemo onaka, <<Ai sininga ma sangisara ḋatubuso, tamalo gena maro he tosone. Ngini kanena nigogoge la nimajaga.>>

35 La Una womatinga sutu ikuruka, de o tonaku wobukuku de wosumbayang. Awi gogolo ma rabaka tanu witide la iwisitilaku o sone ma ngeko manena. 36 De wotemo, <<Ya Baba, ḋangodu aku naaka de idadi, so tanu natide la noisitilaku o sangisara ma ngeko manena. Duma upa namote to Ngohi Ai sininga ma dupa manena, la tanu idadi de imaaka ka to Ngona Ani sininga ma dupa.>>

37 Ḋabolo de Una wokahino de wamake ona yaruwange yakioloka. De Una wotemo, <<Petrus, o kiaso nikioloka, orasi moi bato de nomajaga naakuwa.>> 38 De Una wotemo onaka, <<Nimajaga de nisumbayang la upa o babajaku nitura. Ngaroko nia siningaka igogou imode, duma nia rohe ḋamomoḋoka.>>

39 Ma moili Una wotagi wosumbayang de Awi demo ka imatero de ma nonoma. 40 Ḋabolo de Una wokahino Awi muri-murino, de wamake ona yakiolo kali, sababu ona ikakadu poli. So ona isimakewa itemo o kia Unaka.

41 So kagena de Una wakahino kali ma para ma saangeka, de wotemo onaka, <<He! So ngini nimasiwomasi de nikiolosi? Boloka! Ma orasi imasidiadoka, Ngohi o Nyawa ma Duhutu manena isidoa o nyawa ma dorou manga gia ma sohaka. 42 Nimomi! Niakelelo, o nyawa Ngohi woisiiija una womasidiadoka. Hino la potagi pomakamake!>>

43 Ma orasi o Yesus wobobicarasi, de o Yudas, o Yesus Awi muri moi yamogiowo de sinoto manga dongirabano, womasidiado. Una magena wahino de o nyawa yadadala manga giaka o sumarangi de o gogipongo ilalamo. Ona magena o imamka ma bi sahe, de o bi guru agama, de lo o Yahudika ma roriri gena to ona manga nyawa yasusulo. 44 Ma nonomasi una gena o nonako moi wahikeka, wotemo komanena, <<O nyawa naguuna ngohi towihahame gena, Una magena ḋabolo. Una niwitago de niwingaho, de lo niwijaga nisidodiahi.>>

45 Ma orasi o Yudas womasidiado, gila-gila o Yesuska wotagi de wotemo, <<Baba Guru!>> De gila-gila wikololo de wihame. 46 So kagena de o nyawa yadadala, de o Yudas imakokangaho magena, o Yesus iwitago de wipiliku. 47 Duma o nyawa moi kagena manga sidongirabano awi sumarangi walia de wisioto ma Imam Wilalamo awi gilalo moika, so awi ngau lo waturaka. 48 De o Yesus wotemo onaka, <<Ḋadoohaso ngini niaka maro Ngohi o nyawa ma dorou, sidago niahino o gogipongo de o sumarangi nigaho la Ngohi nitago. 49 O wange isigeto-geto Ngohi todoto o Gikimoi Awi Tahuka de to ngini nia simaka, de ḋadoohaso Ngohi nitagowa. Duma igogou bilasu komagena, sidago idadi de imaaka maro o kia isilelefo o Gikimoi Awi Jaji ma Buku ma rabaka.>>

50 Kagena de Awi muri-muri yamodo so yoloḋa de Una widongosaka. 51 Cawali kanaga o gohiduuru moi o Yesus wimomote de o baro womasikolorono. So una lo o nyawa yadadala yodupa witago, 52 duma to una awi baro waumo de woloḋa awi rohe ka imawatoka.

53 O Yesus iwingaho ma Imam Wilalamo awi tahuka. Kagena de o imamka ma bi sahe, de o Yahudika manga roriri, de lo o bi guru agama yangodu imatolomu. 54 O Petrus manga duduno wototuuru o Yesus iwimote sidago wowosa ma Imam Wilalamo awi tahu ma lolohaka. Kadoke una wogogeku, de wialo so womarahu womasicapuka de o bi jojaga.

55 Kagena ma Imam Wilalamo awi tahuka, o imamka ma bi sahe de o Mahkamah Agama yangodu o Yesus iwitailako de isisari ma ngeko la wisisala, sidago Una bilasu wisosone. Duma o sala moi lo yamakewa. 56 O saksi yadala yahino yodedemo to ona manga gulai de manga damato, so moi-moi manga bicara imaketerowa.

57 De o saksi yamuruo naga imaoko de isibicara to ona manga damato ma ngale Unaka, 58 komanena yotemo, <<Ngomi miiseka o nyawa Una magena wotemo, <Ngohi done o Gikimoi Awi Tahu manena de o nyawa manga gia isiaaka asa taruba de tabiau, de o wange saangeka Ngohi asa tosigoko kali ḋamomuane, duma o nyawa manga gia isiaakawa.> >> 59 Duma o nyawa isasaksi magena manga demo moi-moi imaketerowa.

60 So ma Imam Wilalamo manga simaka womaokoye de Unaka wisano, <<To ona manga demo de manga sosano ma dala komagena Ngonaka, ḋadoohaso nasangowa.>>

61 Duma Una womarihika bato, ḋangodu wabisangowa. La ma Imam Wilalamo wisano kali Unaka, <<Igogou, Ngona o Salamati ma Kolano de o Gikimoi Wilalamo ma Ngopa?>>

62 Kagena de Una wosango wotemo, <<Igogou, Ngohi manena Una. De ngini asa nikelelo Ngohi o Nyawa ma Duhutu tomatamiye o Gikimoi Wokokuasa Awi girinaka, de lo asa nikelelo o sorogaka de tokahino touti o lobi-lobi ma rabaku.>>

63,64 So magena yoise, de ma Imam Wilalamo awi juba waraca de wotemo, <<Ce! Ngini ningodu niise masirete, Awi demo-demo ḋangodu o Gikimoi wisikudahu! Upa he o saksi posari kali. Orasi manena o kia niodupa la ngone paaka Unaka.>>

De yangodu itemo, <<O Yesus de wisala!>> De imatoore, <<Bilasu Una wisosone!>>

65 Gila-gila ona yamuruo naga Una wihobi, de Awi lako yapoku de wingapo, de yotemo, <<Hika nomisingangasu naguuna woningapo!>> De o bi jojaga imasimote Una wipopoka.

66 Ma orasi magena de o Petrus ka o loloha kasi, de o ngopeḋeka moi moleleleani ma Imam Wilalamoka mahino kagena. 67 De mowikelelo o Petrus o uku ma dateka womarahu. Muna mowikelelo de mowisibilatu awi jamani, de motemo, <<He! Ngona manena lo igogou o Yesus, o Nazaret ma nyawa gena, nowimomote.>>

68 Duma una womanosu de wotemo moleleleanika, <<Ngohi tanakowa de tasahewa o kia ngona notetemo gena!>> Gila-gila una wotagi o loloha ma ngora ma dateka.

69 Kagena de muna una mowikelelo de mosingangasu o bi nyawa kagenadahu motemoli, <<Cedeke! O nyawa una magena lo to ona manga sidongirabano.>> 70 Duma una womanosu kali.

Itekawa, de o orasi magena o bi nyawa kagena itemo o unaka, <<We! Ngona upa nomanosu! Igogou, ngona manena to ona manga dodiao moi, sababu ngona o Galilea ma nyawa.>>

71 Kagena de una gila-gila wosasi wotemo, <<Ngaroko tosone, duma igogou ngohi towinakowa o nyawa Una magena maro o kia ngini nitetemo gena!>>

72 O orasi magena ḋabolo o toko isore kali ma para ma sinotoka. De o Petrus gena womasininga igogou ma nonomasi o Yesus asa wisitemo unaka, <<O toko isore ma sinoto waasi, de ngona he nomanosu nosipara ma saange.>> La una woari wosodu-sodu.