1 Yaane kinni dhariyye wabeeko ardi giddo hexxeemmashshnni iittanni ha'no giddonna dhariyye barachchiisaluwwi ke'aan Insa'nenna insa'nee wodeeka Gootta waakanteexxi ba'ne iyyedagaaka dhariinka barachchisaluwwa luuxe iyyaashsha assinaan. Tennenninna insa'ne umo ifike'ni keekantebaaxxa ba'ne iidaqqinaan. 2 Heddi manni insa'neexa diqachchiissaaxxa huje hordofaan; insa'nexxe buuto'a dhugaatik ori yowwemaan. 3 Kunni dharichchi barachchiissaluwwi haafemma'ni ifi'aa dadeemmaxxe jirtenni ha'no booji'aan; murte insa'nexxinna olmii'ninni qixxesendeexxen; ba'netinna insa'nee dhugaandinni heqqitaan.

4 Mageni cubbo hujjeemmaxxa erganna mararebaang gehaanemeti giddo huneexxi dukkanatixxe bale giddo murtetee uggeechchinni, 5 qullummatike lallaballo kade'eemmak Nohi'i wele torbaane manninni welti anjireexxi edixxa butta duuchcha mararebaang cubbaaleeyyete'n balleessamma wode'e iyyedageechchinni, 6 iittanni cubbo hujaake duuchchi'a fakkeenna kadaashsha Soodomikanna Gomoraka qachchuwwa bululoke kaddaa qico'ni gubeexxi mureechchinni, 7 qullichchake kadeemmakanna xaqartiyyetixxe battitte hujenni wixixxi hiyya'n hedhemmaka Looxii'i anjireechchinni, 8 iikki qullichchi manjichchi insa'ne giddo hedheemma wodda uudaammaxxeenna laqaammaxxe yaane'n lubbo isixxi barra barra'ni xaqartiiyeetixxe hujenni wixixxi hiteexxenna kaddoole, 9 Gootta dhugaati isoo magenoonfata'n hedhaakaara hega uushshotenaa'n hittaa insa'ne anjira'eexxanna xaqartiyyete'n mura'ni eettene murtetixxe barra'a hitta asse heqqee insa'ne geesisaaxxa ege'ne'een. 10 Giddii'ninni eettene battitte gaabbenni ifixxa maaliinxa halcha hordofakaaranna ookkone baallooma tuffataakaara murtetee heqqeexxi insa'ne geessisaan.

Kunni dharrichchi barachchiisaluwwa iittanna mitte riffi afeekerranna ifi dukaake kadeemmaxxe'e iimatixxa daduwwa yowwinaa woddanna sodantabaan. 11 Yaane kinni erganna insa'ne irra jabaxxenna hunnaammeeyye kaddeenni hexxeexxi Gootti edo insa'ne'ni yowwichchiinka haaso'a fulchexxabaan. 12 Kunni dharichchi barachchiisaluwwi kinni mitteechchonna ege'nebaaxxe yaane'ni e'ya'ni yowwaan; insa'nenna abidenshateenna shiyematee ilemeeshsha yaada ifike callinni akeekemaammakenna qalbeefachcho afebaake biniichchishshaten. Insa'nenna ba'aake biniichchishshaten. 13 Ifixxe xaqaro'a hasisaaka xaqarotika hira adhinaan; manguba arishsho'ni fenxe hinaa wodda gammashotishsha laakko'winaan; ita ha'watixxe jila'ni he'neexxi ci'memmeekenna battone'eke kandeexxi ha'nonni welti jaalalatixxe jila'ni offolaan. 14 Ille insa'neexxe'n yabaabulle wo'miteemmaxxee cubbo hujatenaa'n gantabaan; amanate'ni ti'ni hiyebaaka mannanna dedhinsaan; insa'nenna haafendaaxxe qalbe anfe'een, insa'nenna badinemeeken. 15 Qajeela ora waaleexxi xaqarotika runda eeyyemmake ookkone Bi'oorika belto Bele'aamika ora hordonfeexxi dedhake'ni inbe'een. 16 Isi kinni qaxxamura ifixxee xixxemeeni; haaso'a dande'abaak harichchi manjiinke laagadinni haaso'e ookkone wabeekixxa maraattumma uurrisse.

17 Kunni dharichchi barachchiisaluwwi eettenee baggeexxe muumuwwanna hobonbalteti oofemeemmake duumanchuwwan; insa'nee heqqexxaxxinna dimma dukkanan. 18 Insa'nenna woyi fulabaaka hollatika hiyyichchoora haaso'ati dedhake'ni ibemmake manni giddii'n baaje dagemmaka manna qiliphphisaaxxe maaliinxe gaabbenni maxxinseexxi dedhinsaan. 19 Insa'ne umo ifinge'ninni ba'netike garba kandeenni he'neexxi, «Wele manna leexxa fuldinaan» hina'ni addachchiisa uunaan; manji eettenee hiremeexxe yaane'a garbaken. 20 Gootta no'okanna anjirallo no'oka Yessuusi Kiristoosii'i ege'nati butta duuchchaxxe battummanaa'n baanjeechchi uduma haaroba abidemeexxi injifatemoole edixxi irra insa'nexxi udumixxi hedho insa'ne'a haranga yoxxaaxxe kaddaan. 21 Qullummatika ora egeneechchi uduma insa'ne'a uwwememmak woyyichcha ajajanaa'n udumi'a higati mannii'ni edonni ookkonee qullummati ora ege'naa gonpheele woyyamman. 22 «Wonshi honqo'emmaxxa honqo'o ito'a higaan» iittanni «Booyye anshexxoolenna higgeexxi dhoqqete'ni gangallattaan» hiyyemeemmak mammaassi insa'nexxee dhugaatike mammaassan.