1 Anke aammaagne dawwa annuwwi no’ok duuchchi duummanchii hunda he’nemaxxanna abbaayyaa giddo foonfeexxa egendino’a eeyyaannen. 2 Insa’ne duuchching Muusenni mitteke kadatee duummanchake’ninna abbaayyate’n xammaqqemme. 3 Insannee duuchchiing mitte hafuuriinxe itanaa’n inde. 4 Insa’ne duuchchiingi mitte hafuuriinke ha’wonaa’n ha’wine; ha’wineekinna insa’nee hordoffa’ammaxxe hafuuriinxe rassanaa’niten; itti raasanna Kiristoositemman. 5 Kaddo malee Mageni bira sa’eeke insa’neke manna’n gamada gophemmaxxee rensh insa’neke qiilla gammoojje’n ibeeba gate.

6 Insa’ne fuggoxxa yaane halchineemmashsha no’onna halchinabe’noshsha tinni yaane no’o’aa xexxe’achchisatike fakkeennake kadde’een. 7 «Ardi ite ha’wo’aa ofo’le; siribbo’aanna ke’e» hiyyeende borreessendeemmashsha insa’nenaa’n mitti mitti manni asseemmashsha fakkuwwa magenoofatinoqqe’e. 8 Inissa’nee giddii’n mitti mittii yabaabulatixxa cubbo hujeexxi barra mitte’n lame tommenna sase kumi manni reyemashsha no’onna yabaabbulonnoqqe’e. 9 Insa’ne giddii’ni mitti mitti Gootta hega uude’e bofake’n iddemeexxi mudemmashsha, no’onna Gootta* hega uundonnoqqe’e! 10 Insa’ne giddii’n mitti mitti maamuqee’naa’a iimak erganjinni insa’ne biremmashsha ha’noonna maamuqinoqqe’e. 11 Tinni duuchcha fakkeenake kaddo’a insa’ne’n gelte; udumike barro’n he’naaneka no’oo xexxe’achchisateenna borreesende. 12 Tennexxee uureeke labaak manji ibabaashsha xexxe’atowwaal. 13 Manjoke’n geltamanxe hega uushsho malee’e wele hega uushsho ha’noo’ni gelteba’a. Xuurameesi Magen dandeetinabaa iimi darre hexxeexxi hega uushshoo ha’noo’n gelto’a waalabaan. Hega uudendinnaa woddanna eetten hega uushsho’n ossitinaasha fuldinaaka ora ha’noo’a qophpheessaan.

14 Tennexxe anke jaaluwwa fakkuwwa magenooffattatenaa’n baajje. 15 Ani tennee ha’no’n hiyyenechchi qalbeefatinaake manna kaddineemmaxxeeten; ani haaso’aneka haaso’ixxee umo ha’noonokenni ha’nonni murre! 16 No’o Mageno galateefante qoodemaannexxi eebatixxi buuda Kiristoosixxe mundenni welti mittumma affeenxebaata? Kukultinaanek budeen Kiristoosike maalinni welt mittumma afeengebaata? 17 Iikki budeen mitteke kaddemmaxxee no’oonna konne mitte budeeninaa’n qoodemaaneke kandennaxxee heddoke kandeen he’ne’e no’o mitte bison.

18 Isira’eelik ardi asseeexxa ammee hedde! Ookkonee shiqaamaka tolcha itaamak manni ookkone tolchimalchik welti mittumma afemangebaata? 19 Iitta hiyyanno wodda fakkuwwatee tolchemeechchonna kaddi yookaan umo isikenni iitti fakke la’o afeechcho hiyyeenne hiyyateeta? 20 Waawwo’o! Ayihudake kadebaak manni tolchaamak Mageno kadebaag fuggichchi hafuuruwwi’aten; ha’no fuggichchi hafuuruwwinni welt mittondino’a ani eeyyabe’no. 21 Goottiinxe buudanaa’n ha’witina’n fuggichchi hafuurixxe budanaa’ninna ha’watee’e dandeetinabaan. Goottiinxe qorenaa’ninna fuggichchuwwa hafuurixxe qorenaa’n ita dandetinabaan. 22 Tenne assat Gootti hinaafaashsha assinanota? No’o jabeenik isoo sa’na’nota?

23 «Duuchchiinxa yaane assa dande’annon» yaane kinni «duuchchiinxi yaane la’o afeba’a» duuchchiinxi yaane assatixxa deette afe’eennen kaddo malee’e duuchchiinxi yaane gargaartaaxxeba’a. 24 Mitti mitting manji la’o wele manjixxanna hedo malee’e ifike umixxa la’o calla halsoqqe’e!

25 Sammo ha’nooxxe’n daggaaxxa i’nachcho waldineexxi dikkote’n gurguremaaka maala itte! 26 Tinninna kaddaachchi buttatinna ise giddo hedheechchi duuchchi Goottiinke kademaxxeten.

27 Amaneebaak manji ha’noo’o itatre ye’e’naa’a marti’noole ha’nooxxe sammo’n daggaaxxa i’nachcho duuchcha waldineexxi ha’no’a shiqeechcho duuchcha itte. 28 Mitti manji kinni «Maal kunni magenooffachchotixxe fakkuwwa’a tolchemeeken» hiyye ha’no’n kuleexxe kaddoole konee ha’no’n kulemake manjixxeenna sammoxxee ookkone maala ittinoqqe’e. 29 Sammotte hiyya anxi ookkone manjixxe sammo hiyyatete malee’e ha’noxxe sammo hiyyatebaan; wele manjixxe sammonni leexxumma anxi murendaachchi maayeette? 30 Ani Mageno galateefatta’ni itoonole eettene Mageno galateefatennexxe yaane’a mayeeta ane’n murenda?

31 Yoona ittinaa woddanna kaddo’o ha’witina wodda yookaan heene yaanenna assitinaa wodaa duuchchiinxa Magenike ulfinni’a asse. 32 Ayihudakeenna kado’o Girkeeke manni’a yookaan Mageniinxe tuuta’a gufote kaddinoqqe’e. 33 Duuchchiing anjiremo’a weliinxa la’o malee ifixxa la’o halsa waalenexxi assanoxxe duuchchanni manjo duuchcha gammachchiisatee hasannashsha ha’nonna iittanni asse.