1 Fakkuwwatee'e tolchemeeke maalxa no'o duuchchiing ege'na anfeenexxa egeneennen, yaane kinni ege'na ifidukisaan; jaalala kinni ijaartaan. 2 Ege'neenen hiyyeexxi hedaak manji isi ege'niyyo hasissama qico ege'nebaan. 3 Mageno eeyak manji kinni Magenoke'n ege'nemeeke kadaan. 4 Yoonna fakkuwwatee tolchemeeka maala itatixxe ani hiyyaane qici tenne butta'n fakkuwwa wayi fulabaachcho kaddeexxanna mitte Mageni gadhi darre wele magenuwwi hedhebaaxxa egeneennen.

5 Haanonna heddo magenuwwinna heddi goottuwwi hedheei; iimate'ninna buttate'ni mageno hiyyemme ye'ema'nek magenuwwi hedhoolenna, 6 no'aa kinni duuchchiinxi yaane isi darree'niten kaddeek no'onna isike kande'enek mitte Mageno Anna anfeenen; iittanni duuchchiinxi yaane isi darre'n kaddeeka no'onna isi darre'ni he'nanoka mitte Gootta Yessuusi Kiristoosii'i anfeennen. 7 Yaane kinni tenne yaane ege'neek duuchcha manjobaan. Mitti mitti manni ta'i qico'ni fakkuwwa magenoonfachcho barateemmaxxee'e fakkuwwate tolcheemmeeka maala itaa wodda fakkuwwatee'e tolcheemmeeshsha hedaan. Yaadi insa'nekinna goofake kadeemmaxxee'e battonaan. 8 Yaane kinni ita no'oo Mageniibaa iyyedagabaan, ita gonphoonolenna no'onaa'ni xe'itaaxxi yaane hexxebaan, indonolenna le'phinanoxxi yaane hexxebaan.

9 Yaane kinni ha'nooxxe leexxa fulanaaa'ni kexxeexxa amanate'n jabaatebaake manni'a gufote kaddabaashsha heqedhdhe. 10 Ati iitta hexxeexxa ege'naa affeenni hexxe'e, jabaatebaaxxa sammo afeeka manjo fakkuwwatik mene'ni hexxe ittaa'naa uudole fukkuwwatee'e tolchendeexxa ita itatee'e tinni isoo tirtirisa gophphaata? 11 Tennexxe Kiristoosi isi'a reyeek kunni amanati jabaatebaak manji atixxe ege'naxxe buutonni ba'een hiyyoten.

12 Konne orinni aammaagne dayyuwwa ha'nookka balleesiyyotinna jabaatebaaxxa insa'nexxa sammo madeesati Kiristoosi balleesitinaan. 13 Tennexxe ani itaanexxi yaane dayyo anka guggufachchiisa'nexxe kaddeechchinni dayyo anka guggufachchiisabo'noshsha harnga maala itabo'non.