1 Jaalala hordoffe; Woyyichchi Hafuurixxa uwwaara giddii'ninni raaga haaso'atixxa uwwa jaba qicinni halse. 2 Wele laagadinni haaso'aak manji Magenokee malee'e manjokee haaso'abaan. Buqqo kaddeexxa yaane woyyichchi Hafuuri haaso'ammaxxee ookkonee haaso'a wel ege'naak manji hedhebaan. 3 Raaga haaso'aak kinni wele manna ijaratee jabeesateenna dayyesatee ragaan. 4 Wele laagadinni haaso'aaak ifi umo calla ijaaraan; raaga haaso'aak kinni manna duuchcha ijaaraan.

5 Ha'noo duuchchiing wele laagadinni haasotinoole eeyyannon, tenne caala raaga haasotinoole eeyyannon; Mageniinxi tuuta ijaarendashsha wele laagadinni haaso'endeexxi tikema gophpha'noole wele laagadinni haaso'ati mannii'n raaga haaso'a woyyan. 6 Yoonna anke dayyuwwaa! Ha'noobaa daganno wodda wele laagadinni haaso'onnole leellati yookaan ege'nati yookaan raagik, yookaan barachchiisati ha'no'n akula gopha'onole, maa la'o ha'noa uwwanno? 7 Suusu'letishshanna kirariinsha hedheek lubbo afebaak faarotik miyuwwike hafuuri midde gargar gargar hedheeke hafuuruwa afa gophoole iitti suusu'leti ufuufendeexxi yookaan kiraarik ganendeexxi faaro hitta ege'nema dandeeta? 8 Malagati ege'nemebaake hafuurinni ufuufemeexxe kaddoole lolakee'e ayyete qophpheefata? 9 Iittanni ha'no manjoke'n aagaaka haaso'a gophphinoole ha'no haasotinaaxxa ayyete ege'na dande'aa? Diiddalotee haasotina'neeshsha kaddinaan. 10 Tenne butta'n heddo laagada hedheen, tika afebaak laagadi mittikinna hedhebaan. 11 Yoona mitti manji haaso'a'neeke haaso'ixxa tika ani ege'na gophonnole ookkone haaso'emmake manji'a keessummatte kadannon; isinna ani'a keessummate kadaan. 12 Iittanni ha'no Woyyichchi Hafuurixxa uwwa halstinaake kaddinemmaxxee Mageniinxa tuuta ijaartaaxxa uwwa caala halse.

13 Tennexxee wele laagadinni haaso'aak manji haaso'emmaxxa tikatixxi dande'a afaashsha soodattowwaal. 14 Wele laagadinni soodattaanno wodda hafuuri anki soodataan; sammo anxi kinn gumma belo gatta. 15 Yoona ani maa assa hassissa? Anke hafuurinni soodataannon; iittanni anxe sammoninna sodataannon; anke hafuurinni faarsaannon iittanni anxe sammonninna faarsaannon. 16 Iittate kadgophooleta ati hafuurik Mageno galateeffattatto wodda ati hitaattexxe yaane'a keessummate kadeek manji ati haasottaatexxa ege'na gophoole hitata atixxe galatiinxe soodachcho «Hamiin» hiyya dande'a? 17 Ati darree'n Mageno hassissaa qico galateeffatteeten; tinni atixxi soodachcho kinni wele manjo ijaartaba'a.

18 Ani ha'no duuchchiing caala wele laagadinni haaso'annaxxee Mageno galateefattannon. 19 Yaane kinni Mageniinxe tuuta giddo wele manna baraachchiisatee tomme kuma hiyyichcho wele laagadinni haaso'ati mannii'n onde hiyyichcho ege'nemeeke laagadinni haaso'a eeyyanno.

20 Anke dayyuwwa fuggoxxe yaane'a oosete kadde malee'e ha'noke heduminni oosete kaddinnoqqe'e! Ha'noke hedumik kinni lummexxineeke kadde. 21 Tinninna Seeri giddo,

«Laagadi insa'neke ege'nemebaake manninninna

alagiinke afo'inni

Konne arda'n haaso'annon;

iittatenna kaddoole ardi anki hiyyichcho anka laqabaan;»

hiyya'neen Gootti hiyyendee borresende'een.

22 Tennexxee wele laagadinni haaso'a beesisake kaddaak amanabaake manni'aate malee'e amanaaketebaan; raaga haaso'aak kinni beesisake kaddaak amanaake manni'ate malee'e amanabaaketebaan. 23 Ammaagne bukki hitaa wodda mitte mittende ammaagne wele laagadinni haasotaa'naa ege'nebaak yookaan amanebaak manni konne haaso'a laqaa wodda «Kunni manni maraate'een» hiyyabaata? 24 Yaane kinni duuchchiing raaga haaso'aa'naa amanebaak yookaan ege'nebaak manji dagoole laqaake hiyyichcho duuchcha'n cubbichchak kada ifixxa ege'naa'n; iittanni laqaake hiyyichchi duuchchinna iso'n muraan. 25 Isixxe qalbe sho'ondeexxi yaanenna leellite'naa, «Mageni ha'nooxxe oddo'ni hedheen!» hiyyat kumbu hiyye Mageno sagadaan.

26 Anke dayyuwwa yoona maa assa hasissaa? Soodachchotee bukki hitinaa wodda ha'no giddii'n mitti faarsatixxa uwwa afe'een; mitti barachchiisatixxa uwwa afe'een, mitti buqo yaane leellishatixxa uwwa afe'een, mitti wele laagadinni haaso'atixxa uwwa afe'een, weli tikatixxa uwwa afe'een; tinni duuchchiinxi uwwa Mageniinxa tuuta ijaarateete kaddowwaal. 27 Eele laagadinni haaso'a'neekiir hedhoole, lami yookaan heddatoole sasi bado badonni haaso'owwaal; insa'ne haassonneexxanna weli manji tikowwaal. 28 Tikaaki manji hedha gopheexxe kaddoole kinni wele laagadinni haaso'ammak manji bukki giddo sammi hiyyeexxi ifike umi'anna Magenokee calla haaso'owwwaal.

29 Raaga raagakiir lame yookaan sase kande'e haasonnowwaal; weli kinn haaso'endeexxa caqaseexxi memmekisowwaal. 30 Ookko ofo'leeke wele manjo'n mitte yaane Megenibaa'n leeliteexxe kaddoole edise haaso'eemmak manji sammi hiyyowwaal. 31 Ha'no mitti mitting baratinaashsha mitti mitting jabaatinaashsha ha'no duuchchiing bado badonni raaga haaso'a dandeetinaan. 32 Wabeekotik hafuur wabeekotee ajajemaan. 33 Mageni nage'iinke Mageno malee'e canciinke Megenobaan.

Magenike ardixxe tuuta duuchcha'ninna iittanden. 34 Melaalle soodachchotixxe bukki giddo sammi hitowwaali; Muusek seerinna hiyya'neeshshanni melaalle ajajendaashate malee'e haasotaashsha seeri insa'ne'a uwweebaan. 35 Melaalle egendo'a hassaaxxi mitte mitte yaane hexxoole ifi ifika aro'o mine qortowwaal; tinninna kaddaachchi soodachchotixxe bukki wodda melaalle haassoto'a hassissabaan.

36 Hitate isi? Mageniik hiyyichchi dageek ha'noo'niteeta? Yookaan Mageniik hiyyichchi geyeebi ha'noba callata? 37 «Ani wabeekaken» yookaan «Ani hafuuriinxa uwwa afeeneni» hiyyaak manji hedhoole tinni ha'no'a borreessenneexxi yaane Goottiinke ajaja kaddeexxa ege'nowwaali! 38 Tenne ege'nabaake kadoole isinna ege'neemmoqqe'e!

39 Tennexxee anke dayyuwwaa raaga haaso'atee lumo qico halse! Wele laagadinni haasso'aakaaranna hoyyitinoqqe'e! 40 Yaane kinni duuchchiinxi yaane eloke orininna seerik kaddowwaal!