1 Ha'nooxxe oddo'n yabaabulletik battoomi hexxeexxa dhugaandinni haaso'enda'neen; iitta hexxeexxi battitte yaane amana'nebaake manni giddo midde kadde egendeexxebaan. Tinninna ifixxa langa ama aadheek manji hedheen. 2 Ha'no ifi dukkine'een; tenne irra ha'no yaadiyyo hasisammabataa? Tenne iitta hexxeexxa yaane asseek manji ha'no giddii'n fuggusemowwaal. 3 Ani fedhee qiconna ha'noon welti hedha gophonolenna midde irrik ha'noon welti hedhenen. Tennexxe ha'nooni welti hedhenelchishsha tenne asseke manjo'n ta'a tenne mureenne. 4 Ha'no bukki hitinaa wodda aninna irrik ha'nooxxe oddo'ni hedhaannaxxee Gootta no'oke Yessuus Kirstoosike suminninna ha'nooxxe oddo'n hexxeexxe Gootta no'oke Yessuus Kirstoosixxe hunnanni, 5 Cubbo callinni wo'meeki konne manjik maali ba'ee'naa lubbo isixxi Gootta Yessuusixxe barra'ni anjirendaashsha iitta hedheek manji dursakee sa'isseme uwwemowwaal.

6 Ha'nooxxi ifi saada eloxebaan; heenooxxi lebele liixxe duuchcha ke'istaaxxa egendineexxebataa? 7 Yoonna ta'a lebele belo hexxinemmashsha duuchcha haaroxxe lixe kaddino'a dullate lebele fugusse. Sa'atike ayyaank beltanji Kiristoosi no'aa tolcheemmedheen. 8 Tennexxe konne ayaanna xaqaronna fuggo wo'miteexxee dullatte lebele kaddeebaak lebele affeebaaxxe kebboonni qajeelumatinna dhugaati ulfeesino.

9 Konne edo ha'no'a borresenexxe anxe borro'n yabaabuluwwakenaa'n gargar higginaasha borreesseenan. 10 Tennenna hiyyanno wodda madada tenne buttake yabaabuluwwanaa'n, yookaan haafamuwwakenaa'n, bokkaammetenaa'n, fakkuwwa magenoonfatamakeeranaa'n, gagar higge hiyyonaatebaan; iittate kaddeele silaat tenne buttanaa'n harnga ha'no fula hasisaman. 11 Yaane kinni ani ha'no'aa borreessenk amaagne dayyuwwa kadeexxi yaababulake'n, yookaan haafamaken yookaan fakkuwwa magenoonfateke, yookaan yowwaken, yookaan machcho'aak yookaan bokkaammeti welti gudditinabaashaten. Iitta hedheeke manjinni welti ita midde welt ittinoqe. 12 Mageniinxe tuuta gadho hedheeke manna'ni maachcho anee'e e'yishshaa? Mageniixxe tuuta giddo hedheeke manna'ni ha'no murte uutinabaa?

13 Mageniinxe tuuta gadhi darre hedheeke'ni muraak kinni Magenoken. «Yoona fuggichcha manjo oddo ha'nooxxenaa'ni fuggusse.»