1 Mageniinxe fedhinni Yessuusi Kiristoosike erganjo kado'a ye'emeeke Pha'wuloosinaa'ninna dayyo no'oke Soositensinaa'n.

2 Qorontoosik qachchi giddo afendaaxxe Magenxe tuuta'a, Yessuusi Kiristoosinni woyyichchka kedeexxi Magenokee woyyichchake kado'a ye'emeekeri'a, iittanni booncho booncho'n insa'ne'aanna no'o'a Gootta kadeeke Yessuusi Kirstoosika summa ye'aake duuchchi'a.

3 Mageno Anna no'okenna Gootta Yessuusi Kiristoosike badhaadhinni nage'i ha'no'a kadowwaal.

4 Yessuus Kiristoosi badhadha ifika ha'no'a uwweexxe duuchchi wodda Mageno galateefata'enne. 5 Tinninna duuchchiinxe yaanenni, haaso'i duuchchinn, eege'na duuchchinni, Kirsitoosi darre'n durreeyette kaddinaashsha assendine'een.

6 Kiristoosixxe ha'no'n kullenexxa yaane dhugaalessumma isexxa kokese'een. 7 Tennexxee Gootta no'oka Yessuusi Kiristoosixxa leella halcati heqqexxina'n hexxinaa wodda hiin hafuurnxi uwwanna ha'no'naa'n xe'yitabaan.

8 Isinna Gootta Yessuusi Kiristoosixxe dagatixxe barra qico'n mitte ci'me mabelo hexxinaashsha ha'no jabeessaan. 9 Belto ifike Gootta no'oke Yessuus Kiristoosinni welt mittumma afinaashsha ha'no'o ye'eek Magen addatemeeken.

10 Anke dayyuwwa ha'no duuchching mitti afo'a haaso'tino'a mitti qalbe mitte yaada afinaasha weli aagino'a malee'e ha'no giddo weli qoodensha hexxabaashsha Gootta Yessuus Kiristoosike summinni ha'no kadhataanen. 11 Anke dayyuwwa ha'noxxe oddo'n welgiba hexxeexxa Qelo'eke mini hadinnaan laqe'enen. 12 Tinninna ha'no giddo mitti, «Ani Phawuloosiken» hiyya wodda weli kinni, «Ani Aphiloosiken» hiyya'neen; iittanni welinna «Ani Keefaken» hiyya wodda welkinna «Ani Kiristoosiken» hiyya'neen.

13 Isi Kiristoosi qoodeme'eta? Isi Pawuloosi ha'no'aa fansemeeta? Yookaan Phawuloosike summinni xammaqendineeta? 14 Ani Qersiphoosinna Gayiyoosi gadhi darre ha'nonaa'n ayyeenna xammaqa gopheennaxxe Mageno galateefataannen. 15 Tennexxe summa ankenna xammaqenexxa haaso'aak ayyinna hedhebaan. 16 Eeti Isxifaanosika mini hado xammaqeennen; konne gadhi darre weli xammaqenek manji hedheexxa qalli hiyyabo'non. 17 Kiristoosi ane'e ergeek wonegeel lallalbonaate malee'e xammaqonaatebaan; Kirstoosixxi wengel butta gatteexxe kaddabaashsha manjike haaso'inke beekuminni lallababo'non.

18 Kirstoosxe fannisenshaak haaso'i ba'aake manni'a gowwumatishsha uudema; no'oo anjiremmeneke kinni Mageiinxe hunnan.

19 Tinninna, «Beekoletika beekuma balleesanon

Ege'na afeemake mannixxa ege'nanna tolaa gatisanon» hiyyendeexxi borresendeemmashaten.

20 Yoona beeki haba hedhetaa? Muxxali haba hedhetaa? Konne barki qo'nsalinna haba hedhetaa? Magen tenne buttaka beekum gowwumate asse'ebaataa? 21 Mageniike beekuminaa'n kexxeexxa butta ifike beekuminni Mageno ege'naa dande'a gopheemmaxxe'e lallabatixxe gowwuma'n amanaakara anjiro'a Magniinxe fedhi kadde'en. 22 Ayihudi mambe'iinka beesisuwwa uudo'a hasaan; Girkeek manninna beekuma yoraan. 23 No'o kinni fannisemeeke Kiristoosi lallanbannon; tinninna Ayihudakee gufo, Ayidake kadabaake kinni gowwumate.

24 Magen ye'eeke Ayihudake kadi Girkeeke manni'a, Kiristoosi Mageniinxe hunnanna Mageniinke beekuman. 25 Tinninna kadde'eechi Mageniinxe gowwuman hiyyend hedendaaxxi yaane manjiinke beekumanaa'n saxxamaxxeten; Magniinxe hunna goha hiyyende hedendaaxxi yaanenna manjiinxe hunanaa'n saxxaaxxe kaddeemmaxxeten.

26 Anke dayuwwa ye'endinema wodda hitta hexxinemake manna kadineemmaxxee amme hedde; manjiinxe uushoshsha ha'noonaa'n heddi manni beekuma afe'emabaake; heddi manninna jajjabakemabaan; ilenshatinna gurra fuleeke hado naa'nitemmabaan. 27 Yaane kinn Magen beekole shookishatee buttate'n gowwooletishsha uudemamaka manna fi'le; jajjabba mannanna shookishatee buttate'n hedheeka gophaalsa manna file. 28 Magen ulfatteexxa yaane hexxebashsha assatee tenne buttixxa yuukkitexxanna tuffatendeexxa yaane, wayifuldabaaxxa yaanenna fi'le. 29 Tennennenna asseechchi ayyinna isi edo hollabaashaten. 30 Ha'no kinni Yessuus Kiristoosinni welti mittumma afatee geltineechi isinaa'n kexxeexxiniten; tennexxe Mageni Yessuusi'i beekuma no'oke, qullumma no'oxxe, woyyumma no'oxxeenna wodo no'oxxe'e kadaashsha asse. 31 Yoonna, «Ifi saadaak Goottik ifi saadowaal» hiyyendee borresendeemmashaten.