1 Mitti manji ha'no giddii'n mittik weli gonphe afe'oole, eettene yaane ammaagne dayyuwwa'n shiqishshamaaxa bakka hitta amanebaake manni edo murtete shiqaa? 2 Qulliyye buttate'n murtaaxxa egendineen hexxinbaata? Butta duuchcha'ni murtina'neelchinni tenne heenooxxe yaane'a muratee geya gophinaata? 3 Tenne buttatixxe yaanuwwa'n waalin erganate'n midde murrannoxxa egendineen hexxinebataa? 4 Yoonna iitta hexxeexxi yaane ha'noo'n kaddaa wodda Mageniinxe tuuta'n tuffatemeeke amanebaake manni edo murte uwwendo'a hitta shiqinnaa?

5 Tenne hiyyaanek ha'no shookino'a hiyyeeten. Eega ha'no giddo ammaagne dayyuwwa murte uwwa dande'aak mitti beek manji hedha gophetaa? 6 Yaane kinni ammaagne dayyi ammaagne dayyo ifika ku'lo'a murteti mine mara'neen; kuninna ammaagnete kadabaake manna'n! 7 Yoonna ha'nooxxe oddo'ni weli ku'la hedhandi ha'nooxxe iba leelishshaan. Tenne irra ha'noo miidhendineele maye hedhee? Sobendineele maye hedhee? 8 Ha'no umi ha'nooginninni balleesitina'neen, sobbina'neen; iikkinna aammaagne dayyuwwa ha'nooka. 9 Fuggaaleeyye Mageniinxa moottumma dhaaldabaaxxa egendineen hexxinebataa? Tenne yaanuwwa'n mee dedhake'n ibbe; qii'misuwwi, dharcha magenuwwa magenoonfatamakir, yabaabulluwwi, yookaan labbak labbakenni yabaabulaakir, 10 yookaan moodhalsheti, yookaan maalaqake haafemakir, machcho'aluwwi, yookaan summa manjiinka balleesakir, yookaan bokkaame Mageniinxa mootumma dhaaldabaan. 11 Ha'no giddii'n mitti mitti iitta hexxineemman. Yaane kinni ta'a Gootta Yessuus Kiristoosike summininna no'oke Magnike Hafuurinn ha'no anshexxine'een, woyyichchake kaddine qulloondine'een.

12 «Duuchchiinxe yaane ani'a eetti uwwendeen;» Kaddo malee duuchchiinxi yaane ani'a la'o affeexxebaan; «Duuchchiinxe yaane'ni ani'a eetti uwwende'een;» kaddo malee'e heene yaanne'anna ani garbake kade hiremabo'non. 13 «Ita godobakeeten godobi itateeten» Yaane kinni Magen lamiinga balleessa. Kaddo malee'e bisi no'ok Gootta Yessuusi'aa, Gootti Yessuusinna biso no'okeete kadeemmaxxe'e biso no'oka yabaabulltee'e hosisa hassissabaan. 14 Magen Gootta Yessuusii'i reyotenaa'n ke'isseemmashsha, no'oonna iittanni hunna ifixxenni reyoenaa'ni ke'issaan.

15 Bisi ha'nook Kiristoosike bisike qoola kadeexxa egendinebataa? Eega, Kiristoosike bisika qoola aadhe eettene yabaabulto manjichchoke bisike qooluwwinni welti mitte kaddaashsha assanotaa? Haranga hassissabaan. 16 Yookaan yabaabulto manjichchonni welti diiphak manji isenni mitte biso kadeexxa egendineebataa? «Iikki lamiing mitte biso kandaan» hiyyende borresendeemmashshaten. 17 Yaane kinni Gootta Yessuusinni welti mittoommaak manji isinni welti Hafuurk mitte kadaan. 18 Tennexxe Ha'no yabaabulletenaa'n baaje. Manji hujaaxxi cubbo duuchcha ifike bisi gadhi darre hujendaaxxen; yaane kinni yabaabulaak manji biso ifike'n hanaa cubbo hujaan. 19 Ha'nook bisi ha'noo giddo hedha'neeke Woyyichchi Hafuurke Galma kadeexxa egendineebataa? Kunni Hafuurinna ha'no Magenokenaa'ni adhdhitineeken. Ha'noonna umi ha'nooginn ifikebaan. 20 Ha'no hirki hirendine'eeken. Tennexxe biso ha'nookenni Mageno ulfeesse.