1 Udumixxe barra'ni wixixxi assitaaxxi yanna daggaaxxa ege'ne! 2 Manni umo ifika eeyyake kadaan, iittanni maallaqakee hafemaake, ifi dukaake, hollaake, yowwaake, hadokee ajajemabaake, galateefatabaake, woyyumma afebaake, 3 jaalala afebaake, araara eeyyabaake, manjiinka summa balleessaake, umo ifika hirabaake, godoba jabaataake, eloxxa yaane gibaake, 4 waakataake, haafemaake, tolanga hollati wo'meeke, Mageno eeyyaati irra maaliinxa gammashsho eeyyaake kadaani. 5 Kunni manni Mageno addateeke labee leellaan; yaane kinni magenoonfachchotixxa hunna waakkataan. Iitta hedheeke mannanaa'n bayyati.

6 Kunni manni mine mine luuxxe e'ya'ni cubbondi hana cubbo tuulendeexxarranna gargar hexxeexxe fuggoxxe gaabbe giddo e'yiteexxa ballallitte melaale fonxoraake mannanni. 7 Iitta hexxeexxi melaale duuchchii wodda barataan; yaane kinni dhugaa ege'natibaa haranga geya dandeetabaan. 8 Iyyaanesinna Iyyaanbereesi Muusee morommemmashsha kunni manni hedumi insa'neeki ba'eemmaxxenna amanatixxe yaanenaa'ni inbeemmaxxee dhugaa ginbaan. 9 Yaane kinni Iyyaanesixxinna Iyyaanberesixxi gowwumma ege'nendeemmashsha konne mannixxi gowwummanna manna duuchcha'ni ege'nedaammaxxee insa'ne'aa qajeeldabaan.

10 Ati kinni barachchiisa anxa, adaba anka, yaada anka, amana anxa, ossa anxa, jaalala anxanna jabeenna anka hordofeeten. 11 Iittanni shorrema anxanna rakko anxa egendeeten. Ani Antsookiya, Iqoniyoonikenna Lisixxirake qachcha'ni ane'ni geyemmaka shorrichchonna rakko hitta ossenne qico egendeeten. Gootti kinni tennee yaane duuchchana'ni anee anjire. 12 Dhugaati Yessuusi Kirsitoosi'i amaneexxi Mageno fakkaate hedho'a eeyyaak duuchchi shorremaan. 13 Yaane kinni fuggaaleyenna sobaaleyye ifi'aanni dedha'ninna manna dedhisa'ni fuggoxxe'ni fuggo lephpha'n me'aan.

14 Ati kinni ayyenaa'n barateettexxa egendeetaxxee'e barratetexxe'ninna qalbeeffateetexxe dhugaa'n ti'ni hite hedhi. 15 Iittanni oosummandenaa'n saffetexxi Yessuusi Kiristoosi amanati anjirema afendaaxxa barachcho ati'aa uwwaaka Woyyichcha maxaafuwwa egendeeten. 16 Woyyichchi maxaafuwwi duuchchi Mageniink Hafuuri itti hedheeken; Isinna dhugaa barachchiisatee, xixatee, dedha toggi assateenna qullummatike ora'ninna gorsa uwwatee la'o uwwaan. 17 Higgeenna Mageniink manji wo'ma manjo kadeexxi eloxxa huje duuchcha hujatee geya manjo kadeexxi afemaashshaten.