1 Mageni edonna iittanni moottumma ifixxenni daggaa wodda, hedheekenna reyaake manna'ni muraakee Yessuusi Kiristoosi edo atee maganne hiyyaannen. 2 Mageniinka hiyyichcho lallab; Eldoolenna, yoxxoolenna heene yanna'ninna jabaate huji; lumoxxe ossuntenninna barachchiisat toggi assite, xixxa'ni jajabeesi. 3 Fayyaxxa barachchiisa laqa ginbaaxxe yanna daggaan. Eettene yanna'ni insa'nexxe halchashsha eenaaxxa yaane insa'ne'a kulaaka barachchiisalluwwa ifi'a bukki asse'naan. 4 Dhugaa laqa waalleexxi xingo laqate eenaan. 5 Ati kinni duuchchiinxe yaane'ni ifi heqqedhi, rakkote'n ossi; wengeele lallabatixxa hujenna huji, ergatensha atixxanna muuxxi.

6 Ante kadoonnole kinni tolchema shiqeennen. Tenne buttanna waale me'annoxxi barranna gelte'een. 7 Lolakenna kadoole giisse loleenne; hokoketika anka gongichchonna muuxami qico'n gonge'eennen; amana anxanna heqqedheennen. 8 Ta'anni edi'a qullummatik kallachchi ani'a qixxeesseme'een. Ookkone kallachchanna qullummat muraak Gootti eettene barra'n ani'a uwwaan. Uwwaakinna ani calli'ate kaddebaang dago isika halchaake duuchchi'aten.

9 Rakkettexxi aniba'a dagatee jabaati! 10 Deemaasi kaba buttixxa yaane eeyyati anenaa'ni gargar higeexxi Teseloonqeke qachchibaa me'eedhen, Qerqiisi Gelaatiya'aa, Titonna Dilimaaxiyaa'a me'eedheen. 11 Aninni welti hedheeki Luqqaasi callani. Maariqoosi ergematee ani'a hasisammaxxee daggatto wodda isoo aaxxe dagi. 12 Tikiqoosi'i Efesooni'a ergeennen. 13 Daggatto wodda Xiro'aada Karpuusibaa uggeenneka anka kaabba aaxxe dagi! Ookkonee mirqemalcho maxaafuwwa giddii'ninni ookkonee gogiinka maxaafuwwa ani'a iyyedagi. 14 Sageetotika siblo tume giissamak Isikindiri jabbaxxe miidhensha ane'ni geessiseedhen; Gootti huje isixxishshanni isi'a uwwaan. 15 No'o haasonnannoxxa lumo qico xaa'naammaxxee ati isinaa'ni ifi heqqedhi!

16 Ku'lemeennexxe yaane giddii'n taakkessoxxa anxa faachcheefachcho shiqishenne wodda duuchching anenaa'n gargar higee malee, aninni welti hedheexxi mittikinna anee qarqaareeki hedhebaan. Tenneenna Mageni insa'neni balleessatishsha laakko'oqqe'e! 17 Yaane kinni eloxxi odo ani ga'mii'n wo'ma qicinni lassendaashanna Ayihudake kadebaak manni duuchchi anenaa'n laqaashsha Gootti aninni welti hedheexxi anee jabeesseen. Neenqinke afo'inaa'ninna anee anjireen. 18 Gootti anee heene elobaaxxe yaanenaa'ni gatiseexxi iimatixxe ifixxe moottummaa anee geesisaan. Duuchchi woddinaa'n duuchchi woddi'a ulfinni isi'a kadowwaal! Hamiin.

19 Pirsiqila'a, Aqila'aanna Enesifoorike mini hadi'a nage'a anka kuli! 20 Erasixoosi Qorontoosike qachcha'ni gatee'een. Xirofimoosii'i giissa gophemmaxxee isoo Miliixike qachcha'n waale'eennen. 21 Haarsi dagebaang anibaa dagi, Ewwubuluusi, Phuudeesi, Linoosi, Qilawidiiyanna ammaagne duuchchi ati'a nage'a dhaande'een. 22 Gootti atinni welti hedhowwaal. Mageniink badhaadhi ha'no'n welti hedhowwaali.