1 Magniinke erganjonna Yessuusi Kiristoosike ergemallo kadeeke, Mageni fi'leek manni Mageno fakkaatatibaa nophphaashshanna ammaanyummatixxa barachcho wo'ma qicinni ege'naashsha assatee baalloome'eekee Phawuloosinaa'n ergendeexxe erga. 2 Tinni amana, duuchchii woddixxe hedhoxxe adde hana kaasende'eexxen; dhara haaso'abaak Mageni tennee hedho uwwatee baruwwii edi darre no'oo addachchiise, 3 Iitti yanna geltee wodda anjirallo no'oke Magenike ajajinni ani lallabonnaa ane'n uwwendeexxe maganne darree'n Mageni hiyyichcho ifika ifise.

4 Qabe anfeennexxe amananni anke dhugaatike belto kaddeetteke Tito'aa.

Mageno Aabinaa'ni, anjirallo no'oka Yessuusi Kiristoosinaa'ninna badhaadhakinna nage'i ati'a kadowwaal.

5 Atee Qerxeesi waalenechchi toggi hiteemmabaaxxa yaane toggi assitatoshshanna atee ajajennee qicinni qachcha qachcha'n geedhe baallonsitotta'aaten. 6 Mageniinxe tuutak geerchi ci'memabaakenna mitte arek aro'o kadeeke, qii'misati yookaan ajajema gophatixxe buutonni ku'lendabaaxxa ammaanye oose afe'eeke manjo kada hassissaan. 7 Kunni Mageniinxe tuutak geerchi Mageniinxa huje maganneti adhdheeke kademma qiccinni, ci'memabaake kada hassissaan; iittanni hollabaake, iikki woddi mufatabaake, machcho'abaake, lolemabaake, seeri beloke orinni la'o alfatee haafemabaake kada hassissaan. 8 Tenne mannii'n keessumma adhdhaake, eloxxe kaddeexxa yaane eeyyaake, ifika umo hiraake, yaane dassabaake, woyyichchakenna xexxe'ataake kada hassissaan. 9 Dhugaatixxa barachcho barachchiisatee'e gorsa uwwaateenna tennee barachcho xaa'naake wele manni'a hiissichcho uwwa dande'aake kadaashsha baratemma qicinni xuurameessa hiyyichcho'n ti'ni hiyyeexxi hedhaake kada hassissaan.

10 Heddi manni, giddii'ninni Ayihudiinke manna kadeexxi jila ofo'latixxa aada hordofaakiir, ajajemabaakiir, afoollichchake kade'eekiirinna manjo dedhisaakiir hedheen. 11 Iitta hedheeka manna sammi assa hassissaan; tinni kada hassissaachchi insa'ne seeri beloke orinni la'o alfatee hineexxi barachchiisa hassissabaaxxa yaane barachchiisati mini mini hado duuchcha nage'a hoyyinammaxxeeten. 12 Insa'ne giddii'ni insa'nenge wabeekichcha kade'eek mitti, «Qerixxesik manni duuchchi wodda dharichchake, fuggoke biniincha, huje afebaake godobisanjon» hiyye'een. 13 Tinni dhugaa kula dhuggaatixxen; tennexxee wo'ma amana afaashsha konnee manna jaba qicinni xixi. 14 Ayihudiinke mannixxa xingo hordonfabaashshanna dhugaatenaa'n bayyateeke mannika ajaja lanqabaashsha jaba qicinni insa'nee xixi. 15 Luqqichchuwwakee duuchchiinxi yaane luqqitteten; fuggaalyyeteenna amanabaakeeri'a kinni mittetinna luqqitte yaane hexxebaan; iittanni insa'nexxi sammonna insa'nek wodani batto'eeken. 16 Insa'ne «No'o Mageno egenneennen» hinaan; yaane kinni ifixxe hujenni isoo waakkantaan; insa'ne diqachchisaakeera, ajajemabaakeeranna mitte eloxxa yaane assa dande'abaakeeran.