1 Phawuloosinaa'n Sillaasinaa'ninna Ximotoosinaa'n.

Mageno no'okenna Anna'ninna Gootta no'oke Yessuusi Kiristoosi'n hexxeexxe Teseloonqeexxe amaanye'a ergemeeka nage'a.

2 Mageno Aannakenaa'ninna Gootti Yessuusi Kiristoosinaa'n badhaadhikkinna nage'i ha'no'a kadowwaal!

3 No'oke dayyuwwa, ha'noxxee no'o duuchchii wodda Mageno galateeffata hasissaan. Galateeffantannochchinna amana ha'noxxinna yo'oshsha nophphita'naa welinni weli eeyyunte ha'nooxxi lebba'n me'itemmaxxeeten. 4 Tennexxe shorremmiyyote'ninna rakko duuchcha'n ti'ni hitine uurritinemmaxxee ha'nooxxe amanaxxeenna ha'nooxxe ossuntexxee Mageniinxe tuutaari edo ha'noxxee ifi saanda'ennen.

5 Tenninna leellishshaak Mageniixxi murte toggittete kadaten; tennenaa'n kexxeexxa ha'no rakko adhdhitineexxe Mageniinxe mootumma'a geyaake manjo kaddinee uudendinaan. 6 Mageni toggitte murte muraake kadeemmaxxee ta'a ha'no'ni rakko iyyedagemmake manna'ni rakko iyyedaga'n hira insa'neeka uwwan. 7 Ta'a ha'no rakko adhdhitina'neekee no'onni welti hafuura adhdhate uwwaan. Tinni hafuura adhdhanna Gootti Yessuusi hunnaameeyye erganna ifixxinni welti iimi'ni dagaa woddan. 8 Isi iimi'ni dirra qicinna bubbaaxxe giiranniten. Ookkone wodda Mageno ege'nebaaka manna Gootta no'oke Yessuusi Kirsitoossixxe wengeele'a ajajemabaaka manna'n mura ibisaan. 9 Insa'ne Gootti edii'ninna isike hunnaameessa ulfinnanaa'ni gargar hingeexxi duuchchii woddixxee ba'neexxi mura insa'ne'n ibbaan. 10 Insa'ne'ni mura ibbaakinna eetenne barra woyyolete'n ulfaato'anna isoo amaanaake duuchcha'n saademo'a dagaaxxe barra'niten. Ha'nonna no'oxxa dhugaa kula adhdhitine amandinemmaxxee ha'nonna insa'nen welti uudendinaan.

11 Tenne henda'n, Mageni no'ok isike ye'inji'a ha'noo geltinaake asse uudaashsha, eloxxa hujatee afineexxa halchanna ha'nooxxe amanatenaa'n daggeexxa hanoxxa huje duuchcha isi ifixxe hunnan hano'a muuxo'a duuchchi wodda ha'nooxxee soodataannen. 12 Iittanni no'oke Mageno Gootti Yessuusik Kiristoosike badhaadhixxe qixxenni Gootta no'oke Yessuusi summi ha'no'ni ulfeessemo'anna ha'nonna iso'n ulfessendino'a tenne soodanta'nennen.