1 Dayyuwwa tenne kaddaaxxe yaanuwwaxxee, yannatixxeenna baruwwiinxee no'o ha'no'aa borreessa hassissabaan. 2 Tininna kaddaachchi moodhalchi hashsha dagammashsha Goottiinxi barranna iittanni daggaaxxa ha'no umo ha'noongenninni adda egendine'een. 3 Manni, «Duuchchiinxi yaane nege'aken hedhenegeechchi hedhebaan» hiyyaa'na ciniinto meyyaxxe'n daggammashsha iittanni ba'ne dadhange'n insa'ne'n daggaan; insa'nenna haranga baanje fullabaan. 4 Ha'noo kinni dayyuwwa tinni barra moodhalchiinsha ha'no'ni daggabaashsha ha'noo dukkana giddo hexxinebaan. 5 Ha'noo duuchchiing ifiinkenna barrike mannan. No'o hashshike yookaan dukkanatike mannabaan. 6 Yoona dammanqo; no'oo umo ifika hirro malee'e mugaammake wele mannishsha kandonnoqqe'e. 7 Mugaaki hashsha mugammashsha; machcho'akirinna hashsha machcho'aan. 8 No'o kinni barrike manna kandeennaxxe'ee jaalalatanna amana qoma golle'namaake bagediink mi'yishsha oddo'wino; anjirematixxa adde ifi faachcheffantammaxxe bagediinxe gulleshsha umoke'ni uggudhdhino. 9 Mageni no'oo ye'eechchi anjirensha Gootta no'oke Yessuusi Kiristoosi darree'n alfinannoshshate malee mufe ifixxa no'o'ni dirriso'atebaan. 10 Kirisitoosi no'oxxee reyeechchi hedhoti he'noonole yookaan rennoonnole isinni welti he'nonnaaten. 11 Tennexxee ta'a assitinammashsha mitti mitte nossowwaal; weli'aanni weli dayyeesse.

12 Yoona dayyuwwa ha'noo giddo hujeti elo'a'neekaara, Goottik ha'noke sooresuwwanna ha'noke gorsalluwwa kadeekaara ulfeesitinaashsha ha'noo kadhataannen. 13 Hunja'neexxe hujexxee jaalalati insa'ne lumo qico ulfeesse; weli'anni weli ha'noonna nage'ik hedhdhe. 14 Dayyuwwa ha'no gorsinaannen; booso'a manna xixxe; hophphoola manna tirtirisse; gophaalye manna gargaarre; manjo duuchchanna osse. 15 Ayyinna fuggoxxee fuggoxxa hiissabaashsha heqqedhe; yaane kinni tenne irra weli'aan weli kaddo wele manni'a duuchchi wodda eloxxe kaddeexxa yaane assatee jabaatte. 16 Duuchchi wodda gammadde; 17 Duuchchi wodda soodatte; 18 Duuchchiinxe yaanexxee Magno galateeffatte; Yessuusi Kiristoosi darree'ni Mageni ha'noonaa'n hasa'nexxi tenneten. 19 Woyyichchi Hafuurixxa huje buqqinoqqe'e. 20 Raaga tuffatinoqqe'e; 21 Duuchchiinxa yaane hega uudde; eloxxe kaddeexxa abixxe. 22 Heene fuggoxxe yaanenaa'n bayyatte.

23 Nage'ink Mageni isi umo ifingenninni ha'no hara woyyonsowwaal. Irri ha'nok, lubbo ha'nooxxinna maali ha'nok Gootti Yessuusi Kiristoosi dagaa wodda ci'mema belo heqqemeexxi hedhowwaal. 24 Dayyuwwa ha'noo ye'eeki amanemeeke kademmaxxee isi tenne assaan. 25 Dayyuwwaa! No'aanna soodatte. 26 Dayyuwwa duuchcha woyyummatixxe sunqeccanni weli'aan weli nage'a aadhdhe. 27 Tinni erga amaagne dayyuwwi duuchchi'a haassesendaashsha ha'noo Goottik maganne hiyyaannen. 28 Gootti no'okiki Yessuusi Kiristoosik badhaadhi ha'noonni welti hedhowwaal.