1 Tennexxee ossa dande'a gonpheennaxxe yannateee Ateena giddo no'oxxi qofi gata eloxxe kaddeexxa hendenne. 2 Ha'nooxxe amana'ni ha'no dayyeessaashshanna gorsaashsha dayyo no'okanna Kiristoosixxe wengeelexxa huje no'onn welti hujaaka Mageniinke erganjo kadeeka Ximotoosi ha'no'aa ergineenen. 3 Tinninna tenne hega uushshonni ayyinna lele'mabaashshaten. Tinni yaane no'o'ni kaddo'a murtessendeexxe kaddeexxa ha'no umo ha'nongenninni egendine'een. 4 Dhugaaten, ha'nonni welti he'nennaa wodda rakko no'o'n geltaaxxa yanna yanna'ni ha'no'n kula'ennan; ha'no egendinemmashshanni hinenneshshanni kaddeen. 5 Tennexxee harnga ossa dande'ebenoxxa yanna ha'noxxa amanaxxa ege'nonna Ximootoosi ergennen. Tennenna asssennechchi akimagaada iikki hega uuddalli ha'no hega uude'na'a elo no'oxxi duuchcha la'o affebaaxxe kadde gattaan hiyye sodaatennexxeeten.

6 Ta'a kinni Ximotoosi ha'nobaa'n no'obaa dageexxi ha'nooxxe amnaxxenna ha'noxxe eeyyuntexxa eloxxa odo no'o'n kule'een. Iittanni no'o'aa duuchchi wodda eloxxenni qalli hitina'neexxanna no'onna ha'no'o uudatee eena'ennaxxe qixxe'n ha'nonna no'o uudatee halchitina'neexxa isi no'o'n haaso'een. 7 Tennexxe koo anke dayyuwwa seldo ha'noxxinna wixxixxi ha'noxxe amanaxxe duuchcha no'o ha'noxxee dayyanenne; 8 Gottake'n ti'ni hitineexxi uurritinemmaxxee dhugaate'n ta'a tenne hedhoti he'nanno. 9 Ha'nooxxe buutonni Gootta no'ok edo alfinennexxe gammashsho duuchchixxee Magenokee hitte qicika galatata isi'a shiqisha no'o'a hasissuta? 10 Higgeen ha'no uundonna'anna ha'nooxxe amana'n xe'iteexxa ha'no'aa wonshinonna'a hashshanna barra jaba qicinni soodantannen. 11 Taa'nna Mageni no'ok Gootti isi umo insaneegeninna Gootti no'ok Yessuus Kiristoos ha'noba dangannoshsha ora no'oka no'aa isi qajeelchowaalta! 12 No'o ha'no'a jaalala anfenneshshanni ha'noonna weli'anni weli affineexxa jalalanna welekeenna afineexxa jaalala Gootti ha'no'a birasa'issowwaal; lebe faqqaashshanna assowwaal. 13 Gootti no'ok Yessuusi Kiristoosi ifixxe woyyoolenni welti dagaa wodda Gootta no'okenna anna no'ok edo ci'mabelokenna woyyoolete kaddineexxi afendinaashsha qalbe ha'nooxxa jabeesaan.