1 Yoona dayyuwwa Mageno gammachchiissatee ha'no hitta hedha hassissaaxxa no'onaa'n baratine'een; ta'a hexxina'ee qicinna iittanden. Gootta Yessuusike summinni ha'no'o kadhantaannexinna ha'no gorsa'neki ta'anna konne caala edi'a assitino'aten. 2 Gootta Yessuusike summinni hoone ajaja ha'no'a uunennexxa egendine'een. 3 Magenxi fedhi ha'no yabaabbuletenaa'n bayyatineexxi woyyondinaashaten. 4 Ha'noona'n mitti mitting ifixxa are woyyummatinna ulfinniki abixxa hassissaaxxa ege'no'aten. 5 Tinninna Mageno ege'nebaake Ayihudake kadebaake mannishsha yabaabbultetixxe yortennite kaddoqqe'e. 6 Tenne yaanenni ayyinna qaxxamurexxi ammanye dayyo ifika dedhisoqqe'e; konnechchi edo ha'no'ni kulleneshanna xexxe'achchiisennashshanni tennee iitta hexxeexxa yaanuwwa assaakera'ni Gootti muraan. 7 Yaane kinni Mageni no'oo ye'eechchi woyyummat he'nonaate malee battummati ha'nonaatebaan. 8 Yoona konnne gorsa adhdhabaak huuni manjinna Woyyichcha Hafuura ifika ha'no'aa uwwemake Mageno malee'e manjokebaan. 9 Dayyoomiinxee jaalalaxxe ayyinna ha'no'a borreessa hassissabaan; tinninna ha'noo umo ha'nogininni weli'aanni weli eeyya Magenokenaa'n baratine'een. 10 Meqedooniya giddo hedha'neeka dayyuwwa duuchcha dhugaaten eetina'neen; yaane kinni dayyuwwa ta'anna ha'no gorsinannechchi caala eettino'aaten. 11 Konnechchi edo ha'no ajanjeneshshanni ifixxe anganni hucce; salalik hedhdhe; ifixxa yaane calla uude. 12 Tinninna ha'no amanabaake mannixxe oddo'ni ulfinnik hexxinaashshanna hoone manjo'ninna ba'ote kaddinabaashshaten.

13 Dayyuwwa adde afebake mannishsha yaadinabaasha amane reyemmake mannixxe'e dhugaa egendino'a eenanneni. 14 Yessuusi reyeexxanna reyotenaa'n ke'eexxa amannaannechchinni iitanni Yessuusi'ni amane reyeekaara Mageni Yessuusinni welti insa'nee iyyedagaan. 15 Goottakenaa'n adhinenneke hiyyichchishsha ha'no'n kulaannexxi yaane, no'o hedhoti he'naannekinna Gootti dagaa qico'ni turraanneki reyemmaka manna edinsabe'non. 16 Gootti umo ifingenninni lumok ajajinni, ergannatike sooresixxe raareninna Mageniinke malagatike hafuurinni iimi'ni dirraan; Kiristoosi'ni amane reyemmakirinna edise ke'aan. 17 Ookkonneechchi uduma no'o hedhotike kandeennekinna buttate'ni he'nenneki Gootta ayyarete'n adhdhinona'a insa'nen welti duumanchake'n iimi'a buttemannon, duuchchi woddi'anna Goottik welti he'nannon. 18 Tennexxee konne hiyyichchinni weli'aan weli dayyeesse.