1 Kirsitoosinni welti affineexxe mittummaxxi hiini jaalalatixxe dayyessanna kaddo Hafuuriinke mittumma, marartenna o'wa kaddo, 2 mitte heduminni mitte afo'o kadde, mitte eeyyuntenni, mitte godobinninna mitte wodaninni hedhiyyoti mitteke kaddineexxi gammashsho anxa wonshe! 3 Wele manni ha'nonaa'n woyyo'aaxxe kadeexxa shequnteti uudde malee ifi eeyyatixxe halchanni yookaan wayi fuldabaaxxe ifi saadanni mittechchonna assitinoqqe'e. 4 Mitti mittingi ifixxa la'o calla kadebaangi weliinxa la'onna hedowwaal! 5 Yessuusi Kirsitoosi'n hedhemmaki kunni yaadi ha'noo'ninna hedhowwaali!

6 Isi adabik Magenoke kadeenni hedheexxi

Magenik welti weli qixxooma waala hasabaashsha asseexxi uudebaan.

7 Yaane kinni ifi garbiinsha asseexxi

manjixxe fakke'n ilemeexxi

ifi duwwike asse.

8 Manjoke kadeexxi umo ifika shaqunitete shiixxise

reyoti qioco'n

ikkinni fannote'n fannisemeexxi

reyati qico'ni ajajemeeke kade.

9 Tennenaa'ni kexxeexxa Mageni konnete hiyyemabaa qico isoo lummiseen;

summa duuchchanaa'n caalaka summanna isi'a uwween.

10 Tennexxee iimanna butta, buttini hunda

gulubi Yessuusike summike ulfinni'a gulufaantaan.

11 Duuchchiingi Mageno anna ulfeessiyyotee

«Yessuusi Kiristoosi Goottaken» hina'ni

afo'i ifikenni lallabaan.

12 Tennexxee anke jaaluwwa duuchchi wodda ajajendinaashshanni ta'anna ani ha'no bira hedhene wodda calla kaddebaak caala ta'a hedhebe'noxxa yanna soda'atinna culphisat anjirema ha'nooxxa muuxxe. 13 Isixxe eloxxe fedhiishsha hediyyotanna muuxiyyo ha'no uwweexxi ha'no giddo hujaak Magenoken. 14 Heene yaanenna aallattinebaangi morondineebaak asse. 15 Tinninna tenne shokkotixxenna fuggoxxe ila giddo shookishshaaxxanna ci'minaachcho affinebaaxxe ca'itte Mageniinxe oose kaddineexxi tenne butta duuchcha'n urjetishsha xassitinaashshaten. 16 Hedhotika hiyyichcho jabeessitineexxi abixxitinaa wodda tola gonge'ebe'noxxa yookaan tola elo'ebe'noxxa Kiristoosixxe barra'n ifi saadannoxxe ani'a kaddaan. 17 Yaane kinni ha'nooxxe amanaxxe tolchema'ninna ergatensha hana ani ha'watike tolchishsha dhangale'e midde ha'no duuchchingeninni welt gammadannon, gammashsho anxanna lassanno. 18 Ha'noonna iittanni aninni welt mitteba lumoshsha gammadde.

19 Ha'nooxxe laqennexxi gammadanno'a Ximotoosi ha'nooba rake ergatee Gootta Yessuusi'n addatannon. 20 Ha'nooxxe anjirenshaxxe dhugaati hedaak isishsha hedheeka wele manjo afebe'no. 21 Wele duuchchi Yessuusi Kiristoosixxe kaddebaang ififixxa halcha wonshedhatee gongaakeeran. 22 Yaane kinni belt anna ifike ergatemammashsha Ximootoosi aninni welt wengeele ergateme ayyumma ifixxa kokeesseexxa ha'noo ergatemeedheen. 23 Yoona anxi yaane hitta kaddaaxxa wo'menechchi uduma isoo ha'noobaa ergannoxxa addataannen. 24 Aninna umo angeninni rake dagannoxxa Goottake'n addateennen. 25 Iittanni dayyo anka, hujeti woddika jaalonna aninni welt loliinke manjo kadeexxi anee haasissaaxxe yaane duuchchinni gargaraashsha, ergitineemmaka dayyo anka Ephafirodituusii'i ille iima hisse'e ha'nobaa erga hassissa'neexxe kaddeexxa afeennen. 26 Isi ha'noo duuchiinga halcheen; elgonphe isixxa ha'no laqinemmaxxeenna isi wixxi hiyye. 27 Dhugaateni elogpheexxi reyotee shiqe'emman; Mageni kinni marareexxi isoo fayyisat iso calli'ate kaddebaang yaaddonde'n yaaddo ane'ni lebendabaashsha ani'anna marare. 28 Tennexxe isoo langaxxa uuddinaa wodda gammaddino'anna anxi yaaddonna shollexxo'a isoo ha'nooba ergonnaa yo'oshsha hedeennen. 29 Yoona wo'ma gammashshonni Goottik summi iso'o adhdhe; isishsha hedheeka mannanna ulfeesse. 30 Isinna ha'noo ani'a assa dandeettinabaaxxa ergatensha wonsho'a hedho ifixxa midde mararebaangi Kiristoosixxe hujexxe buuto'a reyo shiqeemman.