1 Tennexxe ha'no eeyyannekenna halchaanneke anke dayyuwwa, anxe gammashshonna anke kallachcha kadineeke, iittann anke jaaluwwa, konnee qico'ni Goottake'n ti'ntine uurre.

2 Goottake'n mitte qalbenni he'naashsha Ewwodiyaa kadhatannen; Sinxikisinna kadhateennen. 3 Ee, ati koo addatendeettek anke hujetike jaaloo, wengeele ba'lisat ga'mii'ni aninninna Qeleminxoosinni welt iittanni summi insa'neke hedhotike maxaafa'n borreme'eke wele anke hujetike jaaluwwinni welti ciichchiteexxe tenne melaalle gargaartattoshsha ate'e kadhataannen. 4 Duuchchi wodda Goottake'n gammadde; higgeenni hiyya'nenni gammadde. 5 Ba'lunte ha'nooxxi duuchinge'n ege'nedeexxe kaddowwaal; Gootti shiqo hedheen. 6 Yaane duuchchanni, soodachchoti, qortumakenna galata Magenoke shiqisse malee mitte yaane'ninna wixixxi hitinoqqe. 7 Manjiinxe qalbeefachcho iimi darre kadeeke Mageniink nage'i qalbe ha'nooxxanna yaado ha'nooka Yessuusi Kirsitoosi darre'n heqqaan. 8 Muuxamake'ni yoona anke dayyuwwa dhugaate kaddeexxa yanne duuchcha, ulfaatteexxa yaane duuchcha, toggi hiteexxa yaane duuchcha, luqqitte yaane duuchcha, eeyyendeexxe kaddeexxa yaane duuchcha, eloxxe kaddeexxa yaane duuchcha, elletanna kaddoole yookaan galata, iitta tennerishsha hexxeexxa yaanuwwa hedde. 9 Anenaa'n barattinemmaxxa yookaan adhdhitinmmaxxa, laqqinemmaxxa yoojkan, uuddinemmaxxa, heene yeeneeranna asse; iikki nage'iinki Mageni ha'nonni welt hedhaan.

10 Heddo yanna uduma haarook yaadinni anxee heddiyyo safinemmaxxe Goottake lumooshsha gammdaannen; dhugaaten, hujeti leellishate kaddaaxxa yanna afineemabaa malee hediyyo ani'a heddina'ninni hexxinemman. 11 Tenne hiyyanechchi ani rakkatennexxetebaan; tinninna heene yaane'ninna afeechchi anee geyeedheen hiyya barateennen. 12 Gophatanna ege'neennen; alfatanna ege'neennen; goddoonolenna solo'oonolenna alfoonnolenna gophoonnole, heene yanna'ninna kaddo heene yaane'n giddonna afenneechchi anee geyeedheenni hiyyatixxa buqo yaane wo'meennen. 13 Hunna ani'a uwwake, Kirsitoosi darre'n duuchiinxa assa dande'annon. 14 Kaddo malee anxa rakko aninni qoodendinemmaxxe eloxxe assitineen. 15 Tenne irra ha'no koo Filiphphisiyuusika manna ha'no egendinemmashshanni sirete'n wengeele adhdhitinee wodda Maqedooniyinaa'n ke'anno wodda ha'noo gadhi darre uwwatinna adhdhatixxe hujjenni hiini Mageniinxi tuuttanna aninni welt hujjebaa. 16 Teseloonqe hedhaanna wodda midde anxe rakkoxxa yanna higgeenni ani'a gargaarsa ergitineen. 17 Kuninna tenne uwwaxxi gumma ha'no'a bira saxxe me'ito'ate malee eettene uwwa ani halcheetebaan. 18 Ani'a hasissaaxxa duuchchanna, ani'a hassissaaxxi iimi darrenna adhdheennen; eettene ergitinemmaxxa uwwa wo'ma qicinni Ephafirotuusinaa'n adhdheennen; tinninna fishshe isixxi xe'miteekenna Mageni edo adhdheemeekenna gammachchiisaake tolchishshaten. 19 Mageni anki ifixxe durummaxxe qixxe'n ha'o'a hassissaaxxa duuchcha Kiristoosi Yessuusi darre'n ha'no'a wonshaan. 20 Anna no'okenna Mageno no'okee duuchchi woddinaa'n duuchchin woddi'a ulfinni isi'a kaddowwaal. Ameen.

21 Woyyoole duuchchi'a Kirsitoosi Yessuusinni nage'a anka insa'ne'a geesise; aninni welti hexxeexxi maganne dayyuwwinna naga'a ha'no'a shiqinshaannen. 22 Qulliyye duuchchinna, giddi'ninn Qeesaarike mini haddike manni naga'a ha'no'a shiqinshaann. 23 Gootta Yessuusi Kiristoosik badhaadhi ha'noon welti hedhowwaal. Ameen.