1 Nenewexxe ba'nexxe'e kulemeeke hiyyichchixxe; Elqooshichcho Nahoomixxa leella kulaaki maxaafi konneten.✝

2 Duuchchi Woddiki Gootti hinnaatichchakenna halo fulaake Magenon;

Duuchchi Woddiki Gootti jabaxxe mufe ifixenni naapha ifike'ninna bala itti ibisaan.

3 Duuchchi Woddiki Gootti ossalloke; hunna isixxinna lumoxxen; yaane kinn

Duuchchi Woddiki Gootti balleessanjo xixebaak waalabaan;

Isinna hobonbalte giddonna danbala'i giddo ora afe'een;

duumachikinna isixxe lekkaxxe bukon.

4 Isinna Abbayya xixee bassaan;

wodu'uwwa duuchchannna xo'o assaan,

Baasaninna Qermeeloosi qoorraan;

Libaanoosik daraaruwwinna harca'aan.

5 Koobuwwatinna isi edo linqisse;

tullichchuwwikinna isi edo baqe;

Bogikinna isi edo;

Buttatinna isi giddo hedhaachchi duuchchi lele'me.

6 Mufe isixxi edo ayyete dande'e uurra?

Jabbaxxa isixxa aare ayyete ba'edha dande'a?

Aare isixxi giiruffa dunde'een;

rassuwwatinna isi edo hacaqqi hitee xexxeerendaan.

7 Duuchchi Woddiki Gootti eloken;

rakkotixxa barranna gollaken;

Isoo'o amanaakeeri'a xexxe'ataan.

8 Nenewwe kinni

Birasa'eeke lola'inni balleessaan;

naapha ifikanna dukkana giddi'a shorraan.

9 Insa'nenna Duuchchi Woddike Gootta'n jallinoole,

isi ballesaan;

rakkotinna langaxxa kexxabaan.

10 Insa'ne utete'n sagaremmaan;

ifixxe woyinetixxe booka'ninna machchoonaan;

giiratinna insa'nee huuriinsha ittaan.

11 Tee Nenewwe! Duuchchi Woddike Gootta'n jallataakinna,

fuggoxxeenna mari'achisaak,

ati giddii'ni ke'eedheen.

12 Duuchchi Woddiki Gootti hiyya'nee qici,

«Insa'ne fedhee qiconna hunnaameeyyetenna jirake kandoolenna,

kuttemmaan; ba'naan;

Koo Yihuda konneechchi edo atee wixixxi assoonnolenna,

konneechchinni edi'aa atee wixixxi assabo'non.

13 Ta'anna qanbara insa'neka gooba atikenaa'n enqannon;

usurende'etteka haachchabanna tanshe hunannon.»

14 Tee Nenewwe Duuchchi Woddiki Gootti atixxee'e hiyye ajajee qici,

«Summa ha'nooka e'yisaaxxa ila affinabaan;

Ha'nooke magenoonfachchotike mine'ni hexxeexxa fakkuwwa,

baqisende giisendeexxa misilluwwa bakka balleessannon;

Ati fuggichchake kaddettaxxe'e

ati'a moogiinxa bakka qixxeessannon»

15 Kunse eloxxa odo iyyedagaak,

nage'akanna lallabaake manjiinxi lekka,

koobuwwate'n hexxeen;

Koo Yihuda ayyaanuwwa atika ulfeesi

werreegga atikanna muuxi;

Ta'anni edi'a fuggaalleeyye atee'e injifattabaan;

insa'nenna hara ba'naan.✝