1 Mundiinke qachchi'a aanne'e;

dharik,

Mulqeca ise giddo wo'mite'eeken;

mucuqedha ise giddo gophende egendebaan;

2 Jiraafetik hafuur,

moluwwatixxi kakawweette,

Qolchiinke fadhaduwwikk hirbi,

sarageeluwwiink hafuurinna laqemeedheen.

3 Fadhado gulufemmak manni edi'a guulaan,

wolaantichchi cala cala hiyyaan

bagedi wara wara hiyya

Heddi manni reyemmaxxee,

renshi insa'neekinna tuulemedheen;

Renshuwwiinxe birasa'nenaa'ni kexxeexxa,

ookkone ora sa'aak manni hedhebaan.

4 Kunnichchi duuchchi kaddeechchi hara quba saxxeexxen,

dedhissaaxxenna gojaameette kaddeexxixxe yababultoxxe buutonniten;

Ise ifixxe yabaabullenn gosa gosaka arduwwa,

moro ifixxeninna arduwwakanna garbake asseexxeeten.

5 Dada duuchchik Lumok Duuchchi Woddik Gootti hiyya'nee qici, «Ani ate'ni naaphe ke'eennen»

Seemma atixxa iimi'a atike albiqico'ni quncisannon.

«Atixxa duwwi gatanna gosa gosake arda'ni farrassannon;

saala atikanna moyanjuwwake'n leellishannon.

6 Kora ate'ni dunannon;

tuffatendattoshsha assannon;

ceeggatendattoshsha assannon.

7 Atee uudeeki duuchchinna atenaa'ni baaja'ni;

‹Nenewe diigende'een ayyete ise'aa oodhaa?› hinaan;

atee dayyeessaaka habaa'ni afanno?»

8 Ati abbaayike galaana qarqara'n hexxemmaxxe,

wodi'ik buqendemmaxxee,

No'i, Amoonii'n caaldatto?

Ise'a galaan gollake,

wodi'ikinna ise'aa gimoten.

9 Tophyikinna Gibtsee gabala affebaaxxe isexxe hunnan,

Fuuxinna Libiya iseke gargaarsanjuwwamman.

10 Kaddo malee'e ise booji'ende;

Shorrendenna me'ite.

Weldeenna weldeennande'ni,

annoole isexxi dayende;

Hayyoole isexxe'ni hixi iblseme;

isek jajjabi manni duuchchanna haachchabik usurende.

11 Atinna kinni machchoottatton;

suuqendatton;

naaphakenaa'ninna gollatatee halsitatton.

12 Atixxi wolo'uwwa duuchcha itematee shiqqeexxe,

umiinxe balasettixxe gummuwwashshaten;

Lellemisendaaxxa yanna,

itti gumma italiinke afo'ni ibbaan.

13 Kunse atik loliink manni duuchchi

melaalleten;

Atike bogixxi huluwwanna,

atike naaphuwwi'a benqe hitee bande'een;

isika cufanuwwanna giira itte'een.

14 Buqematixxee wode ikki'li;

golluwwa atikaranna jabeessedhi;

Faariinka buttina halsi;

dhoqqetanna hirbeessi;

xuubetanna qabadi.

15 Ookkonna ate'e giira ittaan;

wolaantichchikinna atee woxxaan,

awwaanessiinshanna ate'e tuuqataan;

Shiixxaramma awwaanessishshanna faqi;

lumola awwaanessishshanna hori.

16 Iimixxe urjuwwa caala bira saxxaa qico'ni,

atike daddaliinke mannika laakkossa bira sa'isitette;

Ookkonee boga kinni iawwaansinsha inde ca'a assine

ookko'inna phirri hine me'ine.

17 Atik heqqanjuwwinna awwaanessiinsha,

atik ja'laabuwwinna boojjetixxa barra,

dalla'i giddo qubantammake shiixaramma awwaanessishshaten;

Isi'aanna arishsho fuldaa wodda phirri hine me'inaan;

haba gennaaxxa ege'nemmabaan.

18 Koo! Asoorike moyanjo atixxi allalisano mugge'een;

atiki jalqabuwwi sammi hiyyee diipheen;

Atiki ardi bukki assaaka gopheexxi,

koobuwwate'ni xexxereme'een,

19 Atixxa mada fayyisa dande'aak hedhebaan;

enqeshsha tixxinna reyotee gesisaaxxen;

Atixxe'e laqeeki duuchchi

atixxe iba'ni gammadee calaani;

atixxe mararte beloxxe hujenaa'ni baaje fuleek manji ayyete?