2 Masagiti 16

Zuda masagi Aɠaze

1 Lemalia ná-doun zunui Peka ná-kona puugɔ maazu lɔfelasiɛi (17) ma masadai zu Izilayɛle unda, Yotame ná-doun zunui Aɠaze zeini Zuda unda ga masagi. 2 Aɠaze ná-konagi ɠɛni ga puufelegɔ (20), siɛgi zu é zeini la ga masagi. Kona puugɔ maazu lɔzita (16) ɠa é kɛɛni masadai zu Zeluzalɛme. É la ɠɛni ná-GALAGI, Ɠɔoɠɔ GALAGI yiima vaa ɠɛɛni, eɠɛʋelei mɛmɛwola Davide kɛɛni la. 3 É ziɛ ʋele ɲɔuni ga Izilayɛle masagiti kɛʋele. É ná-doun zunui vɔlɔ ɠulani ga gala zalaɠai kɔɔɠɔ ganigiti bɛ, é ʋilɛ kɔzɔba vaiti polu niiti zii ɠiligiti ti ɠɛni kɛɛzu, niiti Ɠɔoɠɔ GALAGI ti ɓɛɛni Izilayɛle luɠɔ, é ta-yooi ve zea. 4 É ɠɛni zalaɠaiti kulazu ta é ɗa ansansegiti gala zalaɠa ɠula adaʋɛti, ta gizeiti unmaʋɛti, naa ʋɛɛ gulu wunduiti pɛ bu.

5 Naazu Siili masagi Lesin ta Izilayɛle masagi Peka, Lemalia ná-doun zunui, ti ʋaani, ti kɔɔi vala Zeluzalɛme ʋa. Ti Aɠaze zeini kɛlɛ su, kɛlɛ ti la ɠɛni ziɛni bu. 6 Naama ziɛgi nɔ zu Siili masagi Lesin Elate taa wolai zoni, é dɔ Siili masadai ná-zobogi wu, é Zuda nuiti kula Elate ʋa, é ʋa ga Edɔme nuiti, ti zei ná, ná ɠa ti ná zaaɠaza. 7 Aɠaze keela leʋeni Asiili masagi Tigilate-Pilezɛɛl ma, é ɠɛ ma: «Nà ga ɗa-wotiɠɛ nui ta è-loin, naa ma, ʋa, è kìzo Siili masagi yeei ma ta Izilayɛle masagi yeei, niiti ti kɔɔi valaai bà.» 8 Aɠaze wali ta zanugiti seɠeni, ti ɠɛni Ɠɔoɠɔ GALAGI zei ʋɛlɛi ma naavolo makɛsuʋɛ ta masa pɛlɛi ma naavolo makɛsuʋɛ, é ti leʋe ga sabaliʋai Asiili masagi ma. 9 Asiili masagi woiloni goo ma, é lɛɛni Damase laalɔɠɔma, é ná zo, é li ga ma nuɓusɛiti Kiil duɔlai zu, é Lesin ʋaa.

10 Masagi Aɠaze liini Damase Tigilate-Pilezɛɛl laaɠomi su, é zalaɠa ɠulazuʋɛ ʋɛtɛni nii é ɠɛni taazuʋɛ, é ma ɠazaʋigi leʋeni zalaɠa ɠula nui Ilii ma, ta ma zeikpasui kpein. 11 Zalaɠa ɠula nui Ilii zalaɠa ɠulazuʋɛ ta ɓɛtɛni ga ma zii nɔ, ʋelei nɔ masagi Aɠaze yɛni la Damase, é teʋe ma. É ɓeni ga kpɛtɛ pɛ masagi ʋa ɠale ma, é zeɠe Damase. 12 Masagi zeɠeni Damase, é zalaɠa ɠulazuʋɛ ɠa, é maaɓuɠa ná ʋa, é lɛ ga. 13 Tɔ ɓɔɠɔi é ná-gala zalaɠai ɠulani, naa ʋɛɛ ná-vebɛ zalaɠai ʋa, ta puya zalaɠaiti, é ziilɛi zalaɠaiti kula, é ma ɲamai ʋili zalaɠa ɠulazuʋɛ ma. 14 Zalaɠa ɠulazuʋɛ nii togai ga kɔlu ɓɔigi ga Ɠɔoɠɔ GALAGI nɔnɔi, é naa ɠulani tosuʋɛ Ɠɔoɠɔ GALAGI zei ʋɛlɛi ta zalaɠa ɠulazu niinɛi ti yɔɠɔzuʋɛ, é to zalaɠa ɠulazu niinɛi ɠoba lɛkpɛma maazu ʋelei.

15 Masagi Aɠaze niima levei veeni zalaɠa ɠula nui Ilii ya, é ɠɛ ma: «Za ʋoluma, zalaɠa ɠulazu wolai nii ɠa niina maanɛai è ɗa gala zalaɠai ɠala ma sobu ɠilagila, ta kpɔkɔ zalaɠaiti, masagi ná-gala zalaɠai ta ma vebɛ zalaɠaiti, nuɓusɛiti ta-ɠala zalaɠai ta ma vebɛ zalaɠaiti, ta ta-ʋuya zalaɠaiti, suai niiti kpein ti ɠulazu ga gala zalaɠai ta zɔɔma zalaɠaiti, è ɗa ti ma ɲamaiti pili zalaɠa ɠulazuʋɛ ma. Niima é ga zalaɠa ɠulazuʋɛ kpɛtɛai ga kɔlu ɓɔigi, nà ɓɔɠɔi nà deve wosu é ʋilɛ naa ʋa» 16 Zalaɠa ɠula nui Ilii masagi ná-devei kpein soni, é kɛ.

17 Masagi Aɠaze Ɠɔoɠɔ GALAGI zei ʋɛlɛi ma ɠɔlu ɓɔi wotoloiti ma ɠɔlu ɓɔi sɛpɛgiti suɠaleɠaleni, é ma tazaiti kula Ɠɔoɠɔ GALAGI zei ʋɛlɛi ma ɠoizuʋɛ, ziɛ liɠi wolai nii é ɠɛni zeini kɔlu ɓɔi nikɛiti kɔma, é naa ɠula ná, é sei zooi ma kɔtuiti ma. 18 Naa ʋoluma Asiili masagi ná-nɛɛbɛi maaʋele ma, é dooɠo foloi ma ʋɛlɛi ɠoloɠoloni, nii toga ɠɛni de Ɠɔoɠɔ GALAGI zei ʋɛlɛi ɠoozuʋɛ, ta poluʋelei masagi lɛɛzu ʋelei.

19 Aɠaze ná-kɛɛwotii mɔtaiti, naati sɛʋɛʋɛ Zuda masagiti ta-ɠɛɛwoti zɛʋɛi zu. 20 Aɠaze zaani. Ti maaɠuluni mɛmɛwolani ta-ɠabamaʋɛ, Davide ná-taa wolai zu. Ná-doun zunui Ezekiase ɠa é masadai ɠɛɛni potogi zu.