2 Masagiti 5

Elizé gee nui Naaman ɠɛdɛ fai

1 Siili masagi ná-kɔɔɠuluɓai Naaman ɠɛni masagi yiima nui, unfema wola ɠɛni bɛ, mazɔlɔɔ tɔ ɠa Ɠɔoɠɔ GALAGI Siili nuiti unmɔɔni ga maaʋele. Kɛlɛ ziilɔɔ ɠɔɔɠuluɓai naa ɠɛni ga gee nui. 2 Kɔɔɓɔgi tanigaa ti zeɠeni Siili yooi zu, ti li Izilayɛle yooi zu, ti ʋaani ga anzanu loungo ɠila ga kɔɔ luɔi. Niima ziɛgi zu, é ɠɛ botii ɠɛɛzu Naaman anzai ʋa. 3 Anzanu loungoi ɠɛni ná-duɔ dee ma: «Ee! Ni màliɠii a la liina nɔ Samali GALA goo wo nui ʋɔ bɛ, naa a la zoo é ná-geei zeɠe ba.»

4 Naaman naama wooiti daazeelini masagi ma, niiti Izilayɛle anzanu loungoi ti woni. 5 Siili masagi ɠɛni ma: «Naa ʋagɛ, liina, nà sɛʋɛ ɠɛɛzu, gè fe è ya, è lii la Izilayɛle masagi ʋɔ.» Naaman ʋilɛni pelei ma, diizuʋɛ é liini ga kilo unsaʋagɔ (300) walii zu, ta kilo ʋuulɔzita (60) zanugi zu, naa ʋɛɛ seɠe niinɛ puugɔ ʋa. 6 Seeliai ma Samali, é sɛʋɛi veeni Izilayɛle masagi ya, nii é zɛʋɛni su ga: «Ɗa niima ɠeela wooi zɔlɔɔsu é ɠula nà-kɔɔɠuluɓai Naaman ya, nii gè teʋesu è ma ga è balo, è kula ná-gee zeeɓɛi zu.»

7 Izilayɛle masagi sɛʋɛi naa zu vai ɠwɛɛgai ma, é ɠɔba zeɠeiti balini ga kidaaʋiligi maaʋele ma, é ɓain, é ɠɛ ma: «Nà ɠa gè ga gala ɓaa? Ɓaa zobo ka é bɛ̀ ɓaa zɛnvui ta saai ma, zunui nii liizu gee nu leʋesu mà ga gè kɛdɛ? À gaaɠa ga kpɔɛi ɠa nii gaiziɛzu pɔ̀.»

8 GALA goo wo nui Elizé mɛnigai ma ga Izilayɛle masagi ná-seɠeiti baliʋɛ ga, é wooleʋeni ma, é ɠɛ ma: «Lee vaa zu è ɗa-zeɠeiti balizu ga? Zunui tɔna teʋe mà, toɠa kwɛɛ ga GALA goo wo nu ɠa Izilayɛle yooi zu.» 9 Naaman ta ná-sooiti naa ʋɛɛ ná-wotoloi ʋa, ti liini, ti lo Elizé ná-pɛlɛlaʋɛ, é ɗa naa maaɓɔun. 10 Elizé keela leʋeni ma, é ɠɛ ma: «Li, è maagba Zuludɛn wu ga dɔfela, ɗa ɠɛdɛ ta ɗa ɲade fo.»

11 Naaman yiiɠaawanani, é ɠale ma, é ɗa ɠɛ ma: «Gè ɠɛa ɠisiɛzu ga zunui tɛi ka ɠulazu tɔ ɓɔɠɔi, é lo ʋɛ, é ná-GALAGI, Ɠɔoɠɔ GALAGI maanɛɛnɛ, naa ʋolu é yeei leʋeteʋe adɛ naa maazu ʋɛ seeɓɛi ná ʋa, é bàlo gee zeeɓɛi nii mà. 12 Damase ɗɛiti, Amana ta Palepaal ti la vizɔni Izilayɛle ɗɛiti kpein ba, ɓaa? Gè la ɓena zoo gè maagba miná, gè ɲade ɓaa?» É ɠaleni ma ga ziiɠaawanai. 13 Kɛlɛ ná-botiɠɛ nuiti ti maaɓuɠani ba, ti ɠɛ ma: «Ni GALA goo wo nui nii faa ɓaaɓa boni è ma, màliɠii, è la ɓena kɛ ɓaa? Ni tɔun é ɠɛa è ɓɔɠɔ maagba, naa ɠɛ, è ɲade.»

14 É yeini naazu ziaʋɛ, é lɔ Zuludɛn wu ga seizu lɔfela, ʋelei GALA goo wo nui boni la ma, kɔlɔgi lounni ma eɠɛ doungo, é ɲade fofo. 15 É ɠaleni ma GALA goo wo nui ʋɔ bɛ, ta ná-siɛpoluiti pɛ. Seeliai ma, é ɓɔɠɔ lɛɛni ga naa, é ɠɛ ma: «Gè kwɛɛga niina ga Gala kili ge la eteai zu, ná tanɔpɛ, é ɠula Izilayɛle ná-GALAGI ʋolu. Nà è maanɛɛnɛzu niina, yeezei vebɛanii nii wu, gè feezu è ya, nɛ̀i gè ga ɗa-wotiɠɛ nui.» 16 Elizé gooɠaaʋoteni, é ɠɛ ma: «Gè ɠonaa Ɠɔoɠɔ GALAGI, Fai-Pɛ-Maliɠii ma, nii é vulua, nii gè dɛbizu, ga gè la ani nɔpɛ soga.» Naaman ɓɔini da, kɛlɛ Elizé la ɠɛni kɛɛni pɛ.

17 Naaman ɠɛni ma: «Tɛi è ɠɛ ɓa, va bu ɓalaa gè ɗa-yooi ma ʋɔlɔi ta zeɠe, nii a ɠɛ ga soovale fuulu felegɔ ɠasɔ, gè lii la, mazɔlɔɔ nɛ̀i gè ga ɗa-wotiɠɛ nui, gè la pɔ ga gè gala zalaɠa ɓaa zalaɠa nɔpɛ kula gala kili bɛ, kɛni Ɠɔoɠɔ GALAGI. 18 Kɛlɛ Ɠɔoɠɔ GALAGI soma, é sùvaayɛ ga siɛgi zu màliɠii lɛɛzu la Limon zei ʋɛlɛi wu ga é nɔkɔ bu, kɛni nɔ gè nɔkɔ Limon zei ʋɛlɛi wu, mazɔlɔɔ toɠa ɗa ʋoluzei zèei ʋa. Ɠɔoɠɔ GALAGI ɗa-wotiɠɛ nui zuvaayɛ ga naama ɠɛɛwotii» 19 Elizé ɠɛni ma: «Li, ziilɛigi ɠɛ è ʋɛ.» Naaman zeɠeni koba, é li.

Geyazi ná-faaɠaazagi

Naaman la ɠɛni dɛ liini ɠoozama, 20 GALA goo wo nui Elizé ná-botiɠɛ nui Geyazi ɠɛ ɓɔɠɔ ma: «Màliɠii la kɛɛni, é ʋa yeezei ani tanɔpɛ bu, niiti Siili nui Naaman feai zea. Gè ɠonaa Ɠɔoɠɔ GALAGI ma, nii é vulua, nà ɓizɛzu polu, gè ani zɔlɔɔ zea.» 21 Geyazi ʋilɛni Naaman ʋolu ga kpizɛi. Naaman kaai ma ʋoluʋelei, é ɠulani ná-wotoloi zu ga gaazuvilɛi, é ʋilɛ zooi ma, é daaɠomi, é ɠɛ ma: «Toɠa ɠale mu?» 22 Geyazi gooɠaaʋoteni, é ɠɛ ma: «Ma ɲɔu nɔpɛ ge la ná. Màliɠii ɠɛɛʋɛ nɔ, gè bo è ma ga GALA goo wo nuiti ta-ɠaladopo felegɔ ʋaa nɔ ɠa feya pɔ̀ bɛ, ti zeɠe Efelayime ɠize yooi zu, naa maaʋele ma, è soma è kilo ʋuusaʋagɔ (30) ve zèa walii zu, ta ɓɔɠɔ maavalibo seɠe felegɔ ti ma vaa ma.»

23 Naaman ɠɛni ma: «Nà è maanɛɛnɛzu, soma è kilo ʋuulɔzita (60) zeɠe.» É ɓɔini da, é walii kilo ʋuulɔzitai (60) ʋu ɓɔlɔ felegɔ zu, ta ɓɔɠɔ maavalibo seɠe felegɔiti, é ti ve ná-botiɠɛ nu felegɔ ya, ti seɠe Geyazi ʋɛ. 24 Ti zeeliai ma gizei ma é taa lɔɔʋɛ, Geyazi kasɔiti kulani ti ya, é lɛ ga sɔɔlaiti ná-pɛlɛi wu, é zunu felegɔi naati gaaɠale ma, ti ɗa li.

25 Naa ʋoluma é ɠaleni ma maliɠii ʋɔ bɛ. Naa gaazaɠa, é ɠɛ ma: «Mini ɠa è zeɠezu ná, Geyazi?» Geyazi gooɠaaʋoteni, é ɠɛ ma: «Gè la ɠɛa liini ada nɔpɛ.» 26 Kɛlɛ Elizé ɠɛni ma: «Ɗa kaazu ga nɔ̀un zɛnvui la ɠɛa è ʋolu ɓaa, siɛgi zu zunui naa ɠɛa ɠulazu la ná-wotoloi zu, é ɗa ʋa è laaɠomisu? Toɠa è ɠisu ga yeeɠɛɠala ɠa ga nii ɓaa, nii nu ɠa yeezei su walii ta seɠeiti bu, wolive ɓelei ta leezɛn ɓeleiti bu, togani ʋɛlɛʋɛlɛgi ta ma ɓaazagiti bu, botiɠɛ zunuiti ta anzanuiti bu? 27 Naaman ná-geei ɠa ʋɛɛzu è ʋa, ta è-mavofodai ʋa eyɛsu ɠɔ.» Geyazi zeɠeai ma Elizé ʋɔ bɛ, geei ʋɛɛni ba, é ɠole eɠɛ kobegi.