Ezekiyɛle 12

Kula zou ʋa vai ma ʋoogiti

1 Ɠɔoɠɔ GALAGI ɓɔɛni pɔ̀, é ɠɛ mà:

2 «Ɗa ʋe, zunui, ɗa zeini nuɓusɛiti saama, ti ɠaazulɛai. Gaazuɠɛzɛi ɠa ti ʋa ga ti wozaɠa, kɛlɛ ti la wozaɠaazu pɛ, goiyeɠei ɠa ti ʋa, ga ti faa mɛni, kɛlɛ ti la faa mɛnisu pɛ, tɔɔzei ta ga gaazulɛɛ nuɓusɛiti. 3 Ɗa ʋe, zunui, kula zou ʋa ɠasɔi ɠɛʋele ɓɛtɛ ɓɔɠɔ ʋɛ, è ɗa-ziɛi ɓɛtɛ kɛlɛmaʋɛ, nui pɛ gaazu. Ʋɛ è zeini ná, zeɠe miná, è li ada ɠili. Naa ɠɛ ɛsɛ pɛ gaazu, tanisu ta gaaɠa naazu ga ta ga gaazulɛɛ nuɓusɛiti. 4 Ɗa-ɠula zou ʋa ɠasɔi ɠula foloi ti ɠaazu, ɗa ɓɔɠɔi è ɠula kɛlɛmaʋɛ ti ɠaazu kpɔkɔi, è ɗa li, eɠɛʋelei kula zou ʋa nui a ɗa lii la. 5 Ɗa ɗa-ʋɛlɛi ma ziɠigi ʋaaɓota ti pɛ gaazu, è ɗa-ɠasɔiti kula ma yeɠei zu. 6 Ɗa kasɔi la ɠɔma ti pɛ gaazu, è ɠula la kpidii zu, ɗa ani ʋɛɛ ɠaazu, è mina wɛlɛ zooi ʋa. Mazɔlɔɔ nà pɔ è ɠɛ ga poogi Izilayɛle nuiti bɛ, é ʋilɛ naa ʋa, nii é ʋaazu ɠɛɛzu.» 7 Gè naa ɠɛɛni, nii Maliɠii deveni mà. Gè kasɔi ɠulani kɛlɛmaʋɛ, eɠɛ kasɔi nii soloogai kula zou ʋa nui ma. Kpɔkɔi gè siɠigi ʋaaɓotani ga zèei, gè kasɔi ɠula kpidii zu, gè da ɠɔma nuiti pɛ gaazu.

8 Poluma zobui, Ɠɔoɠɔ GALAGI ɓɔɛni pɔ̀, é ɠɛ mà: 9 «Ɗa ʋe, zunui, Izilayɛle nuɓusɛiti, gaazulɛɛ nuɓusɛi tɛiti, ti la è ɠaazaɠani ga: ‹Leeni ɠa è kɛɛzu?› 10 Ɠɛ ti ma: ‹Maliɠii Ɠɔoɠɔ GALAGI nii ɠɛɛʋɛ ga tɛnɛ gooi, kundiɠii ʋɛ é Zeluzalɛme unda, ta Izilayɛle nuiti bɛ ti zeini ná.› 11 Bo ti ma ga, è nii ɠɛɛʋɛ, é ɠɛ ti ʋɛ ga poogi, naa ɠa é ʋaazu ɠɛɛzu ga tiye, ta liizu ga tiye Ɓaɓilɔne. 12 Zɔi é ti unda ga kundiɠii, naa ɠa ná-kasɔiti da ɠɔma kpidii zu, é ɠula taai ʋa. Ta zeɠei wɔ siɠigi ʋa, é ʋa ɠula ná. Toɠa ani ʋɛɛ ɠaazu ga é mina zooi zu ɠa. 13 Nà nà-tumɔi lɔ unga, toɠa ɠɔ ga nà-balii, nà lii la Ɓaɓilɔne, Kaledé nuiti ta-yooi zu, é la naa ɠaa ga ɠaazuʋɛ, kɛlɛ ná ɠa a za ná. 14 Nà maaɠoolii ma nuiti pɛ faza mini-o-mini, makɛ nuiti, ta ná-kɔɔɠɔ nuiti, naa ʋolu gè ʋilɛ ti ʋolu ga nà-boɠa zɔkpɔi. 15 Ta suɠwɛɛ naazu ga nà ɠa gè ga Ɠɔoɠɔ GALAGI, siɛgi zu nà ti vazana da zii ɠiligiti saama, siɛgi zu nà ti zuvaza da zou ɠiligiti su. 16 Anɛɛ naa ʋe, nà zunui tanigaani zɛ ná, ti ɠula kɔɔi zu, ta pului, ta ɗɔfɔ zeeɓɛi. Naati ka ta ɠɛ kɔzɔba vaiti bosu ziiti saama, ʋɛ ta li ná. Ta suɠwɛɛ naazu ga nà ɠa gè ga Ɠɔoɠɔ GALAGI.»

17 Ɠɔoɠɔ GALAGI ɓɔɛni pɔ̀, é ɠɛ mà: 18 «Ɗa ʋe, zunui, ɗa è-ɠɔnɔgi mi ga sasuɓalii, è ɗa-ɗɛi ɓɔle ga dualuagi ta ziizoolɛi. 19 Ɗa bo zooi zu nuɓusɛiti ma ga: ‹Maliɠii Ɠɔoɠɔ GALAGI wooi ɠaa é wosu Zeluzalɛme nuɓusɛiti ma ti zeini Izilayɛle yooi zu: Ta ti-ɠɔnɔgi mi dualuagi zu, ti ta-ɗɛi ɓɔle ziizoolɛi zu. Mazɔlɔɔ ta-yooi ɠaaɠaalɛi, é ʋala gaa aniiti pɛ ma, tɔɔzei zou nuiti ta-lopele ɲɔi ʋa. 20 Taa wolaiti su ɠa wo ga nuɓusɛiti, dɔɓɔi zu ɠɛ ga teʋebai zu. Wa suɠwɛɛ naazu ga nà ɠa gè ga Ɠɔoɠɔ GALAGI.› »

Maliɠii laawooi ɠa ʋilɛ su

21 Ɠɔoɠɔ GALAGI ɓɔɛni pɔ̀, é ɠɛ mà: 22 «Ɗa ʋe, zunui, faalaalii ɓɛgele ɠa ga nii é wo la Izilayɛle yooi zu ga: ‹Yeeɠɛɠalai ɗa leʋe, kulakɛlɛma ɠila kpalaa ge la ɠɛɛzu›? 23 Bo Izilayɛle nuiti ma ga: ‹Maliɠii Ɠɔoɠɔ GALAGI wooi ɠaa: Nà naama vaalaalii ɓe, nu la mɔ ta woga Izilayɛle yooi zu.› Ɠɛ ti ma tɔun: ‹Yeeɠɛɠalai maaɓuɠaa, yeei kulakɛlɛmaiti pɛ ti ʋilɛsu su la.› 24 Mazɔlɔɔ zɛɛ ɠulakɛlɛma nɔpɛ ge la mɔ ɠɛa Izilayɛle, ɓaa yaava ungaiziɛ vaa. 25 Mazɔlɔɔ nà, Ɠɔoɠɔ GALAGI, nà naa wo, nii é bɛ̀ ga gè bo, tama naa ɠa ʋilɛ su, su la ɠoozaa. Gaazulɛɛ nuɓusɛiti, wa yɛsu vulua, gè kpɔɛi tɛi bo, wo yɛ vulua, é ʋilɛ su,» Maliɠii Ɠɔoɠɔ GALAGI wooi ɠana.

26 Ɠɔoɠɔ GALAGI ɓɔɛni pɔ̀, é ɠɛ mà: 27 «Ɗa ʋe, zunui, wɛlɛ nii ɠa Izilayɛle nuiti ti bosu ɗa-vaa zu, ti ɠɛ, ɗa-ɠulakɛlɛmaiti kɛ voloiti maaɠoozaʋɛ dɛ, nii gè bosu è ma ga è bo ti ma, naa ɠa ga siɛgi zu vaa nii maaɠoozaai. 28 Naa ɠa é ba, ɠɛ ti ma: ‹Maliɠii Ɠɔoɠɔ GALAGI wooi ɠaa: Wooi niiti kpein nà ti wo, su la ɠooza é ʋilɛ su,› » Maliɠii Ɠɔoɠɔ GALAGI gooi ɠana.