Ezekiyɛle 17

Koɠɛ wolai ta leezɛn ɓelei

1 Ɠɔoɠɔ GALAGI ɓɔɛni pɔ̀, é ɠɛ mà: 2 «Ɗa ʋe, zunui, faalaalii ta wo Izilayɛle nuiti ma, è wɔlɔwɔlɔ vai ta wo ti ma. 3 Ɠɛ ti ma: ‹Maliɠii Ɠɔoɠɔ GALAGI wooi ɠaa: Koɠɛ wolai, koʋegiti koozaai, koʋe deɠaiti koozaai, maaleɠai ɗufukulu, é ʋɔnɛ, naa ɠa é ɠoʋeni, é li Liɓan ɠizei ma, é sɛdelegi ma wului unsu ɠale. 4 É ma ɓekegi ɠale ba nii gaaɠoozani ti pɛ ba. É liini la yaaɠo yooi ta zu, é da yaaɠoiti ta-laai ta zu. 5 Naa ʋolu é Izilayɛle yooi zu wulu ʋɔnɔgi ta zeɠeni, é li, é tɔɔ lɔ adaʋɛ ta, ʋɛ a yɛ ná tago ɓaɠo, é siinni zooi ma ziɛ wolai laaʋɛ, eɠɛ pɔnɔba ani. 6 Ani ʋɔnɔgi naa wuzeɠeni, é ɠɛ ga leezɛn ansaɠɔgi, é ɓɔvɔ. Ma ɓekegiti gaaʋoteni koɠɛi ʋɔ pelei, ma zapeiti ti ɗa ziɛ bu. Leezɛn ansaɠɔgi ɠɛni ma ɓeke niinɛ ɠulazu nɔ ɠɔ.

7 « ‹Koɠɛi taɠili ge ɠɛni ná, bɔɔlɔai, koʋega leɠaiti koozaai, maaleɠai ɗufukulu. Leezɛn ansaɠɔgi ma zapeiti gaaʋoteni ma, é ma ɓekegiti dii ga pɔ pelei. É ɠɛni kaazu ga toɠa ziɛ zɔlɔɔ naazu, é leʋe ʋɛ ʋa siingai ná. 8 Siinga ɠɛni de zou ʋagɔi zu, ziɛ wolai ɠobaʋɛ, nii a kɛ ma ɓekegi mɔin, é gwaai wo, é ɠɛ ga leezɛn ansaɠɔgi maanɛai.›

9 «Ɠɛ ti ma: ‹Maliɠii Ɠɔoɠɔ GALAGI wooi ɠaa: Gaa ɠa wɔɔlɔ nɛi? Koɠɛ mɔungi la ʋa nɛi, é ʋa ma zapeiti tɔɔɠula, é ma waaiti koloɠolo, é ɠaaɓa ga ma ʋɔnɔ niinɛiti ti vɔ? Kpɛdɛ la ba ga kɛni zɛbɛ wolai, ɓaa kɔɔɠɔ nua ti mɔin pɛ, ti ʋa tɔɔɠula. 10 Leezɛn ansaɠɔgi ziingɛ ga pagɔ, kɛlɛ é la zooga gaa ʋa wɔɔlɔ. Folo ɠulazu ʋele viilɛi ɠa loɠa ba nɔ feya, toɠa vɔ gaamanɔ mɛtu. Ʋɛ é ʋɔnɔni ná zooi ma, toɠa vɔɔzu ná nɔ.› »

11 Ɠɔoɠɔ GALAGI ɓɔɛni pɔ̀, é ɠɛ mà: 12 «Ɠɛ kololala nui tɛiti ma: ‹Wo la naa ʋoluʋɛ ɠwɛɛ ɓaa?› Ti loo ɠisu ga ʋelei Ɓaɓilɔne masagi liini la Zeluzalɛme, é masagi zo, ta kundiɠiiti, é li ga tiye ná-zooi zu. 13 Naa ʋoluma é nu ɠila seɠeni masa pɛlɛyeɠei wu, é minazeɠe bo bɛ, é ɠɛ naa ma kɛni è gooɠɛɠiladai ma ɠonai wo bɛ. É liini ga nu wolaiti pɛ, é ti maaɠooza zooi ʋa, 14 naa ɠa a kɛ masadai ɠaalɛɠɛ, buzeɠe zobo ge mina ɠɛ ná, nii a kɛ é minazeɠegi makɛ kpaan, ziilɛigi ɠɛ ná. 15 Kɛlɛ naa mu ge wuzeɠeni Ɓaɓilɔne masagi laalɔɠɔma, é keelaiti teʋe Ezipete yooi zu, ga ti sooiti teʋe ma, ta salaʋusu ɓulugiti. Toɠa zobo sɔlɔɔ nɛi ɓaa? Zɔi é naa ɠɛai, toɠa ɓɔɠɔ ɠula su ɓaa? É minazeɠegi ɠoloɠologa, toɠa ɓɔɠɔ ɠula su? 16 Eɠɛʋelei gè vulua la ga ɠite, masagi tɛi ka za masagi naa ná-zooi zu, nii é seini masa kpɔkpɔgi ɠa. É la ɠɛni ɠizɛni minazeɠegi zu é boni, é minazeɠegi ɠoloɠoloni. Toɠa za naa ʋɔ bɛ Ɓaɓilɔne yooi zu, Maliɠii Ɠɔoɠɔ GALAGI wooi ɠana. 17 ‹Falaɠɔn la zooga é ʋa ɓɔ ba, é ʋa ɓɔɠɔ maaɠɔkɔ, anɛɛ ni naa ɠa salaʋusuiti ta kɔɔɠɔ zɔɔlaiti feezu ti mɔin, siɛgi zu Ɓaɓilɔne nuiti ti kɔɔlaaɠai ɓɛtɛzu la, ti zeɠeiti bɔ, ti lɔɔɠu su, ti ɗa nuiti undaaʋili. 18 É la ɠizɛni konai zu é boni, é minazeɠegi ɠoloɠoloni, tama tɔ ɠa é vaani bu. Naama vaaɠaazagi ɠɛa ʋoluma, kula ɠeleɠele ge la ná naa zu.›

19 «Naa ɠa é ba, Maliɠii Ɠɔoɠɔ GALAGI wooi ɠaa: ‹Eɠɛʋelei gè vulua la ga ɠite, konai é boni dàaseigi zu, naa ɠa é seɠeni ma, é nà-minazeɠegi ɠoloɠolo, nà ma ɓɔlɔi la unma. 20 Nà nà-tumɔi lɔɔzu unga, toɠa ɠɔ ga nà-balii. Nà lii la Ɓaɓilɔne, nà tukpɔ miná, é ʋilɛ ná-yaava vai ʋa, é kɛɛni ga ze. 21 Ná-salaʋusu zɔɓelamaiti pɛ ta za kɔɔɠɔzuʋɛ, zɔiti ta yɛ vulua, naati ta vaza adaʋɛ pɛ. Wa suɠwɛɛ naazu ga nà, Ɠɔoɠɔ GALAGI, nà ɠa kpɔ̀ɛai.› »

Maliɠii ná-minazeɠegiti

22 Maliɠii Ɠɔoɠɔ GALAGI wooi ɠaa: «Nà ɓɔɠɔi, nà ma ɓeke niinɛ goi ta leʋezu sɛdele gului ma ɓekegi zokpai ʋa, nà kula ma ɓekegiti gaaɓelazuʋɛ, gè sin gize ɠaaɠooza golai ma. 23 Nà sin Izilayɛle ɠize ɠaaɠoozagi gila ma. Toɠa ma ɓekegiti suvie, é waa, é ɠɛ ga sɛdele gului maayikiai. Wɔni ma zii pɛ ka ɠɛ laɠagi losu ma ɓekegiti su, ti ɗa looɠo ma ɓekegiti ma niinigi wu. 24 Názu dɔɓɔi zu wuluiti pɛ ta suɠwɛɛ ga nà ɠa gè ga Ɠɔoɠɔ GALAGI, é gului ɠaayeizu nii gaaɠoozaai, gului gaaɓuɠaai é naa ɠaaɠooza, é gulu wundui vɔ, zɔi fɔai é naa wundu su. Nà, Ɠɔoɠɔ GALAGI, nà ɠa kpɔ̀ɛai, nà kɛ nɔ.»