1 ፆሳ ሸንያን የሱስ ክርስቶሳ ሀዋረ ግዳናዉ ፄገትዳ ጳዉሎስነ፥ ኑ እሻ ሶስተኔስ፥ 2 ቆሮንቶሳን ደእያ ፆሳ ዎሳ ኬስ፥ የሱስ ክርስቶሳን ጌይዳይሳታስነ ጌሽ ግዳና መላ ፄገትዳይሳታስ፤ ቃስ ኤንታዉነ ኑስ ጎዳ ግድያ ኑ ጎዳ የሱስ ክርስቶሳ ሱን ኡባ በሳን ፄግያ ኡባስ።1:2 ሀዋ 18:1.
3 ፆሳይ፥ ኑ አዋይነ ጎዳይ የሱስ ክርስቶሲ ህንተዉ አ ኬሀተነ ሳሮተ እሞ።
ጳዉሎስ ፆሰ ጋላቴስ
4 ፆሳይ ክርስቶስ የሱሳ ባጋራ ህንተዉ እምዳ አ ኬሀተ ግሾ፥ ታኒ ኡባ ዎደ ፆሳ ጋላታይስ። 5 እያን ኦዳንነ ኤራተ ኡባን ህንተ ዱረትደታ። 6 ታኒ ክርስቶሳባ ማርካትዳይስ ቱማ ግደይሳ ሄስ ቆንጭሴስ። 7 ሄሳ ግሾ፥ ህንተ ኑ ጎዳ የሱስ ክርስቶሳ ዩሳ ናግሸ ደእሽን፥ አይ አያና እሞይካ ህንተዉ ፓጨና። 8 ኑ ጎዳ የሱስ ክርስቶሲ ስምያ ዎደ ህንተ ቦረቶናይሳታ ግዳና መላ ዉርሰ ጋካናዉ እ ህንተና ምንና። 9 ባ ናአ፥ ኑ ጎዳ፥ የሱስ ክርስቶሳራ እስፈተ ዳና መላ ህንተና ፄግዳ ፆሳይ አማነትዳይሳ።
ዎሳ ኬን ደእያ ሻከተ
10 ታ እሻቶ፥ ህንተ ግዶን ሻከተ ዶና መላነ ህንተ እስ ዎዛናንነ እስ ቆፋን እሶ ግድድ ዳና መላ፥ ኑ ጎዳ የሱስ ክርስቶሳ ሱንን ህንተና ዎሳይስ። 11 ታ እሻቶ፥ ቀሎኤ ሶ አሳይ ህንተ ግዶን ኦሽ ደኤይሳ ታዉ ኦድዶሶና። 12 ታ ህንተዉ ኦደይስ ሀይሳ፦ ህንተፈ እሶት እሶት፥ "ታኒ ጳዉሎሳሳ፤ ታኒ አጵሎሳሳ፤ ታኒ ጰፅሮሳሳ፤ ታኒ ክርስቶሳሳ" ያጌታ።1:12 ሀዋ 18:24. 13 ክርስቶስ ሻከትደዬ? ህንተ ግሾ፥ ማስቃልያ ቦላ ካቀትዳይ ጳዉሎሰዬ? ዎይኮ ህንተ ጳዉሎሳ ሱንን ፃማቀትደትዬ?
14 ታኒ ቃርስጶስነ ጋዮስ አትሽን፥ ህንተፈ ኦናካ ፃማቃቦና ግሾ፥ ፆሰ ጋላታይስ።1:14 ሀዋ 18:8፤ ሀዋ 19:29፤ ሮመ 16:23. 15 ሄሳ ግሾ፥ ኦንካ ህንተና ታ ሱንን ፃማቀትደታ ጋናዉ ዳንዳኤና። 16 [ቃስ እስፅፋኖሰ ሶ አሳካ ታ ፃማቅዳይሳ አኬካይስ፥ ሽን ሀራ ኦና ፃማቅዳኮ ሀሳይከ።] 17 ክርስቶስ ታና ኪትዳይ ዎንገላ ኦዳና መላሳፈ አትሽን፥ ፃማቃና መላ ግደና። ክርስቶስ ማስቃለይ ሀዳ ግዶና መላ ታኒ አሳ ጭንጫተ ቃላን ኦድከ።
ክርስቶስ ፆሳ ዎልቃነ ጭንጫተ
18 ክርስቶሳ ማስቃላ ቃላይ የይሳታስ ኤያተ፥ ሽን ኑስ አተይሳታስ ፆሳ ዎልቃ። 19 ጌሻ ማፃፋን፥
"ታኒ ጭንጫታ ጭንጫተ ይሳና፤
አኬካንቾታ አኬካ ባለና"
ያጌስ።1:19 እሳ 29:14.
20 ያትን፥ ጭንጭ አዉን ደኢ? ህገ አስታማረይ አዉኔ? ዎይኮ ሀ ሳአ ኤራንቾይ አዉን ደኢ? ፆሳይ ሀ ሳኣ ጭንጫተ ኤያተ ኦቤኔ?1:20 እዮ 12:17፤ እሳ 19:12፤ 33:18፤ 44:25.
21 ሀ ሳኣ አሳይ ባንታ ጭንጫተን ፆሳ ኤሮና መላ ባ ጭንጫተን ድግድ፥ ኤያተን ታይበትያ፥ ኑኒ ኦድያ ቃላን አማነይሳታ አሻናዉ ፆሳ ሸነ ግድስ። 22 አይሁደት ማላታ በአናዉ ኮዮሶና፤ ቃስ ግርከት ጭንጫተ ኮዮሶና። 23 ሽን ኑኒ ማስቃለ ቦላ ካቀትዳ ክርስቶሳ ሳባኮስ። ሄስ አይሁደታስ በ፤ ቃስ ግርከታስ ኤያተ ግድስ። 24 ሽን ፆሳይ ፄግዳይሳታስ፥ አይሁደ ግድን፥ ግርከ ግድን ክርስቶስ ፆሳ ዎልቃነ እያ ጭንጫተ። 25 ፆሳ ኤያተ አሳ ጭንጫተፈ አስ፤ ቃስ ፆሳ ዳቡራይ አሳ ምኖተፈ ምኔስ።
26 ህዛ፥ ታ እሻቶ፥ ፆሳይ ህንተና ፄግያ ዎደ ህንተ አይ መላ አሴኮ ቆፕተ። አሳ ቆፋን፥ ህንተ ግዶፈ ዳሮት ጭንጫ፥ ዎልቃማነ ቃ ኮቸ ግደከታ። 27 ሽን ፆሳይ ጭንጫታ ዬላያናዉ አላመን ደእያ ኤያታ ዶርስ፤ ቃስ ምኖታ ዬላያናዉ አላመን ደእያ ዳቡራንቾታ ዶርስ። 28 ሀ አላምያን ግታ ጌተትዳባ ይሳናዉ፥ ፆሲ፥ ሀ ሳኣ ካዉሻባ፥ ካትዳባነ ፓናባ ዶርስ። 29 ፆሳ ስንን ኦንካ ጬቀቶና መላ ሄሳ ኦስ። 30 ሽን፥ ህንተዉ ክርስቶስ የሱሳራ እስፈተ ዳና መላ ፆሳይ ሄሳ ኦስ። እ፥ ኑስ ፆሳፈ ጭንጫተ፥ ፅሎተ፥ ጌሻተነ አቶተ ግድስ። 31 ሄሳ ግሾ፥ ጌሻ ማፃፋን፥ "ጬቀትያ ኦንካ ጎዳን ጬቆ" ያጌስ።1:31 ኤርም 9:24.