ኤቃስ ያርሸትዳ ካባ
1 ኤቃስ ያርሸትያ ካባ ግድኮ ኑ ኡባይ ኤሮስ። ኤራተ ኦቶርሴስ፥ ሽን ሲቆይ ድቼስ። 2 ኦንካ ባና ኤራይስ ግድ ቆፕኮ፥ እ ቡሮ ኤራናዉ በሰይሳ ኤርቤና። 3 ሽን ኦንካ ፆሰ ሲቅኮ፥ እ ፆሳ ማታን ኤረትዳይሳ።
4 ሄሳ ግሾ፥ ኤቃስ ያርሸትዳ ካ ሙሳባ ግድኮ፥ ሀ አላምያን ጎድ እስ ፆሳፈ አትሽን፥ ሀር ባይና ግሾ፥ ኤቅ ፓናባ ግደይሳ ኑኒ ኤሮስ። 5 ፆሰ ግዶናሽን፥ ሳሎንነ ሳአን ፆሰ ጌተትድ ፄገትያ ዳሮ ፆሳትነ ጎዳት ደእኮካ፥ 6 ኡባባ መዳ፥ ኑ እያባ ግድዳ፥ እስ ፆሲ፥ አው፥ ኑስ ደኤስ8:6 ዛረ 6:4፤ 10:13.። ኡባይ እያ ባጋራ መትዳ፥ ኑካ እያ ባጋራ ደኦ ደምዳ እስ ጎዳይ፥ የሱስ ክርስቶሲ ኑስ ደኤስ።
7 ሽን ሀ ኤረይ ኡባ ማታን ዴና። እስ እስ አሳይ ኤቃ ጎይኖራ ሜዘትዳ ግሾ፥ ካ ምያ ዎደ ኤቃስ ያርሸትዳባ ኦድ ኤኮሶና። ሄ ዎደ ኤንታ ካሀይ ዳቡራ ግድያ ግሾ ቱኔስ። 8 ሽን ካ ኑና ፆሳራ ዳቦየና። ኑ ሞና አግድ አይኮካ ቆሄቶኮ፤ ቃስ ምድ ዱማ ጎኤቶኮ።
9 ሽን ህንተ ኮይዳባ ማናዉ ማት ህንተዉ ደእኮካ ሄስ አማኖን ምኖና አሳታ ቦና መላ ናገትተ። 10 ኔኒ ነና ኤራንቾ ጋዳ ኤቃስ ያርሸትዳ ካ ማናዉ ኤቃ ኬን ኡትዳሽን፥ አማኖን ምኖና አስ ነና በእኮ፥ ሄስ ኤቃስ ያርሸትዳ ካ እ ማና መላ ደንነዬ? 11 ህዛ፥ ነ ኤራተ ጋሶን ክርስቶስ እያ ግሾ ሀይቅዳ፥ አማኖን ምኖና ነ እሻይ ይስ። 12 ሄሳዳ ኦድ፥ አማኖን ምኖና ህንተ እሻታ ቆህሸነ ኤንታ ካሀ ማዱንፅስሸ ክርስቶሳ ቆሄታ። 13 ሄሳ ግሾ፥ ካ ታ እሻ ብያባ ግድኮ፥ እ በቶና መላ ኡባራካ አሾ ሚከ።