1 ሲቆ ካልተ። አያና እሞታታ ምንድ ኮይተ፤ ኡባፈ አድ፥ ትንብተ እሞታ ምንድ ኮይተ። 2 ዱማ ዱማ ዶናን ኦደትያ አስ ፆሳስ ኦዴስፐ አትሽን፥ አሳስ ኦደና። ሽን አሳስ ቆንጭቦና ፁራ አያና ዎልቃን ኦደትያ ግሾ፥ ኦንካ እ ኦደተይሳ አኬከና። 3 ሽን ትንብተ ኦደይሳት አሰ ድቻናዉ፥ ምንናዉነ ምንናዉ አሳስ ኦዴስ። 4 ዱማ ዱማ ዶናን ኦድያ አስ ባና ድቼስ። ሽን ትንብተ ኦድያ አስ ዎሳ ኬ ድቼስ።

5 ህንተ ኡባይ ዱማ ዱማ ዶናን ኦደትያኮ ታ ዶሳይስ፥ ሽን ትንብተ ኦዳናይሳ አዳ ዶሳይስ። ዱማ ዱማ ዶናን ኦደተይሳ ዎሳ ኬ ድቻናዉ ብርሽያ አስ ይኮ፥ ዱማ ዱማ ዶና ኦደተይሳፈ ትንብተ ኦደይስ አስ።

6 ሽን ታ እሻቶ፥ ታኒ ህንተኮ ባዳ፥ ቆንጨን ዎይኮ ኤራተን ዎይኮ ትንብተ ኦዶን ዎይኮ ትምርተን ግዶናሽን፥ ዱማ ዱማ ዶናን ኦደትኮ ህንተና አይ ማዳኔ? 7 ዱማ ዱማ የ ሚሸታስ እስ ቆሞ ግርስ ደእኮ፥ ሱሱልኤ ግርስነ ዲ ግርስ ዋትድ ሻክ ኤራኔ? 8 ቃስ ሞይዘ ፑኖይ ጌይድ ኤረቶና እፅኮ ኦላስ ጊገተይ ኦኔ? 9 ሄሳዳካ፥ ዱማ ዱማ ዶናን ህንተ ኦደተይስ ቆንጨ ግዶና እፅኮ ህንተ ኦደይሳ ኦን ኤራኔ? ሄስ ጫርኮስ ኦድያ መላ።

10 ሀ አላምያን ዳሮ ዶናት ደኦሶና፤ ሄ ኡባስ ብርሸ ደኤስ። 11 ሽን እስ አስ ኦደትያ ዶና ታኒ ኤሮና እፅኮ እ ታዉ እማ ግዴስ፤ ታካ እያዉ እማ ግዳይስ። 12 ሄሳዳካ፥ ጌሻ አያና እሞታ ህንተ ኤካናዉ ምንድ ኮይኮ፥ ዎሳ ኬ ድቻናዉ ኡባፈ አያ እሞታ ኮይተ።

13 ዱማ ዱማ ዶናን ኦደትያ አስ ባ ኦዳ ብርሻናዉ ብርሸ እሞታይ እመታና መላ ፆሳ ዎሶ። 14 ታኒ ዱማ ዱማ ዶናን ፆሳ ዎስኮ፥ ታ አያናይ ዎሴስ፥ ሽን ታ ዎዛናይ አይኮካ ጎኤተና። 15 ያትን፥ ታ አይ ኦናዉ ኮሺ? ታኒ ታ አያናን ዎሳይስ፤ ታ ዎዛናንካ ዎሳይስ። ታኒ ታ አያናን የፃይስ፤ ታ ዎዛናንካ የፃይስ። 16 ሄሳ ግዶና እፅኮ ኔኒ ነ አያናን ፆሳ ጋላትያ ዎደ ሄ በሳን ኔኒ ገይሳ ኤሮና አስ ነ ጋላተይሳ ዎይግድ፥ "አምንእ" ጋኔ? 17 ኔኒ ፆሳ ጋላተይስ ሎኦ፥ ሽን ሀራ አስ ማደና።

18 ታ ህንተ ኡባፈ አዳ ዱማ ዱማ ዶናን ኦደትያ ግሾ ፆሳ ጋላታይስ። 19 ሽን ታኒ ዎሳ ኬን ሀራታ ታማርሳናዉ ዱማ ዱማ ዶናን ታሙ ሙኩሉ ቃላ ኦደታናፐ እቻሹ ቃላ ኤረትያ ዶናን ኦደታናዉ ዶሳይስ።

20 ታ እሻቶ፥ ህንተ ቆፋን ናይታዳ ሀኖፕተ። ህንተ ኢታባስ ናይታዳ ሀንተፐ አትሽን፥ ህንተ ቆፋን ካሃማታ ግድተ። 21 ጎዳይ፥ ጌሻ ማፃፋን፥

"ታኒ ሀ አሳስ፥

ዱማ ዱማ ዶናን ኦደትያ አሳንነ

እማ እንፃርሳን ኦደትያ አሳን ኦዳና።

ሽን ሄስ ሀንንካ ታና ስኦኮና" ያጌስ።✝

22 ህዛ፥ ዱማ ዱማ ዶናን ሃሳዮይ፥ አማኖና አሳስ ማላ ግዴስፐ አትሽን፥ አማንያ አሳሳ ግደና። ትንብተይ አማንያ አሳስ ማላ ግዴስፐ አትሽን፥ አማኖና አሳሳ ግደና።

23 ዎሳ ኬ አሳይ እስፈ ሺቅያ ዎደ፥ ኡባይ ዱማ ዱማ ዶናን ኦደትኮ ኤሮና ዎይኮ አማኖና አሳይ ህንተ ሺቁዋ ይድ፥ "ሀይሳቲ ጎዮሶና" ጎኮናዬ? 24 ሽን ኤሮና ዎይኮ አማኖና አሳይ ዎሳ ኬ ያ ዎደ አሳይ ትንብተ ኦድሽን፥ ስእኮ ባ ናጋራ አኬካና፤ ቃስ እ ስእዳ ቃላን ፕርደታና። 25 ኤንቲ እያ ዎዛናን ጌምዳ ቆፋ ቆንጭሳና። ሄሳዳካ፥ "ቱማ ፆሳይ ህንተ ግዶን ደኤስ" ያግድ ማርካትድ፥ ጉፋንድ ፆሳስ ጎይናና።

26 ታ እሻቶ፥ ኑ ዎይግኖ? ህንተ እስፈ ሺቅያ ዎደ እሱዋስ ማዝሙረይ ደኤስ፤ እሱዋስ ታማርሶ እሞት ደኤስ፤ እሱዋስ ቆንጨ ደኤስ፤ እሱዋስ ዱማ ዱማ ዶናን ሃሳዮይ ደኤስ፤ እሱዋስ ብርሸ እሞት ደኤስ። ሄ ኡባይ ዎሳ ኬ ድችያባ ግዳናዉ በሴስ። 27 ዱማ ዱማ ዶናን ኦደትያ አሳት ደእኮ፥ ናምአ ዎይኮ ዳርኮ ሄ ግድድ ማራን ማራን ኦደታናዉ በሴስ። ኤንቲ ኦደተይሳ ሀራ አስ ብርሾ። 28 ሽን ብርሽያ አስ ይኮ፥ ዱማ ዱማ ዶናን ኦደተይስ ዎሳ ኬን ስእ ጎ። ባዉነ ባ ፆሳስ ኦዶ።

29 ትንብተ ኦደይሳት ናምአ ዎይኮ ሄ ግድድ ኦዶ። ቃስ ሀራት ኤንቲ ግያባ ፕርዶና። 30 ሄ ሺቁዋን ደእያ ሀራ አሳስ እስባይ ቆንጭኮ ካሰ ኦደተይስ ስእ ጎ። 31 ኡባይ ታማራና መላነ ኡባይ ምናና መላ ማራን ማራን ትንብተ ኦዳናዉ ዳንዳኤታ። 32 ናበታ አያናይ ናበታስ ኪተቴስ። 33 ጌሻታ ዎሳ ኬ ኡባይ ሜዘትዳይሳዳ ፆሳይ ሳሮተ ፆሳፈ አትሽን፥ ቡቀ መያ ፆሲ ግደና።

34 ማጫስ ዎሳ ኬን ስእ ጎ። ሙሰ ህገይ ገይሳዳ ኤንቲ ሃረቶፈ አትሽን፥ ዎሳ ኬን ኦዳናዉ ኤንታዉ ማት ባዋ። 35 ማጫስ ዎሳ ኬን ሃሳዮይ ቦርሶ ግድያ ግሾ እስባ ኤራናዉ ኮይኮ ሶን ባንታ አዝናታ ኦይቾና።

36 ፆሳ ቃላ ኮይሮ ህንተ ኤህደቲ? ዎይኮ ፆሳ ቃላይ ህንተ ፃላላኮ ይዴ? 37 ኦንካ ባና ናበ ዎይኮ ባና ፆሳ አስ ግድ ቆፕኮ፥ ታኒ ህንተዉ ፃፈይስ ጎዳ ኪታ ግደይሳ አኬኮ። 38 ሽን ኦንካ አኬኮና እፅኮ እካ አኬከቶፎ።

39 ሄሳ ግሾ፥ ታ እሻቶ፥ ትንብተ ኦዳናዉ ምንድ አሞትተ፤ ቃስ ዱማ ዱማ ዶናን ኦደተይሳካ ድጎፍተ። 40 ሽን ኡባይካ ዎጋንነ ማራን ግዶ።