1 ታ እሻቶ፥ ታ ህንተዉ ማርካትዳ ዎንገላ ህንተ ኤክዳይሳነ ህንተ አማኖይ እያን ኤቅዳይሳ ህንተ አኬካና መላ ታኒ ኮያይስ። 2 ታ ታማርስዳ ዎንገላ ምንድ ኦይክኮ ህንተ እያን አታና። ሄስ ሀኖና እፅኮ ህንተ አማኖይ ሀዳ ግዳና።

3 ታኒ ኤክዳ ኡባፈ አያ ኪታ ካሰታዳ ህንተዉ እማስ። ሄስካ፥ ጌሻ ማፃፋይ ገይሳዳ፥ ክርስቶስ ኑ ናጋራ ግሾ ሀይቅስ።✝ 4 ሞገትስ፤ ጌሻ ማፃፋይ ገይሳዳ፥ ሄን ጋላሳን ሀይቆፐ ደንድስ።✝ 5 ጰፅሮሳስ ቆንጭስ። ሄሳፈ ጉየ፥ ታማነ ናምኡ ሀዋረታስ ቆንጭስ።✝ 6 ሄሳፈ ጉየ፥ እቻሹ ፄታፐ ዳርያ አሳስ እስቶሆ ቆንጭስ። ኤንታፈ ዳርያ ባጋይ ሀእ ጋካናዉ ፓፃ ደኦሶና፥ ሽን ጉት ሀይቅዶሶና። 7 ሄሳፈ ጉየ፥ ያይቆባስ ቆንጭስ፤ ጉየፐ ባ ሀዋረታ ኡባስ ቆንጭስ።

8 ቃስ ዉርሰን አዉጫያ መላ ግድዳ ታዉ ቆንጭስ።✝ 9 ታኒ የሱሳ ሀዋረታ ኡባፈ ላፋ። ታኒ ፆሳ ዎሳ ኬ ጎድዳ ግሾ የሱሳ ሀዋረ ጌተታዳ ፄገታናዉ በሶናይሳ።✝ 10 ሽን ፆሳ አ ኬሀተን ታ ሀእ ግድዳይሳ ግዳስ፤ እ ታዉ እምዳ አ ኬሀተይ መላ አትቤና። ታኒ ሀንኮ ሀዋረታፐ አዳ ዳቡራስ። ሽን ታራ ደእያ ፆሳ አ ኬሀተይ ኦስፐ አትሽን፥ ታና ግድከ። 11 ህዛ፥ ታና ግድን ኤንቲ፥ ኑ ኡባይ ታማርሰይ ሄሳ፤ ህንተካ ሄ ኪታ አማንደታ።

12 ክርስቶስ ሀይቆፐ ደንድዳይሳ ኑ ሳባክያ ዎደ ህንተፈ እሶት እሶት ያትን፥ ዎይግድ፥ "ሀይቆፐ ደንዶይ ባዋ" ያጎና? 13 ሀይቆፐ ደንዶይ ባይናባ ግድኮ ክርስቶስ ሀይቆፐ ደንድቤና ጉሱ። 14 ክርስቶስ ሀይቆፐ ደንድቦናባ ግድኮ ኑ ትምርተይ ቃስ ህንተ አማኖይካ ሀዳ። 15 ሀይቆፐ ደንዶይ ባይናሽን፥ ኑኒ ፆሳይ፥ "ክርስቶሳ ሀይቆፐ ደንስ" ያግድ ሳባክሸ ፆሳ ዎርዳንቾ ማርካታ ግድዳ ጉሱ። 16 ሀይቅዳ አሳይ ሀይቆፐ ደንድቦናባ ግድኮ ህዛ፥ ክርስቶስ ሀይቆፐ ደንድቤና። 17 ክርስቶስ ሀይቆፐ ደንዶናባ ግድኮ፥ ህንተ አማኖይ ሀዳ፤ ቃስ ህንተ ሀእ ጋካናዉ ህንተ ናጋራን ደኤታ። 18 ህዛ፥ ክርስቶሳ አማንድ ሀይቅዳይሳትካ ይዶሶና ጉሱ። 19 ኑኒ ሀ አላምያ ደኡዋ ፃላላስ ክርስቶሳን ኡፋይስ ኦዳባ ግድኮ፥ ሀ ሳአን ደእያ አሳ ኡባፈ ኑባይ አዳ ይባታ።

20 ሽን ክርስቶስ ሀይቅዳይሳታስ ሀይቆፐ ደንዶን ባይራ ግድድ ቱማ ደንድስ። 21 ሀይቆይ እስ አሳ ባጋራ ሀ አላምያ ይዳይሳዳ ሀይቆፐ ደንዶይ እስ አሳ ባጋራ ይስ። 22 አዳመ ባጋራ አሳ ኡባይ ሀይቅዳይሳዳ ክርስቶሳ ባጋራ አሳ ኡባይ ደኦን ዳና። 23 ሽን እሶይ እሶይ ባ ማራን ማራን ደንዳና። ክርስቶስ ኡባፈ ካሰትድ ደንድስ፤ ሄሳፈ ጉየ፥ ክርስቶሳይሳት እ ያ ዎደ ደንዳና።

24 ሄሳፈ ጉየ፥ ክርስቶስ ሀላቃተ፥ ማታነ ዎልቃ ኡባ ይስድ፥ ካዎተ ፆሳ አዋስ እምያ ዎደ ዎድያ ዉርሰይ ያና። 25 ፆሳይ እያ ሞርከታ ኡባ እያ ቶሁዋፐ ጋርሳን ዎና ጋካናዉ ክርስቶስ ሃራናዉ በሴስ።✝ 26 ዉርሰን እ ይሳናዉ ደእያ ሞርከይ ሀይቆ። 27 ጌሻ ማፃፋን፥ "ፆሳይ ኡባባ እያ ማታፐ ጋርሳን ሃርስስ" ጌተትድ ፃፈትስ። ሽን ኡባ እያ ማታፐ ጋርሳን ሃርስስ ገይስ፥ ኡባባ እያ ማታፐ ጋርሳን ሃርስዳ ፆሳ ጉጀና።✝ 28 ኡባባይ ክርስቶሳ ማታፐ ጋርሳን ሃረትዳፐ ጉየ ክርስቶስ ቃስ ባ ሁጰን ኡባባ ባዉ ሃርስዳ ፆሳስ ሃረታና። ሄ ዎደ ፆሳይ ባ ፃላላ ኡባ ሃራና።

29 ሀይቅዳይሳት ደንዶናባ ግድኮ ኤንታ ግሾ ፃማቀትያ አሳስ አይባ ዎይ ደኢ? ሀይቅዳይሳት ደንዶናባ ግድኮ ያትን፥ አይስ፥ አሳይ ሀይቅዳይሳታ ግሾ ፃማቀቶና?

30 ያትን፥ ኑኒ አይስ ኡባ ዎደ ኑናተ መቶስ አድ እሞና? 31 ታ እሻቶ፥ ታ ጋላስ ጋላስ ሀይቆስ አዳ እመታይስ። ሄስካ፥ ጎዳ ክርስቶስ የሱሳን ደእያ ደኡዋ እስፈተን ህንተናን ጬቅያ ግሾሳ። 32 አሳ ቆፋ ግድኮ፥ ታኒ ኤፈሶናን ዶአራ ቡተትዳይስ ታና አይ ማዲ? ሀይቅዳይሳት ሀይቆፐ ደንዶናባ ግድኮ፥ "ዎንቶ ኑ ሀይቅያ ግሾ ሀች ማና ኡያና" ግያ አሳ መላ ግዶስ።✝

33 ጭመቶፍተ! ኢታ ላገተ ሎኦ አማለ ኢሴስ። 34 ህንተ አኬካኮ ስምተ። ናጋራ ኦፍተ። ህንተፈ እስ እስ አሳይ ፆሳ ኤሮኮና። ታኒ ህንተና ዬላያናዉ ሄሳ ጋይስ።

35 እስ አስ፥ "ሀይቅዳ አሳይ ዋንድ ደንዳኔ? ኤንቲ አይ መላ አሳተራ ያኔ?" ያጎና አገና። 36 ነኖ ኤያዉ፥ ኔኒ ቢታን ዘርያ ዘረይ ሀይቆና ዶለና። 37 ኔኒ ዘረይ ግስተ ግድን ዎይኮ ሀራ ካ ቆሞ አይፈ ፃላላ ዘራሳፐ አትሽን፥ ዶልዳ ዶላ ግደና። 38 ሽን ፆሳይ ዘረስ ባ ዶስዳ መላ መተ እሜስ። ዱማ ዱማ ዘረስ ዱማ ዱማ አሳተ እሜስ። 39 መተ ኡባ አሾይ እሶ ግደና። ሽን አሳ አሾይ እሱዋ፤ መሄ አሾይ ዱማ፤ ካፎታ አሾይ ዱማ፤ ቃስ ሞሎ አሾይ ዱማ።

40 ሳሎ አሳተ ደኤስ፤ ቃስ ሳአ አሳተ ደኤስ። ሽን ሳሎ አሳተ ቦንቾይ ዱማ፤ ቃስ ሳአ አሳተ ቦንቾይ ዱማ። 41 አዋ ቦንቾይ ዱማ፤ አጌና ቦንቾይ ዱማ፤ ፆልንቶታ ቦንቾይ ዱማ፤ እስ ፆልንቶይ ሀንኮ ፆልንቱዋፈ ቦንቾን ዱማቴስ።

42 ሀይቅዳይሳት ሀይቆፐ ደንድያ ዎደ ሄሳዳ ሀናና። ሀይቅያ አሳተይ ዘረቴስ፤ ሀይቆና አሳተ ግድድ ደንዴስ። 43 ቶሸን ዘረትድ፥ ቦንቾን ደንዳና፤ ዳቡራን ዘረትድ፥ ዎልቃን ደንዳና። 44 መተ አሳተይ ዘረትድ፥ አያና አሳተ ግድድ ደንዳና። መታ አሳተ ደእኮ፥ አያና አሳተ* ደኤስ።

45 ሄሳዳካ፥ ጌሻ ማፃፋን፥ "ኮይሮ አደይ፥ አዳመይ፥ ፓፃ ደእያ አሰ ግድድ መትስ"✝ ያጌስ። ሽን ዉርሰ አዳመይ፥ ክርስቶስ፥ ደኦ እምያ አያና ግድስ። 46 ሽን መታ አስ ኮይሮ ይን፥ ጉየፐ አያና አስ ይስፐ አትሽን፥ አያና አስ ኮይሮ ይቤና። 47 ኮይሮ አዳመይ ቢታፈ መትዳ ቢታ አስ፤ ናምአን አዳመይ ሳሎፐ ይዳ ሳሎ አስ። 48 ቢታፈ መትዳይሳት ቢታፈ መትዳይሳ ዳኖሶና። ሳሎይሳት ሳሎፐ ይዳይሳ ዳኖሶና። 49 ኑኒ ቢታፈ መትዳ አድያ ዳነይሳ መላ ሳሎፐ ይዳ አድያ ዳናና።

50 ታ እሻቶ፥ ታ ገይስ ሄሳ፤ ሀእ ኑ ማእዳ አሳተይ ፆሳ ካዎተ ላታናዉ ዳንዳኤና። ዎቅያ አሳተይ ዎቆና አሳተ ላተና።

51 ታ ህንተዉ እስ ፁራ ኦዳና። ኑ ኡባይ ሀይቆኮ፥ ሽን ዉርሰን ኡባይ ላመታና። 52 ሞይዘይ ፑነትያ ዎደ፥ አይፈይ ቅጵ ፄላናዉ ሀሳዮና ላመታና። ሀይቅዳ አሳይ ዎቆና አስ ግድድ ደንዳና፤ ኑካ ላመታና።✝ 53 ሀይስ ዎቀይስ ዎቆናይሳ፥ ሀይስ ሀይቀይስ ሀይቆናይሳ ማአናዉ በሴስ።

54 ሀይስ ዎቀይስ ዎቆናይሳ፥ ቃስ ሀይስ ሀይቀይስ ሀይቆናይሳ ማእያ ዎደ፥ ጌሻ ማፃፋን፥ "ሀይቆይ ፆኖን ምተትስ"✝ ግያ ቃላይ ፖለታና። 55 ሄሳዳካ፥

"ሀይቆ፥ ነ ፆኖይ አዉን ደኢ?

ሀይቆ፥ ነ ቆህያ ዎልቃይ አዉን ደኢ?"✝

ግዳ ቃላይ ፖለታና። 56 ሀይቆይ ዱክያ ዎልቃይ ናጋራ፤ ቃስ ናጋራ ዎልቃይ ህገ። 57 ሽን ኑ ጎዳ የሱስ ክርስቶሳ ባጋራ ኑስ ፆኖ እምያ ፆሳ ጋላት ጋኮ።

58 ሄሳ ግሾ፥ ታ ሲቆ እሻቶ፥ ቃፆና ምንድ ኤቅተ። ጎዳ ኦሱዋን ህንተ ዳቡረይስ ጮ ግዶናይሳ ኤርድ ኡባ ዎደ ጎዳ ኦሱዋ አዛሎና ኦተ።