1 ታ እሻቶ፥ ታኒ ኮይሮ ፆሳ ቃላ ህንተዉ ኦዳሸ ይዳ ዎደ፥ ዶና ብላተንነ ጭንጫተን ያቢከ። 2 ታኒ ህንተራ ደእያ ዎደ ማስቃልያ ቦላ ካቀትዳ የሱስ ክርስቶሳፐ አትሽን፥ ሀራባ ኤራናዉ ኮይከ ጋዳ ታ ቆፋ ቃቻስ። 3 ታ ህንተራ ደእያ ዎደ ዳቡራን፥ ያሻንነ ዳሮ ኮኮርሳን ደአስ።2:3 ሀዋ 18:9. 4 ታ ኪታይነ ታ ትምርተይ ዶና ብላተንነ ጭንጫተን ግዶናሽን፥ ጌሻ አያና ዎልቃ ቆንጭሰና። 5 ሄስካ፥ ህንተ አማኖይ ፆሳ ዎልቃናፐ አትሽን፥ አሳ ጭንጫተን ዘምፖና መላሳ።
ፆሳ ጭንጫተ
6 አያና ደኦን ድጭዳይሳታስ ኑኒ ጭንጫተ ቃላን ኦዶስ። ሽን ሄ ጭንጫተይ፥ ሀ ሳአ ጭንጫተ ዎይኮ ያናዉ ደእያ ሀ ሳአ ሃረይሳታ ጭንጫተ ግደና። 7 ሽን ኑኒ ኦድያ ጭንጨተይ፥ ዳሮ ዎደፐ ስን ፆሳይ ኑ ቦንቹዋስ ጊግስዳይሳነ ጌምድ ደእያ ፁራ ጭንጫተ። 8 ሀ ሳኣ ሃረይሳታፐ ኦንካ ሀ ጭንጫተ ኤርቦኮና። ኤንቲ ኤርዳባ ግድያኮ፥ ቦንቾ ጎዳ ማስቃልያ ቦላ ካቆኮና። 9 ሽን ጌሻ ማፃፋን፥
"አይፈይ በእቦናባ፥
ሀይ ስእቦናባ፥
ዎዛን ቆፕቦናባ፥
ፆሳይ ባና ዶሰይሳታስ ጊግስስ" ያጌስ።2:9 እሳ 64:4.
10 ፆሳይ ባ ፁራ ባ አያና ባጋራ ኑስ ቆንጭስስ። ጌሻ አያናይ ሀር አቶሽን፥ ጌምዳ ፆሳ ፁራ ኡባ ፕልጌስ። 11 አሳን ደእያ አሳ አያናፐ አትሽን፥ አሳባ ኦንካ ኤረና። ሄሳዳካ፥ ፆሳባ፥ ፆሳ አያናፐ አትሽን፥ ኦንካ ኤረና። 12 ፆሳይ ኑስ ጮ እምዳባ ኑ ኤራና መላ ፆሳ አያና ኤክዳፐ አትሽን፥ ሀ ሳአ አያና ኤክቦኮ።
13 ኑኒ አያናባ፥ አያና አሳታስ አሳ ጭንጫተን ግዶናሽን፥ ፆሳ አያናይ እምያ ጭንጫተን ታማርሶስ። 14 ጌሻ አያን ባይና አስ ፆሳ አያና እሞታታ ኤከና። ሄስ እያዉ ኤያተ፤ ኡባይ ጌሻ አያናን ፕልገትያ ግሾ፥ እ ኤራናዉ ዳንዳኤና። 15 ጌሻ አያን ደእያ አስ ኡባባ ፕልጌስ፥ ሽን እያ ኦንካ ፕልገና። 16 ጌሻ ማፃፋን፥
"ጎዳ ዎዛና ኤረይ ኦኔ?
እያ ዞራናዉ ዳንዳኤይ ኦኔ?"
ጌተትድ ፃፈትዳይሳ መላ። ሽን ኑስ ክርስቶሳ ዎዛን ደኤስ።2:16 እሳ 40:13.