1 ታ እሻቶ፥ ህንተ ክርስቶሳን ቡሮ ዮጋነ አማኖና አሳ ደእያ ግሾ፥ ታኒ አያናባ ህንተዉ ኦዳናዉ ዳንዳአብከ። 2 ህንተ ምኖ ካ ማናዉ ዳንዳእቦና ግሾ፥ ታኒ ህንተና ማ ፓሀስ፤ ሀእካ ዳንዳእቤከታ።✝3:2 እብራ 5:12-13. 3 ሀእካ ህንተ አማኖና አሳዳ ደኤታ። ህንተ ግዶን ደእያ ቃናተይነ ኦሽ ህንተ አማኖና አሳዳ ደኤይሳ ኤርሰኔ? ህንተ አማኖና አሳዳ ሀኔታ። 4 ህንተፈ እሶይ፥ "ታኒ ጳዉሎሳሳ" ሀራይ ቃስ፥ "ታኒ አጵሎሳሳ" ጊኮ፥ አማኖና አሳ መላ ግደከቲ?✝3:4 2 ቆሮ 1:12.

5 ያትን፥ አጵሎስ ኦኔ? ጳዉሎስ ኦኔ? ኑኒ ህንተና አማንዳ ፆሳ ኦሳንቾታ። ፆሳይ እሱዋስ እሱዋስ እምዳ እሞታ መላ ኦያ ኦሳንቾታ ግዶኮናዬ? 6 ታኒ ቶካስ፤ አጵሎስ ሃ ኡሽስ፥ ሽን ድቸይ ፆሰ።✝3:6 ሀዋ 18:4-11፥ 24-28. 7 ሄሳ ግሾ፥ ድችያ ፆሳፈ አትሽን፥ ቶከይካ ሃ ኡሸይካ አይኮካ ግደና። 8 ቶከይነ ሃ ኡሸይ ዎል መላ፥ ሽን እሶይ እሶይ ባ ኦሱዋ መላ ፆሳይ እምያ ዎይቱዋ ኤካና። 9 ኑኒ እስፈ ፆሳስ ኦያ እያ ኦሳንቾታ ግድያ ግሾ፥ ህንተ ፆሳ ሾቃ፤ ፆሳ ኬ። 10 ፆሳይ ታዉ እምዳ አ ኬሀተ መላ ሂላንቾ አናፀዳ ባሶ የጋስ። ሀራ አስ እያ ቦላ ኬፄስ። ሽን እያ ቦላ ኬፅያ ኦንካ ዋትድ ኬፅያኮ፥ ባዉ ናገቶ። 11 እስ ቶሆ የገትዳ ባሶፐ ሀራ ባሶ የጋናዉ ኦንካ ዳንዳኤና። ሄ ባሶይካ የሱስ ክርስቶሳ። 12 ሽን ሀ ባሱዋ ቦላ ኦንካ ዎርቃን ዎይኮ ብራን ግድን፥ አልኦ ሹቻን ዎይኮ ምን ግድን፥ ማታን ዎይኮ ማቃን ኬፅኮ፥ 13 እስ እስ አስ ሄ ባሱዋ ቦላ አይብን ኬፅዳኮ ፕርዳ ጋላስ ታማን ፓጨትድ ቆንጫና። 14 ኦንካ ሄ ባሱዋ ቦላ ኬፅዳ ኬይ ታማን ፁገቶና አትኮ፥ ባ ዎይቱዋ ኤካና። 15 ሽን ኦደ ኦሶይካ ታማን ፁገትኮ፥ ሄ ኡራስ ዎይቶይ ባዋ። ግዶሽን፥ እ ባ ሁጰን ታማፐ ከስ ኤክዳ አሳዳ አታና።

16 ህንተ ፆሳ ኬ ግደይሳነ ፆሳ አያን ህንተናን ደኤይሳ ኤረከቲ? 17 ኦንካ ፆሳ ኬ ላልኮ፥ ፆሲ እያ ላላና። ፆሳ ኬ ጌሽ፤ ሄ ኬይካ ህንተና።

18 ኦንካ ባና ጭሞፎ። ሀ ሳኣ ጭንጫተን ባና ጭንጫ ኦድ ኤክያ ኦንካ ፆሳ ስንን ጭንጫ ግዳናዉ ኤያ ግዶ። 19 ሀ ሳአ ጭንጫተይ ፆሳ ስንን ኤያተ። ጌሻ ማፃፋን፥

"ፆሳይ ጭንጫታ ኤንታ ገነ ቆፋን ኦይኬስ" ያጌስ።✝3:19 እዮ 5:13.

20 ቃስ፥ "ጭንጫታ ቆፋይ ማዶናባ ግደይሳ ጎዳይ ኤሬስ" ያጌስ።✝3:20 ማዝ 94:11.

21 ሄሳ ግሾ፥ ኡባይ ህንተባ ግድያ ግሾ፥ ኦንካ አሳን ጬቀቶፎ። 22 ጳዉሎስ፥ አጵሎስነ ጰፅሮስ፥ ሀ አላመይ፥ ደኦይ፥ ሀይቆይ፥ ሀእ ደኤይ፥ ስንፈ ያናይስ፥ ኡባይ ህንተሳ። 23 ህንተ ክርስቶሳሳ፤ ክርስቶስ ፆሳሳ።