1 ህንተ ታዉ ፃፍዳ ዳብዳብያስ ዛሮይ ሀይሳ። እስ አስ ማጫስ ቦቾና አግኮ ሎኦ። 2 ሽን ላይማተፈ አታናዉ እስ እስ አደይ ማቾ ኤኮ፤ ቃስ እስ እስ ማጫሳስ አዝን ደኦ።

3 አዝናይ ባ ማቼስ፥ ቃስ ማችያ ባ አዝናስ በሲያባ ኩን። 4 ማቼስ ባ አሳተ ቦላ ማት ባዋ፥ ሽን ማት እ አዝናሳ። ሄሳዳካ፥ አዝናስ ባ አሳተ ቦላ ማት ባዋ፥ ሽን ማት ማቸሳ። 5 ህንተ ዎሳን ጉ ዎደ ጋምአናዉ ዞረተን ግዶና እፅኮ፥ እሶይ እሱዋ ድጎፍተ። ሄሳ ጋሶን ህንተናተ ሃራናዉ ፆነትን፥ ፃላሄይ ህንተና ፓጮና መላ እስፈ ደእተ። 6 ሽን ታኒ ህንተና ዞራናዉ ሀይሳ ጋይስፐ አትሽን፥ ኪታ ግደና። 7 አስ ኡባይ ታዳ ማቾ ኤኮና ደእያኮ ዶሳይስ፥ ሽን ፆሲ እሱዋስ እሱዋስ እምዳ ዱማ እሞት ደኤስ። እሱዋስ ሀይሳ መላ ሀንኩዋስ ሄሳ መላ እሞት ደኤስ።

8 ማቾ ኤክቦናይሳታስነ አዝና ገልቦናይሳታስ ቃስ አምኤታስ ታኒ ኦደይ፥ ታዳ ደእተ ጋዳ ዞራይስ። 9 ሽን አሞን ፁገተይሳፈ ኤከይስነ ገለይስ ሎኦ ግድያ ግሾ፥ ኤንቲ ባንታና ሃራናዉ ዳንዳኦና እፅኮ፥ ኤኮነ ገሎ።

10 ታኒ ኤክዳይሳታነ ገልዳይሳታ ሀይሳዳ ጋዳ ዞራይስ፤ ታና ግድከ ጎዳይ ኪቴስ፤ ማችያ ባ አዝናፐ ሻከቶፎ።✝ 11 ሽን ሻከትኮ ሀራ አዝና ገሎና ባርካ ደኦ ዎይኮ ባ አዝናራ ስገቶ። አዝን ባ ማችዉ ብሎፎ።

12 ሽን ሀራታስ ጎዳ ግዶናሽን፥ ታኒ ሀይሳዳ ጋይስ። አማኖና ማቻ ደእያ አማንያ አዝን ደእኮ፥ እያ ማችያ እያራ እስፈ ዳናዉ ኮይኮ እዮ ብሎፎ። 13 ቃስ አማኖና አዝን ደእያ አማንያ ማቻ ደእኮ፥ እ አዝናይ ኢራ እስፈ ዳናዉ ኮይኮ እያፐ ብለቶፎ። 14 አማኖና አዝን ባ አማንያ ማቸ ባጋራ ፅሌስ፤ ቃስ አማኖና ማችያ ባ አማንያ አዝና ባጋራ ፅላዉሱ። ሄስ ባይነኮ፥ ህንተ ናይት ቱና ግዶሶና፥ ሽን ሀእ ኤንቲ ጌሽ። 15 ሽን አማኖና አዝናይ ዎይኮ ማችያ ብላናዉ ኮይኮ ብሎ። አማንያ ማችያ ዎይኮ አዝናይ ሄሳ መላባን ቃሸቶኮና። ፆሲ ኑና ሳሮተን ዳና መላ ፄግስ። 16 ነኖ፥ አማንያ ማቸተ፥ ኔኒ አማኖና ነ አዝና አሻነኮ አይ ኤራይ? ዎይኮ አማንያ አዝናዉ፥ ኔኒ አማኖና ነ ማችዉ አሻነኮ አይ ኤራይ?

17 እስ እስ አስ ጎዳይ እያዉ እምዳ እሞታዳነ ፆሳይ እያ ፄግዳይሳዳ ደኦ። ዎሳ ኬ ኡባን ታኒ ታማርስያ ዎጋይ ሀይሳ። 18 ኦንካ ቃፃረትድ ፄገትዳባ ግድኮ፥ ቃፃረቶናዳ ሀኖፖ። ቃፃረቶና ፄገትዳ ኦንካ ደእኮ፥ ቃፃረታናዉ ኮዮፖ። 19 ፆሳ ኪታ ፖላናዉ በሴስፐ አትሽን፥ ቃፃረትን ቃፃረቶና አግን አይኮካ ማደና።

20 እስ እስ አስ ፆሳይ ባና ፄግያ ዎደ ደኤይሳዳ ደኦ። 21 ፆሳይ ነና ፄግያ ዎደ ኔኒ አይሌ? አይኮይ ባዋ ሄሳስ ኡንኤቶፋ። ሽን ኔኒ አይለተፈ ላአ ከያናዉ ዳንዳእኮ ላአ ከያ። 22 አይለ ግድድ ደእሸ ጎዳን ፄገትዳ አስ ጎዳን አይለተፈ ላአ ከይስ። ሄሳዳካ፥ አይለ ግዶና ደእሸ፥ ጎዳን ፄገትዳ አስ ክርስቶሳ አይለ። 23 ፆሳይ ህንተና ጋተን ሻምዳ ግሾ አሳ አይለ ግዶፕተ። 24 ታ እሻቶ፥ ህንተ እሶይ እሶይ ፄገትያ ዎደ ደእያ ደኡዋን ፆሳራ እስፈ ደእተ።

25 ጌላኦታባ ጎዳይ ታና ኪትዳባይ ባዋ። ሽን ጎዳይ ታዉ እምዳ ማሮተ መላ ታኒ ህንተና ዞራይስ። 26 ህዛ፥ ሀእ መቱዋ ግሾ፥ ኤኮና ዎይኮ ገሎና ዱስ ታዉ ሎኦ ዳኔስ። 27 ነ ማቾ ኤክዳባ ግድኮ፥ ሻከታናዉ ኮዮፓ። ኔኒ ማቾ ኤካቦናባ ግድኮ፥ ኤካናዉ ኮዮፓ። 28 ሽን ነ ማቾ ኤክኮ ናጋር ባዋ። ሄሳዳ ጌላእያ አዝና ገልኮ ናጋር ባዋ። ሽን ኤክያ ገልያ አሳስ ሀ ሳአን ዳሮ መቶይ ደእያ ግሾ ህንተ ሄሳፈ አታና መላ ታኒ ኮያይስ።

29 ታ እሻቶ፥ ታ ገይ ሄሳ፤ ዎደይ ዉርስ። ህዛፐ ጉየ ማቻ ደኤይ ማቾ ኤኮናዳ ደኦ። 30 ዬከይሳት ዬኮናዳ፥ ኡፋይተይሳት ኡፋይቶናዳ፥ ሻመይሳት አይኮይካ ባይናዳ ባንታና ታይቦ። 31 ሀ ሳኣ ሻሎን ማደተይሳት ማደትቦናዳ ሀኖ። ሀ አላምያ ማላይ አና።

32 ህንተ ህርግ ባይና ዳና መላ ታ ዶሳይስ። ማቾ ኤክቦናይስ ጎዳ ኡፋይሳናዉ ኮያ ግሾ፥ ጎዳባ ቆፔስ። 33 ሽን ማቾ ኤክዳይስ ባ ማችዉ ኡፋይሳናዉ ኮያ ግሾ፥ ሀ ሳአባ ቆፔስ። 34 እያ ቆፋይ ናምአን ሻከቴስ። አዝና ገላቦና ጌላእያ ባ አሳተንነ ባ ሸምፑዋን ጌያዳ ጎዳ ኡፋይሳናዉ ኮያ ግሾ፥ ጎዳባ ቆፓዉሱ። ሽን አዝና ገልዳራ ባ አዝና ኡፋይሳናዉ ኮያ ግሾ፥ ሳአባ ቆፓዉሱ። 35 ታኒ ሄሳ ህንተዉ ኦደይ፥ ህንተ ማደታና መላሳፈ አትሽን፥ ህንተና ኡንኤናዉ ግደና። ሽን ህንተ ቆፋይ ሻከቶና ማራን ደእድ ጎዳ ኡፋይስያባ ህንተ ኦና መላ ታኒ ኦዳይስ።

36 ኦንካ ባ ኦይችዳ ጌላኤስ ገሎ ዎደይ አስ ግድ እዮ አጋናዉ ቆፕኮ፥ ሄስ ቃስ እዉ ሎኦ ግዶናይስ እያዉ ስኤትኮ፥ ባ ኮይዳይሳ ኦ፤ ኤንቲ ኤከቶ፥ ገለቶ፤ ሄሳን ናጋር ባዋ። 37 ሽን እስ አስ ኡንኤያባይ ይን፥ ባ ዎዛናን ምንድ፥ ባና ሃርድ፥ ባ ኦይችዳ ጌላእዉ ኤከናዉ አጋናዉ ኮይኮ ሎይስ። 38 ሄሳ ግሾ፥ ጌላእዉ ኤክያ ኡራይ ሎይስ፤ ቃስ ኤኮና ኡራይ ዳሮ ሎይስ።

39 ማችያ ባ አዝናይ ፓፃ ደእያ ዎደ ኡባን እያራ ቃሸታሱ። ሽን እ አዝናይ ሀይቅኮ፥ ባ ዶስዳ አዝና ገላናዉ ዳንዳአዉሱ። ግዶሽን፥ እያ ገልያ አደይ አማንያ አስ ግዳናዉ በሴስ። 40 ታ ቆፋን ግድኮ፥ እያ ገሎና ደእኮ ኡፋይሳን ዳና። ቃስ ታዉ፥ ታ ቦላ ፆሳ አያን ደእያ ዳኔስ።