1 ህዛ፥ ኢታተ ኡባ፥ ጭሞ ኡባ፥ ጩቦተ ቃናተነ ዝግርስ ኡባ ህንተፈ ድግተ። 2,3 ጎዳይ ኬሀ ግደይሳ ህንተ ኤርድ ሜዘትዳይሳዳ ሀእ የለትዳ ጉ ናይታዳ ህንተ አቶተን ድጭሸ ባናዉ ፆሳ ጌሻ ቃላ ማ ኡባ ዎደ አሞትተ።✝

4 አሳን ቦረትድ ፆሳን ዶረትዳ አልኦ ግድዳ ደኦ ሹቻ፥ ጎዳ የሱሳኮ ሺቅተ። 5 ህንተ አያና ኬ ኬፀትያ ደኦ ሹቻታ። ህንተ የሱስ ክርስቶሳ ባጋራ ፆሳ ኡፋይስያ አያና ያርሾ ያርሽያ ጌሻ ካህነታ። 6 ጌሻ ማፃፋን፥

"ሄኮ፥ ታኒ ፅዮነ ካታማን ጎዳ ፃጱዋ ምንያ፥

ዶረትዳ፥ አልኦ ሹቻ ዎስ፤

እያን አማንያ ኦንካ ዬላተና"

ያጌስ።✝ 7 ሀ ሹቻይ ህንተዉ አማነይሳታስ አልኦ፥ ሽን አማኖናይሳታስ፥

"ግምበይሳት ካድ እፅዳ ሹቻይ

ጎዳ ፃጱዋ ምንያ፥

ኡባፈ አያ ሹቹ ግድስ።"✝

8 ቃስካ፥

"ሀ ሹቻይ አሰ ብያ ሹቻነ አሰ ኩንድስያ ዛላ"

ያጌስ። ኤንቲ ሄሳስ ቃደትዳ ግሾ ፆሳ ቃላ ኪተቶና እፅድ በትዶሶና።✝

9 ሽን ፆሳይ ማፐ ማላልስያ ባ ፖኡዋኮ ህንተና ፄግዳይ፥ ህንተ እያ ሎኦተ ሀራታስ ኦዳናዉ ዶረትዳ ኮቸ፥ ካዎ ካህነ፥ ጌሻ ደረነ ፆሳ ዱማ ደረ።✝ 10 ህንተ ካሰ ፆሳ ደረ ግደከታ፥ ሽን ሀእ ህንተ እያ ደረ። ህንተ ካሰ ማሮተ ደምበከታ፥ ሽን ሀእ ማሮተ ደምደታ።✝

11 ታ እሻቶ፥ ህንተ ሀ ሳአን እማነ በተ አስ ግድዳይሳዳ ህንተ ሸምፑዋ ኦልያ አሾ አሞፐ ሃካና መላ ታኒ ህንተና ዎሳይስ። 12 አማኖና አሳይ ህንተና ኢታ ኦያ አሳዳ ዝግርያ ዎደ ፆሳይ ኑና በአናዉ ያ ጋላስ፥ ኤንቲ ህንተ ሎኦ ኦሱዋ በእድ ፆሳ ጋላታና መላ ህንተዉ ሎኦ ደኦይ ደኦ።

13 ጎዳ ግሾ ግድ ማታራ ደእያ አሳታስ ሃረትተ፤ ኡባፈ ቦላ ግድያ ግሾ ካዋስካ ሃረትተ። 14 ኤንቲ ኢታ ኦይሳታ ሴራናዉነ ሎኦ ኦይሳታ ሳባናዉ ካዉዋፐ ኪተትዳ ግሾ ደርያ አይሰይሳታስ ሃረትተ። 15 ህንተ፥ ህንተ ሎኦ ኦሱዋን ኤሮና ኤያ አሳ ዶና ኦይናይስ ፆሳ ሸነ። 16 ፆሳ አይለ ግድድ ላአተን ደእተፐ አትሽን፥ ህንተ ላአተ ኢታ ኦሶስ ካማ ኦፍተ። 17 አሳ ኡባ ቦንችተ፤ አማንያ አሳ ሲቅተ፤ ፆሳ ያይተ፤ ካዎ ቦንችተ።

18 አይለቶ ሎኦ ጎዳታስነ ኬሀ ጎዳታ ፃላላስ ግዶናሽን፥ ኢታታስካ ቦንቾን ሃረትተ። 19 አስ ፆሳ ግሾ ግድ በሶና ዋየ ዋየትኮ ፆሳይ እያ አንጃና። 20 ሽን ህንተ ናጋራ ኦን ህንተና ደችያ ዎደ ህንተ ዳንዳእኮ ህንተዉ አይ ጋላት ደኢ? ሽን ሎኦባ ኦድ ዋየ ዳንዳእኮ ፆሳይ ህንተና ሄሳስ አንጃና። 21 ፆሳይ ህንተና ፄግዳይ ሄሳ ግሾሳ፤ ክርስቶስ ህንተዉ ዋየትስ፤ ህንተ እያ ካላና መላ፥ ህንተዉ ሌምሶ ግድስ። 22 እ ናጋራ ኦቤና፤ እያ ዶናን ዎርዶይ በንትቤና።✝ 23 ኤንቲ እያ ጫይያ ዎደ፥ ዛሪድ ጫይቤና። ሽን ዋየ ኤክሸ ፅሎ ፕርድያ ፆሳስ ባ ፕርዳ አጋግስፐ አትሽን፥ ማንድቤና።✝ 24 ኑኒ ናጋራስ ሀይቅድ ፅሎተስ ዳና መላ ክርስቶስ ባ አሹዋን ኑ ናጋራ ማስቃልያ ቦላ ቶክስ፤ ህንተ እያ ማዱንን ፓፅደታ።✝ 25 ካሰ ህንተ ኦገ ባልድ ይዳ ዶርሳታ መላ፥ ሽን ሀእ ህንተ ሸምፑዋ ሄመይሳኮነ ናገይሳኮ ስምደታ።✝