1 ታ እሻቶ፥ ኑኒ ህንተኮ ብዳይ መላ ግዶናይሳ ህንተ፥ ህንተ ሁጰን ኤሬታ። 2 ሽን ኑኒ ህንተኮ ተሰሎንቀ ያናፐ ስን ፍልጵስዩሳ ካታማን ዋየትዳይሳነ ጫየትዳይሳ ህንተ ኤሬታ። ዳሮ እፆይ ደእኮካ ህንተዉ እያ ዎንገላ ኦዳና መላ ፆሳይ ኑስ ምኖተ እሚስ።✝ 3 ኑኒ ህንተና ዞርዳይ ባለን ዎይኮ ጭሞን ዎይኮ ገነን ግደና።

4 ሽን ፆሳይ ኑናን አማነትድ ባ ዎንገላ ኦዳና መላ ኑስ ሀዳራ እምዳ ግሾ ኦዶስ። ኑ ሄሳ ኦይ ኑ ዎዛና በእያ ፆሳ ኡፋይሳናሳፈ አትሽን፥ አሰ ኡፋይሳናሳ ግደና። 5 ኑ ሚሸ ያርድ ዎርዶ ህንተና ሳቢሸ ህንተኮ ዮናይሳ ሎይድ ኤሬታ፤ ፆሳይ ኑስ ማርካ። 6 ኑኒ ህንተፈ ግድን ዎይኮ ሀራ አሳ ኦደፈካ ቦንቾ ኮይቦኮ። 7 ኑኒ ክርስቶሳ ሀዋረ ግደይሳዳ ኑስ ኮሽያባ እምተ ግድ ኤካናዉ ዳንዳኦስ፥ ሽን አይያ ባ ናይታ ድቸይሳ መላ ህንተ ግዶን አሽከ ግድዳ። 8 ኑ ህንተና ዶስዳ ግሾ ፆሳ ዎንገላ ህንተዉ ሻኮ ፃላላ ግዶናሽን፥ ኑ ደኡዋካ ህንተዉ እማናዉ ጊግዳ። ህንተ ኑስ ዳሮ አልኦ። 9 ኑ እሻቶ፥ ኑ ኦሱዋነ ኑ ዳቡራ ኤሬታ። ህንተዉ ፆሳ ዎንገላ ኦድሸ፥ ህንተና ዋይሶና መላ ቃማነ ጋላስ ኦዳ።

10 ኑ ደኦይ ህንተ አማነይሳታ ማታንነ ፆሳ ስንን ጌሽ፥ ፅሎነ ቦረቶናይሳ ግደይሳስ ህንተ ማርካ። 11 ኑኒ ህንተዉ ሁጰን ሁጰን የልዳይሳት ባንታ ናይታስ ሀነይሳዳ ሀንዳይሳ ኤሬታ። 12 ኑ ህንተና ዞርዳ፥ ምንዳ። ቃስ ባ ካዎተነ ባ ቦንቹዋ ሻካናዉ ህንተና ፄግያ ፆሳ ኡፋይስያ ደኦ ህንተ ዳና መላ ህንተዉ ምንድ ኦድዳ።

13 ህንተዉ ኑኒ ፆሳ ቃላ ኦድዳ ዎደ አሳ ቃላዳ ግዶናሽን፥ ፆሳ ቃላዳ ስእድ ኤክዳ ግሾ ኑኒ ኡባ ዎደ ፆሳ ጋላቶስ። እ ቱማ ፆሳ ቃላ፤ ፆሳ ቃላይ አማንያ ህንተናን ኦስ።

14 ታ እሻቶ፥ ህንተ ይሁዳ ቢታን ደእያ ዎሳ ኬታነ ያን ክርስቶስ የሱሳ ካልያ አሳታዳ ሀንደታ። ኤንታ አይሁደት ዋይስዳይሳዳ ህንተናካ ህንተ ቢታ አሳይ ዋይስዶሶና።✝ 15 ሄ አይሁደት ጎዳ የሱሳነ ናበታ ዎዶሶና፤ ቃስ ኑና ጎድዶሶና። ኤንቲ ፆሳ ኡፋይሶናይሳታነ አሰ ኡባ እፀይሳታ።✝ 16 ኤንቲ ሀር አቶሽን፥ አይሁደ ግዶና አሳይ አታና መላ ኑኒ ኤንታዉ ቃላ ኦደይሳ ድጎሶና። ሄሳዳ ሀንድ ኤንታ ናጋራ ፁአይ ኩማና ጋካናዉ ኡባ ዎደ ናጋራ ኦሶና። ዉርሰን፥ ፆሳ ሀንቆይ ኤንታ ቦላ ዎስ።

17 ሽን ኑ እሻቶ፥ ኑኒ ኑ ቆፋን ግዶናሽን፥ አሾን ህንተፈ ሻከትድ ጉ ዎደ ጋምእዳይሳን ህንተና ዳሮ ላሞትድ በአናዉ ኮይዳ። 18 ኑ ስም ህንተኮ ባናዉ ኮይዳ። ታኒ ታ ሁጰን ህንተኮ ባናዉ ኮያስ፥ ሽን ፃላሄይ ኑና ድግስ። 19 ህዛ፥ ኑ ጎዳ የሱስ ክርስቶሲ ያ ዎደ፥ ኑ ኡፋይሳይ ዎይኮ ኑ ጬቀትያ ኑ ካላቻይ ኦኔ? ህንተና ግደከትዬ? 20 ቱማ ህንተ ኑ ቦንቾነ ኑ ኡፋይስ።