1 ሄሳ ግሾ፥ ኑስ ገንጫናዉ ዳንዳኤቶና እፅን፥ አቴና ካታማን ኑርካ አታናዉ ቆፋ ቃችዳ።✝3:1 ሀዋ 17:15. 2 ህንተና ዞራናዳነ አማኖን ህንተና ምንናዳ ኑራ እስፈ ፆሳስ ኦይሳነ ክርስቶሳ ዎንገላ ኦድያ ኑ እሻ ፅሞትዮሳ ህንተኮ ኪትዳ። 3 ህንተና ጋክዳ ጎዳን ህንተፈ ኦንካ ጉየ ስሞፎ። ሄ ጎዳይ ኑስ ፆሳ ሸነ ግደይሳ ህንተ፥ ህንተ ሁጰን ኤሬታ። 4 ኑ ህንተራ ደእያ ዎደ ጎድ ጋካናይሳ ህንተዉ ኮይሮትድ ኦድዳ። ህንተ ኤረይሳ መላ ሄሳዳ ሀንስ። 5 ሄሳ ግሾ፥ ታዉ ገንጫናዉ ዳንዳኤቶና እፅን፥ "ኦን ኤር ፃላሄይ ኤንታ ፓጭድ ኑ ዳቡራ መላ አሾና አገና" ጋዳ ህንተ አማኑዋባ ኤራናዉ ፅሞትዮሳ ህንተኮ ኪታስ።

6 ሀእ ፅሞትዮስ ህንተ ማታፐ ይድ፥ ህንተ አማኑዋባነ ህንተ ሲቁዋባ ሎኦ ዎረ ኑስ ኦድስ። ቃስ ህንተ ኡባ ዎደ ኑስ ሎኦ ቆፐይሳነ ኑኒ ህንተና በአናዉ ላሞተይሳዳ ህንተካ ኑና በአናዉ ላሞተይሳ እ ኑስ ኦድስ።✝3:6 ሀዋ 18:5. 7 ታ እሻቶ፥ ኑና ጋክያ ዋያንነ ኑ መቶ ኡባን ህንተ አማኑዋ ግሾ ህንተናን ምነትዳ። 8 ህንተ ጎዳን ምንድ ደእኮ ኑካ ደኦን ደኦስ። 9 ህዛ፥ ኑኒ ህንተ ጋሶን ደምዳ ኡፋይሳስ ፆሳ ዋት ጋላትኖ? 10 ኑኒ ህንተና በአናዉነ ህንተ አማኑዋን ፓጭዳባ ኩንናዉ ቃማነ ጋላስ ኑ ኩመ ዎዛናን ፆሳ ዎሶስ።

11 ፆሳይ ኑ አዋይ ባ ሁጰንነ ኑ ጎዳይ የሱስ ክርስቶሲ ኑ ህንተኮ ባና ኦግያ ጊግሶ። 12 ኑ ህንተና ዳሮ ዶሰይሳዳ ጎዳይ ህንተ እሶይ እሱዋ ሲቅያ ሲቆነ አሰ ኡባ ሲቅያ ሲቆ ህንተዉ ዳርሶነ ጉጆ። 13 ኑ ጎዳይ የሱስ ክርስቶሲ ባ ጌሻታራ ያ ዎደ ፆሳ፥ ኑ አዋ ስንን ህንተ ዎዛናይ ጌሽነ ቦረይ ባይናይሳ ኦድ እ ህንተና ምንና።