1 ሀ ኡባ ታ ዎዛናን ቆፕዳፐ ጉየ ጭንጫትነ ፅሎት፥ ኤንታ ኦሶት ፆሳ ኩሸን ደኦሶና ጋዳ ኩያስ። ሽን ሲቆ ግድን ዎይኮ እፆ አይብ እያ ናግያኮ ኦንካ ኤረና። 2 ዱማተ ባይና ኡባ ጋክያ ቃዳይ እስኖ፤ ፅሎ ግድን ጌላ፥ ሎኦ ግድን ኢታ፥ ቱና ግድን ቱና ግዶና እፅን፥ ያርሾ ያርሸይሳ ግድን ያርሾናይሳ ኡባ ቃዳይ እስኖ። ሎኦ አሳስ ናጋራንቹዋፈ ሎእያ ቃድ ባዋ፤ ጫቆ ያየይስ ያዮናይሳፈ ዱማተና።

3 አሳ ኡባ ቃዳይ እስኖ ግደይስ፥ ሀ ሳአን ደእያ ሀራ ኢታተ መላ ዳሮ ኢታ። አስ ደኦን ደእዳ ላይ ኡባን እያ ዎዛናይ ኢታተንነ ጎሻተን ኩምድ ደኤስ፤ ዉርሰን ሀይቅድ አጌስ። 4 ሀይቅዳ ጋሞፈ ፓፃ ደእያ ካን ሎኦ፤ ደኦን ደኤይሳታራ ደእያ ኡራስ ኡፋይስ ደኤስ።

5 ደኦን ደእያ አሳት እስ ቶሆ ሀይቃናዉ ደኤይሳ ኤሮሶና፤ ሽን ሀይቅዳይሳት እስባካ ኤሮኮና። ኤንቲ ዶገትዳይሳታ ግድያ ግሾ አይኮካ ማዶኮና። 6 ኤንታ ሲቆይ፥ እፆይነ ቃናተ ኡባይ ኤንታራ እስፈ ዬስ። ህዛፐ ጉየ ሳሎፐ ጋርሳን ሀንያባ ኡባን መርናዉ ኤንታዉ ቃድ ባዋ።

7 ባ፥ ነ ካ ኡፋይሳን ማ፤ ነ ዎይነ ኡሻ ነ ዎዛናይ ኡፋይትን ኡያ። ፆሳይ ሄሳ ነዉ ካሰፐ ጊግስድ ዎስ። 8 ኡባ ዎደ ነ ማኦይ ቦ ግዶ፤ ነ ሁጰን ዛይተ ትያ። 9 ሳሎፐ ጋርሳን ፆሳይ ነዉ እምዳ ሀ ሀዳ ደኡዋን፥ ሀዳ ግድዳ ነ ቃማታን ነ ሲቅያ ነ ማቸራ ኡፋይታዳ ደአ። ኔኒ ሳሎፐ ጋርሳን ዳቡራዳ ኦዳባ ኡባፈ ነና ጋክያ ሳማይ ሄሳ። 10 ነ ኩሸይ ኦናዉ ደምዳባ ኡባ ነ ኩመ ዎልቃን ኦ፤ ኔኒ ባና ዱፉዋን ኦሶይ ዎይኮ ሀልቾይ ዎይኮ ኤር ዎይኮ ጭንጫተ ባዋ።

11 ታኒ ሳሎፐ ጋርሳን ሀራባ በአስ። ሄስካ፥ ኤሶን ዎፀይሳት ኡባ ዎደ ፆኖኮና፤ ምኖ ኦላንቾት ኡባ ዎደ ኦላን ካንኮና፤ ጭንጫት ኡባ ዎደ ካ ደሞኮና፤ ሂላንቾት ኡባ ዎደ ዱረቶኮና፤ ታማርዳ አሳት ኡባ ዎደ ሳበቶኮና። ሽን ኡባ ቃድነ ዎደይ ጋዳይሳዳ ሀኔስ።

12 ግዶሽን ሄ ዎደይ አዉደ ያነኮ ኤራናዉ ዳንዳእያ አስ ባዋ። ካፎይ ፅሄን ገለይሳዳ ዎይኮ ሞሎይ ግተን ኦይከተይሳዳ አስ ኡባይ ቆፖና ጋክያ ኢታ ዎደን ኦይከቴስ።

13 ሳሎፐ ጋርሳን ታኒ በእዳባ ሀራባይ ደኤስ። ሄስካ ጭንጫተ ግታ ሌምሶ ግደይሳ። 14 ጉ አስ ደእያ እስ ጉ ካታምያ ደአዉሱ። ሄ ካታምዉ እስ ዎልቃማ ካዎይ ኦላናዉ ደንድስ፤ እዮ ተቅድ ኦይክስ። 15 ሄ ካታመን ማንቆ ግድዳ እስ ጭንጫ አደይ ደኤስ፤ እ ባ ጭንጫተን ሄ ካታምዉ አሽስ። ሽን ሄ ማንቆ አድያ ዛሪድ ሀሳይዳይ ባዋ። 16 ታኒ፥ "ጭንጫተ ዎልቃፈ አስ" ያጋስ። ግዶሽን፥ ጭንጫ ግድኮካ ማንቆ አስ ካቴስ፤ እ ኦድያባ ስኤይ ባዋ። 17 ሄስ ሀንኮካ፥ ደርያ ሃረይስ ኤያታ ሺቆን ዋስያ ዋሱዋ ስአናፐ ሎዳራ ኦደትያ ጭንጫ አሳ ቃላ ስኤይስ ሎኦ። 18 ጭንጫተ ኦላ ሚሸፐ አስ፤ ሽን እስ ናጋራንቾይ ዳሮ ሎኦባ ይሴስ።