1 ህንተኖ፥ አኬክ ባይና ጋላትያ አሳቶ፥ ህንተ አይፍያ ስንን ክርስቶስ ማስቃለ ቦላ ካቀትዳ ምስለዳ ቆንጭድ በንቴስ። ያትን፥ ቱማስ ህንተ ኪተቶና መላ ህንተና ብትዳይ ኦኔ?✝ 2 ታ እስባ ኤራናዉ ኮያይስ፤ ህንተ ጌሻ አያና ኤክዳይ ህገ ናግድየ ዎይኮ ህንተ ስእዳ ዎንገላ አማንድ ኤክደቲ? 3 ህንተ ሄሳ መላ ኤዬ? ህንተ ፆሳ አያናን ዶምድ፥ ሀእ ዎልቃን ፖላናዉ ኮዬቲ? 4 ህንተ ዎንገላ ጋሶን ዳሮ ዋየትዳይ መሌ? ሄ ዋየ ኡባይ ጮ ግድዴ? 5 ፆሳይ ህንተዉ ጌሻ አያና እመይነ ህንተ ግዶን ማላታታ ኦይ፥ ህንተ ህገ ናግዳ ግሾየ ዎይኮ ዎንገላ ስእድ አማንዳ ግሾ?

6 አነ አብራሃመ በእተ፥ "እ ፆሳ አማንስ፤ ፆሳይ እያዉ ሄሳ ፅሎተ ኦድ ኤክስ"✝ ጌተትድ ፃፈትስ። 7 ህዛ፥ አማነይሳት አብራሃመ ናይታ ግደይሳ ኤርተ።✝ 8 ፆሳይ አይሁደ ግዶና አሳ አማኖን ፅልሳናይሳ ጌሻ ማፃፋይ በእድ፥ "ካዎተ ኡባይ ነናን አንጀታና" ያግድ፥ ዎንገላ አብራሃመስ ካሰትድ ኦድስ።✝ 9 ሄሳ ግሾ፥ አማንያ ኡባይ አማንዳ አብራሃመራ እስፈ አንጀትዶሶና።

10 ህገ ናግድ ፅላና ግያ ኦንካ ባደትዳይሳ። አይስ ጊኮ፥ ጌሻ ማፃፋን፥ "ህገ ማፃፋን ፃፈትዳ ኡባ ናጎና ኦንካ ባደትዳይሳ ግዶ" ጌተትድ ፃፈትስ።✝ 11 "ፅሎይ አማኖን ዳና" ጌተትድ ፃፈትዳ ግሾ፥ ኦንካ ፆሳ ስንን ህገ ናግድ ፅሎናይስ ኤረትዳባ።✝ 12 ህገይ አማኖን ዘምፐና። ሽን፥ "ህግያ ናግያ ኦንካ ህግያን ደኦን ዳና" ያጌስ።✝

13 "ም ቦላ ካቀትድ ሀይቅያ ኦንካ ባደትዳይሳ" ጌተትድ ፃፈትዳ ግሾ፥ ክርስቶስ ኑ ግሾ ባደትዳይሳ ግድድ፥ ኑና ህገ ባደፈ ዎዝስ።✝ 14 ፆሳይ አብራሃመስ እምዳ አንጆይ፥ የሱስ ክርስቶሳ ባጋራ አይሁደ ግዶና አሳ ጋካና መላነ ፆሳይ እማና ግዳ ጌሻ አያና ኑኒ አማኖን ኤካና መላ ሄሳ ኦስ።

15 ታ እሻቶ፥ ታ ህንተዉ አሳ ደኦን ሜዘ ግድድ ደእያባ ሌምሶ ኦዳ ኦዳይስ። አስ ጫቅዳ ጫቆይ ምንዳፐ ጉየ፥ ኦንካ ሄ ጫቁዋ ሻራናዉ ዎይኮ እያ ቦላ ሀራ ጉጃናዉ ዳንዳኤና። 16 ፆሳይ ሄ ኬከ ቃላ አብራሃመስነ እያ ዘረስ እሚስ። ጌሻ ማፃፋይ፥ ዳሮ አሳስ ኦድያዳ፥ "ነ ዘረታስ" ጌና። ሽን እስ አሳስ ኦድያዳ፥ "ነ ዘረስ" ያጌስ፤ እካ ክርስቶሳ።✝

17 ታኒ ገይ ሀይሳ፤ ኦይዱ ፄታነ ሀስታሙ ላይፈ ጉየ እመትዳ ህገይ፥ ኮይሮ ፆሳይ ምንዳ ጫቁዋ ሻርድ ኡፋይሳ ቃላ ይሳናዉ ዳንዳኤና።✝ 18 ፆሳይ እምያ ላታይ ህገን ኤከትያባ ግድያኮ ፆሳይ እምዳ ኡፋይሳ ባጋራ ግደይስ አቴስ። ሽን ፆሳይ ባ አ ኬሀተን ላታ አብራሃመስ ኡፋይሳ ቃላ ባጋራ እሚስ።✝

19 ያትን፥ ህገይ አይስ እመትዴ? ህገይ እመትዳይ፥ አብራሃመስ ኡፋይሳ ቃል እመትዳ ኮቻይ ያና ጋካናዉ ኢታ ኦሶይ አይበኮ ኤርሳናሳ። ህገይ ኪታንቾታ ባጋራ እመትድ፥ ግዶ ግድድ ስገያ እስ አሳ ባጋራ ኦሶ ቦላ ፔእስ። 20 ግዶ ግድድ ስገያ ኡራይ እስ አሳ ፃላላስ ግደና፥ ሽን ፆሳይ እስኖ።

21 ያትን፥ ህገይ ፆሳ ኡፋይሳ ቃላራ ኤቀትዬ? አካይ፥ ግደና! ህገይ እመትዳይ አሳስ ደኦ እማናዉ ግድያኮ፥ ፅሎተ ህገ ባጋራ በንታናሽን። 22 ሽን የሱስ ክርስቶሳ አማንን በንትያ ኡፋይሳ ቃላይ አማነይሳታስ እመታና መላ ኩመ አላመይ ናጋራስ ሃረትድ ደኤይሳ ጌሻ ማፃፋይ ኦዴስ።

23 ሽን አማኖይ ያናፐ ካሰ ህገይ ኑና ቃች ዎስ። ሄ አማኖይ ቆንጫና ጋካናዉ ህገይ ኑ ቦላ ጎርድ ዎስ። 24 ሄሳ ግሾ፥ ኑኒ አማኖን ፅላና መላ ክርስቶስ ያና ጋካናዉ ህገይ ናአ ናግያ አሳ መላ ኑና ናገይሳ ግድስ። 25 ሽን ሀእ አማኖይ ይዳ ግሾ፥ ህገይ ህዛፐ ጉየ ናአ ናግያ አሳ መላ ኑና ናገይስ አትስ።

26 ህንተ ኡባይ የሱስ ክርስቶሳ አማንድ ፆሳ ናይታ ግድደታ። 27 ክርስቶሳራ እስኖ ግዳናዉ ፃማቀትዳ ኡባይ ክርስቶሳ ማኦዳ ማእደታ። 28 ህንተ ኡባይ ክርስቶሳን እስኖ ግድያ ግሾ፥ አይሁደ አሳ ግዶንነ ግርከ አሳ ግዶን፥ አይለ ግዶንነ ዎማኖ ግዶን፥ አደ ግዶንነ ማጫሳ ግዶን ዱማተ ባዋ። 29 ህዛ፥ ህንተ ክርስቶሳባ ግድኮ ህንተ አብራሃመ ዛረ። ፆሳ ኡፋይሳ ቃላዳ ህንተ ላተይሳታ።✝