1 ጎዳይ ሙሰ ባጋራ ባ ደርያስ እምዳ ዎጋይ ሀይሳ፤ 2 "ነ እብራወ አይለ ሻምኮ፥ እ ነዉ ኡሱፑን ላይ ኦ፥ ሽን ላፑን ላይን አይኮካ ቃንፆና፥ አይለተፈ ጮ የደቶ። 3 እ ማቾ ኤኮና ሻመትዳባ ግድኮ፥ ባርካ የደቶ። እ ማችድ፥ ሻመትዳባ ግድኮ፥ እያ ማችያካ እያራ የደቶ። 4 እያ ጎዳይ እያዉ ማቾ እምዳባ ግድኮነ ማችያ እያዉ አደ ናይታ ዎይኮ ማጫ ናይታ የልዳባ ግድኮ፥ እያ ማችያነ እ ናይት እያ ጎዳባ ግዶ፤ አደይ ባርካ የደቶ። 5 ሽን አይለይ፥ ‘ታኒ ታ ጎዳ፥ ታ ማችዉነ ታ ናይታ ዶሳይስ’ ግድ አይለተፈ ከያናዉ ኮዮና እፅኮ፥ 6 እያ ጎዳይ፥ ጎዳ ስን እያ አ። ያትድ፥ ፐንገ ዎይኮ ፐንገ ዝዝግያ ማታን እያ ኤስድ፥ እያ ሀይ ጎን ሉኮ። ሄሳፈ ጉየ፥ እ ባ ደኦ ላይ ኡባን እያዉ አይለ ግዶ።

7 "እስ አስ ባ ማጫ ናእዉ አይለተስ ባይዝኮ፥ አደ አይለታ አይለተፈ ከዮፖ። 8 እዮ ሻምድ ማቻናዉ ኤፍዳ ጎዳይ እዮ ዶሶና እፅኮ፥ እ ጎዳይ እዮ ደርያን ዎዝሶ። እ ጎዳይ እ ቦላ ኢታባ ኦዳ ግሾ፥ እዮ አላጋስ ባይዛናዉ ዳንዳኤና። 9 እ እዮ ባ ናኣስ እማናዉ ኮይኮ፥ ባ ማጫ ናአ ኦድ ኤኮ። 10 እ ሀራ ማቾ እ ቦላ ኤክኮ፥ ኮይሮ ማቼስ ካ፥ ማኦነ እንዳስ በሲያ ዎጋ እዉ ፓጭሶፖ። 11 እ ሀ ሄባታ እዉ ኦና እፅኮ፥ አይብ ሚሸካ ቃንፆና አይለተፈ ከያዳ ቦ።"

12 "አሰ ሾጭድ ዎያ ኦንካ ሀይቃናዉ በሴስ። 13 እ ዎናዉ ቆፖና እያፐ ሀይቅያባ ግድኮ፥ እ ባቃትድ አታና በሲ ታኒ እያዉ ጊግሳና። 14 ሽን አስ ቆፕድ ሀራ አስ ዎኮ፥ ሄ ኡራይ ታ ያርሾ በሲ ቢኮ ያፐ ድጋዳ ሀራ በሳን ዎ።

15 "ባ አዋ ዎይኮ ባ አይዉ ደችያ ኦንካ ሀይቆ።

16 "አሰ ባይዛናዉ ዎይኮ ሃራናዉ ዎልቃን ኦይክያ አስ ሀይቃናዉ በሴስ።

17 "ባ አዋ ዎይኮ ባ አይዉ ጫየይ ሀይቆ።

18 "ናምኡ አሳት ኦየትድ፥ እሶይ እሱዋ ሹቻን ጫድድ ቆእኮ፥ ዎይኮ ዡልትኮ፥ ሄ ደሸትዳይስ ሀይቆና አትድ ሀርግድ ሂፃን ፔእኮ፥ 19 ደንድድ ጉፈትድ ካረ ሄራን ሄመትኮ፥ ሄ ደችዳይስ ሀይቆፐ አቴስ። ግድኮካ እ እያ ኦሶፐ አሽዳ ግሾ፥ አጫናዉነ ፓፃና ጋካናዉ ሀርግሳናዉ ኮሼስ።

20 "እስ አስ ባ አደ አይልያ ዎይኮ ማጫ አይልዉ ፃምአን ሾጭድ ዎኮ ሴረታናዉ በሴስ። 21 ሽን ሄ አይለይ እስ ዎይኮ ናምኡ ጋላሳ ግዶን ሀይቆና እፅኮ፥ እያ ጎዳይ ሴረቶፎ። ሄ አይለይ እያ ሻሎ ግድያ ግሾ እያ ሀይቆይ ባዉ ሴራ።

22 "ናምኡ አሳት እሶይ እሱዋራ ዋትድ ቃንፃትዳ ማጫስዉ ደችድ፥ እያ ቦሸታና መላ ኦኮ፥ ሀራ ኢታ ቆሆ ጋና እፅኮ፥ ሄ ደችዳ ኡራይ፥ ሄ ማቸ አዝናይ ኦይችያ አጫ ዳይናት ፕርድኮ ጭጎ። 23 ሽን ሄ ማጫሰ ደሸይ ዳርኮ፥ ሸምፖ ግሾ ሸምፖ፥ 24 አይፈ ግሾ አይፈ፥ አቻ ግሾ አቸ፥ ኩሸ ግሾ ኩሸ፥ ቶሆ ግሾ ቶሆ፥ 25 ፁሳ ግሾ ፁስ፥ ማዱን ግሾ ማዱን፥ ቆኦ ግሾ ቆኦ ኤካናዉ ኮሼስ።

26 "እስ አስ ባ አደ አይልያስ ዎይኮ ማጫ አይሌስ አይፈ ባቅድ ቶይስኮ፥ ሄ አይፍያ ግሾ አይለተፈ ከስ የዶ። 27 ሄሳዳካ፥ ባ አይልያ አቸ ዎይኮ ባ አይለ አቸ መንኮ፥ ሄ አቻ ግሾ አይለተፈ ከስ የዶ።

28 "ቦር አሰ ቃይጭድ ዎኮ፥ ሄ ቦራይ ሹቻን ጫደት ሀይቆ። እያ አሾይ ሜተቶፎ፥ ሽን ቦራ ጎዳይ ሴረቶፎ። 29 ሽን ቦራይ ካሰካ ቃይጭያባ ግድኮነ ኮይሮትድ ቦራ ጎዳስ ኦደትን፥ እ ቃቾና እፅዳባ ግድኮ፥ ሄ ቦራይ አሰ ዎኮ፥ ቦራይነ ቦራ ጎዳይ እስፈ ሹቻን ጫደትድ ሀይቆ። 30 ሽን ቦራ ጎዳይ አጫ ቃንፃና መላ ኦይሸትኮ፥ ኤንቲ ኦይችዳባ ቃንፅድ ባ ሸምፑዋ ዎዞ። 31 ቦራይ አደ ናአ ዎይኮ ማጫ ናአ ቃይጭድ ዎኮ ፕርዳይ እያ መላ ግዶ። 32 ቦራይ አደ አይለ ዎይኮ ማጫ አይለ ቃይጭድ ዎኮ፥ ቦራ ጎዳይ አይልያ ጎዳስ ሀስታሙ ብራ ሳንትመ ቃንፆ፤ ቦራይ ሹቻን ጫደትድ ሀይቆ።

33 "እስ አስ ኦላ ቦክድ ካሞና አግኮ ዎይኮ ካማ ደንን ቦር ዎይኮ ሀረይ ሄ ኦላን ዉልኮ፥ 34 ሄ ኦላ ጎዳይ መህያ ጋትያ ቃንፆ። እ እያ ጎዳስ ጋትያ ቃንፅድ፥ ሀይቅዳ መህያ ባዉ ኤኮ።

35 "እስ አሳ ቦር ሀራ አሳ ቦር ጫድድ ዎኮ፥ ፓፃ ቦራ ባይዝድ፥ እያ ሚሽያነ ሀይቅዳ ቦራ አሹዋ ናምአይ ሻክ ኤኮ። 36 ሽን ሄ ቦራይ ካሰካ ቃይጭያባ ግደይሳ ኤርሸ፥ እያ ጎዳይ ቃቾና አግዳባ ግድኮ፥ ሄ ኡራይ እያዉ ቦር ቃንፆ። ያትድ፥ ሄ ሀይቅዳይሳ ባዉ ኤኮ።"