ከሳ ማፃፋ 9

መሄ ቦላ ይዳ ጋዶ

1 ጎዳይ ሙሰኮ፥ "ግብፀ ካዋኮ ባዳ፥ ጎዳይ፥ እብራወታ ፆሳይ ኔኮ፥ ‘ኤንቲ ታዉ ጎይናና መላ ታ አሳ የዳ። 2 ኔኒ የዶና ኤንታ እፅኮ፥ 3 ታኒ ነ ፓራታ ቦላ፥ ነ ሀረታ ቦላ፥ ነ ግማለታ ቦላ፥ ነ መህያ ቦላ፥ ነ ዶርሳታ ቦላነ ነ ዴሻታ ቦላ ኢታ ጋዶ የጋና። 4 ሽን ታኒ ጎዳይ እስራኤለ አሳ መህያ ግዶንነ ግብፀ አሳ መህያ ግዶን ዱማተ መና። እስራኤለ አሳ መህያፐ እሶይካ ሀይቀና። 5 ዎንቶ ታኒ ሄሳ ኦና ግድ ጎዳይ ዎደ ቃንፅስ’ ያጋ" ያግስ።

6 ዎንተ ጋላስ ጎዳይ ግዳይሳዳ ኦስ። ግብፀ አሳ መሄ ኡባይ ሀይቅስ፥ ሽን እስራኤለ አሳ መህያፐ እሶይካ ሀይቅቤና። 7 ካዎይ ሀንዳባነ እስራኤለታ መህያፐ ሀር አቶሽን እሶይካ ሀይቆናይሳ አሰ ኪትድ፥ ኦይችድ ኤርስ። ሽን ሀእካ እያ ዎዛናይ ሙምዳ ግሾ አሳ የዶና እፅስ።

ክፃ ጋዶ

8 ሄሳፈ ጉየ፥ ጎዳይ ሙሰነ አሮና፥ "ጮጨፐ ብዶ ኩጭ ኤክድ፥ ካዎይ በእሽን ቦላ ርጭተ። 9 ሄስ ግብፀ ቢታ ኡባ ቦላ ባና ግድድ ላለታና። ግብፀ ቢታን ደእያ አሳ ቦላነ መሄይ ቦላ ክፃ ጋዶ ኤሀና" ያግስ። 10 ኤንቲ ጮጨፐ ጉ ብዶ ኤክድ ካዉዋ ስንን ኤቅዶሶና። ሙሰይ ሄሳ ቦላ ላልን፥ አሳ ቦላነ መህያ ቦላ ክፃ ጋዶይ ዎ አግስ። 11 ግብፀ አሳ ቦላ ዎዳ ክፃይ ማሮታ ቦላካ ዎዳ ግሾ ሙሰ ስንን ኤቃናዉ ዳንዳእቦኮና። 12 ሽን ጎዳይ ሙሰስ ግዳይሳ መላ፥ ካዎይ ባ ዎዛና ሙምስዳ ግሾ፥ ሙሰነ አሮና ስኦና እፅስ።

ሻቻ ጋዶ

13 ሄሳፈ ጉየ፥ ጎዳይ ሙሰኮ፥ "ካዋኮ ጉራ ደንዳ ባዳ፥ ‘ጎዳይ፥ እብራወታ ፆሳይ፥ ታዉ ጎይናና መላ ታ አሳ የዳ። 14 ሀእ ነ እፃስ ጊኮ፥ ነ ሞርናታነ ነ አሳ ፃላላ ግዶናሽን ነ ቦላካ ኢታ ጋዶ ኤሀና። ሄ ዎደ አላመ ኡባን ጎድ ታ ፃላላ ግደይሳ ኔኒ ኤራና። 15 ታኒ ታ ኩሽያ ደንዳ ነናነ ነ አሳ ጋዶን ሾጭዳባ ግድያኮ ሀእ ጋካናስ ህንተ ቢታ ቦላ ደኤከታሽን። 16 ሽን ታ ሱንይ ቢታ ኡባን ኤረታና መላ ታኒ ታ ዎልቃ በሳናዉ ነና ደኦን ዎስ። 17 ኔኒ ሀእካ ኦቶርታዳ ታ አሳ የዶና እፃዳሳ። 18 ታኒ ዎንቶ ሀኖደ ግብፀ ቢታይ መቶሳፐ ሀች ጋካናዉ ቡክ ኤሮና ዎልቃማ ሻች ቡክሳና። 19 ሀእ ኔኒ ነ መህያነ ካረን ደእያባ ኡባ ኤለ ሶ ገልሳና መላ ኪታ። ሶ ገሎና አሳ ቦላነ መህያ ኡባ ቦላ ሻች ቡክድ፥ ኤንታ ዎና ያጌስ’ ያጋ" ያግስ። 20 ካዉዋ ሞርናታፐ እሶት እሶት ጎዳይ ግዳይሳ ስእድ ያይዳ ግሾ፥ ባንታ አይለታነ ባንታ መሄታ ሶ ገልስዶሶና። 21 ሽን ሀራት ጎዳይ ግዳይሳ ስኦና እፅድ ባንታ አይለታነ ባንታ መህያ ካረን አጋግዶሶና።

22 ሄሳፈ ጉየ፥ ጎዳይ ሙሰ፥ "ግብፀ ቢታ ኡባ ቦላ፥ አሳ ቦላ፥ መህያ ቦላነ ጋደን ደእያ ካ ቦላ ሻች ቡካና መላ ነ ኩሽያ ሳሎ ደን" ያግስ። 23 ሙሰይ ባ ፃምኣ ሳሎ ደንዳ ዎደ፥ ጎዳይ ዎልቃማ ደሾነ ዎልአን የድስ። ሄሳዳ ኦድ ጎዳይ ግብፀን ሻች ቡክስስ። 24 ጎዳይ ገደራ ሃራ ዎልቃማ ዎልአን የድስ። ሄሳ መላባይ ግብፀ ቢታን አስ ዱሱ ኦይኮደፐ ሀን ኤረና። 25 ሄ ሻቻይ ግብፀን ደእያ አሳነ መህያ ሾጭስ። ጋደን ደእያባ፥ ምነ ማታ ኡባ ይስስ። 26 እስራኤለት ደእያ ጌሳመ ቢታ ፃላላን ሻች ቡክቤና።

27 ካዎይ ሙሰነ አሮና ፄግስድ፥ "ታኒ ሀእ ናጋራ ኦስ። ጎዳይ ቱማንቾ፤ ታንነ ታ አሳይ ባላ። 28 ደሾይነ ሻቻይ ኑ ቦላ ዳርድ ኡንኤዳ ግሾ ኑስ ጎዳ ዎስተ። ታኒ ህንተና የዳና፤ ህዛፐ ህንተ ሀይሳን ጋምኤከታ" ያግስ።

29 ሙሰይ እያኮ፥ "ታኒ ሀ ካታማፐ ከይዳ ዎደ ታ ኩሽያ ደንዳ ጎዳ ዎሳና። ደሾይነ ሻቻይ ኤቅያ ዎደ ሳአይ ጎዳባ ግደይሳ ኔኒ ሄሳን ኤራና። 30 ሽን ነነ ነ ሞርናት ሀእካ ጎዳ ፆሳ ያዮናይሳ ታኒ ኤራይስ" ያግስ።

31 ታልባይ ጪሸ፥ ባንጋይ ቆርፃ ግድያ ግሾ ኡባይ ሻቻን ይስ። 32 ሽን ግስተይነ ሙርቃይ ጋክቦና ግሾ ሻቻን ይቤና።

33 ሙሰይ ካዉዋ ማታፐ ከይድ፥ ካታማፐ ጋፃ ብድ ባ ኩሽያ ደንድ ጎዳ ዎስስ። ያትን ደሾይ፥ ሻቻይነ እራይ ኤለስድ ኤቅ አግስ። 34 ሽን ካዎይ ሄ ኡባይ ኤቅዳይሳ በእዳ ዎደ ዛሪድ ናጋራ ኦስ። እያራነ እያ ሞርናታራ ባንታ ዎዛና ጉጅድ ምንዶሶና። 35 ጎዳይ ሙሰ ባጋራ ኦድዳይሳ መላ ካዉዋ ዎዛናይ ሙምን፥ እስራኤለታ የዶና እፅስ።