ካህነታ ማኦ
(ከሳ 28:1-14)
1 ካህነት ጌሻ ዱንካንያን ኦያ ዎደ ማአና ቦንቾ ማኦታ፥ ካሎሰን፥ ኦቻ ቴራ ዳንያ ቃጭናፐነ ዞኦ ቃጭናን ዳድዶሶና። አሮን ማእያ ካህነተ ማኡዋ ጎዳይ ሙሰ ኪትዳይሳዳ ኦዶሶና።
2 ቃስ ኤፉድያ፥ ዎርቃፈ፥ ካሎሰፐ፥ ኦቻ ቴራ ዳንያ ቃጭናፐ፥ ዞኦ ቃጭናፐነ አልኦ ሊኖፐ ዳድዶሶና። 3 ኤንቲ ዎርቃ ቆፅድ፥ ሌእስድ፥ እያ ቃራርድ፥ ቃጭናዳ ከስዶሶና። ያትድ ካሎሰን፥ ኦቻ ቴራ ዳነይሳን፥ ዞኦ ቃጭናንነ አልኦ ሊኖን አሌቅስድ ዳድዶሶና። 4 ኤንቲ ናምኡ ሀሽያራ ዎድ፥ ናምኡ ባጋ ዎል ጋድ ኦይሰናዉ ማድያ ቃንጎታ ኤፉድያስ ኦዶሶና። 5 ጎዳይ ሙሰ ኪትዳይሳዳ፥ ሂላንቾይ አሌቅስዳ ዳንጮይካ ኤፉደይ ኦሰትዳይሳታፐ ኦሰትድ፥ ዎርቃን፥ ካሎሰን፥ ኦቻ ቴራ ዳነይሳን፥ ዞኦ ቃጭናንነ አልኦ ሊኖን ዳደትስ። 6 ኤንቲ ማርግደ ጌተትያ ሹቻታ ጊግስድ፥ ዎርቃፈ ኦሰትዳ ካቁዋ ቦላ ዎዶሶና። ማታመ ቦላ ዎጭድ ፃፈይሳዳ፥ ሄ ሹቻታ ቦላ እስራኤለ ናይታ ሱን ዎጭድ ፃፍዶሶና። 7 ጎዳይ ሙሰ ኪትዳይሳዳ፥ ታማነ ናምኡ እስራኤለ ናይታ ቆፍስያባ ግዳና መላ ኤንታ፥ ኤፉድያ ቃንጎታን ዎዶሶና።
ትራን ማኤትያ ማኦ
(ከሳ 28:15-30)
8 ኤንቲ፥ ትራን ማኤትያ ማኡዋ ኤፉደይ ኦሰትዳይሳታፐ ኦድ፥ ኤፉድያዳ አሌቅስዶሶና። 9 እያዉ ኦይዱ ማዛነት ደኦሶና፤ ጌሳይነ ጎምፓይ እስ እስ ታካ ግድድ፥ ዳኮየቴስ። 10 እያ ቦላ ኦይዱ ማራን እንቆ ጌተትያ አልኦ ሹቻታ ዎዶሶና። ኮይሮ ማራን ሳርድዮነ፥ ቶጳዘነ ጶልያ አልኦ ሹቻታ፤ 11 ናምአን ማራን ባሉረ፥ ሳንፓረነ አልማዘ ጌተትያ አልኦ ሹቻታ፤ 12 ሄን ማራን ያክንተ፥ ከልቀዶነነ አመተስፅኖሳ ጌተትያ አልኦ ሹቻታ፤ 13 ኦይዳን ማራን ብርለ፥ ማርግደነ ያስጵደ ጌተትያ አልኦ ሹቻታ ዎዶሶና። ሄሳታ ኡባ ዎርቃፈ ኦሰትዳ ካቁዋ ቦላ ዎዶሶና። 14 ታማነ ናምኡ ሹቻታ ቦላ እስ እስ እስራኤለ ናይታ ሱንይ ዎጨትድ ፃፈትስ።
15 ትራን ማኤትያ ማኡዋስ ዋላህ ባይና ዎርቃፈ ዎዶሮዳ ዶቃዳ ሳንላታ ኦ። 16 ናምኡ ዎርቃ ካቆታነ ናምኡ ዎርቃ ሳጋዮታ መድ፥ ናምኡ ዎርቃ ሳጋዮታ ትራን ማኤትያ ማኡዋስ ቆሞ ባጋን ደእያ ማዛነታራ ጋድ ኦይሰዶሶና። 17 ሄ ናምኡ ዎርቃ ሳንላታታ ናምኡ ዎርቃ ሳጋዮታራ ጋድ ኦይሰዶሶና። 18 ሄ ሳንላታታ፥ ሀንኮ ባጋ ፄራ፥ ናምኡ ካቆታራ ጋሰዶሶና። ያትድ፥ ኤፉድያስ ስን ባጋራ፥ ሀሽያራ ዎያ ቃንጎታራ ጋድ ቃችዶሶና። 19 ቃስ ናምኡ ዎርቃ ሳጋዮታ መድ፥ ኤፉድያስ ስን ባጋራ ደእያ ትራን ማኤትያ ማኡዋስ፥ ጋ ባጋራ ደእያ ናምኡ ማዛነታ ፄራን አዶሶና። 20 ሄሳዳካ፥ ዎርቃፈ ሀራ ናምኡ ምግዶታ ኦዳ፥ ኤፉድያስ ስን ባጋ ሀሽያራ ዎያ ቃንጉዋስ ጋርሳ ባጋራ፥ ስኩዋ ማታን ዳንጩዋፈ ቆሞ ባጋራ ኦይሰዶሶና። 21 ጎዳይ ሙሰ ኪትዳይሳዳ፥ ትራን ማኤትያ ማኡዋ ቦላ ደእያ ምግዶታ ኤፉድያን ደእያ ምግዶታራ ጋድ፥ ካሎሰ ቃጭና ቃችዶሶና። ትራን ማኤትያ ማኦይ ፄሳፈ ቆሞን ፔእያ ግሾ ቃሾይ ዶልኤና።
ሀራ ካህነ ማኦታ
(ከሳ 28:31-43)
22 ኤፉድያፐ ቦላራ ማኤትያ አዱሳ ማኦይ ኩመ ካሎሰ አፍላፐ ጊግስዶሶና። 23 ሄ አዱሳ ማኡዋስ ሁጰ አያ ሉሆ መድ፥ ፔቶና መላ ጉየ ቃላምእድ፥ ዩሽ አድ ስክዶሶና። 24 አዱሳ ማኡዋስ ዱገ ባጋ ማጫራ ዩሹዋን ካሎሰን፥ ኦቻ ቴራ ዳንያ ዞኦ ቃጭናንነ አልኦ ሊኖን፥ ኦሮማነ ቴራ ምስለታ መዶሶና። 25 ኤንቲ ዋላህ ባይና ዎርቃፈ ዳላታ መድ፥ አዱሳ ማኡዋስ ዱገ ባጋ ጋፃን፥ ኦሮማነ ምስለታ ግዶን ዎዶሶና። 26 ጎዳይ ሙሰ ኪትዳይሳዳ፥ ኦሮማነ ቴራ ምስለታ፥ አዱሳ ማኡዋስ ዱገ ባጋ ማጫራ ዩሹዋን አዶሶና።
27 ኤንቲ፥ ጎዳይ ሙሰ ኪትዳይሳዳ፥ አሮናስነ እያ ናይታስ፥ ሻምዘታ፥ 28 ሁጰ ቃጨታ፥ ኡከታነ ጋ ሱረታ አልኦ ሊኖፐ ዳድድ ጊግስዶሶና። 29 ቃስ ዳንጩዋ ካሎሰን፥ ኦቻ ቴራ ዳንያ ቃጭናን፥ ዞኦ ቃጭናንነ አልኦ ሊኖን አሌቅስድ፥ ጊግስዶሶና።
30 ኤንቲ፥ ጌሻ ካላቻ ምስልያ ዋላህ ባይና ዎርቃፈ መድ፥ እያ ቦላ፥ "ጎዳስ ዱማትስ" ግያ ቃላ ዎጭድ ፃፍዶሶና። 31 ያትድ፥ ጎዳይ ሙሰ ኪትዳይሳዳ፥ ሁጰ ቃጭያ ቦላ ካሎሰ ቃጭናራ ቃችዶሶና።
ኦሶይ ጋፃ ጋከ
(ከሳ 35:10-19)
32 ጌሻ ዱንካንያ ኦሶ ኡባይ ኩመ ፖለትስ። እስራኤለ አሳይ፥ ጎዳይ ሙሰ ኪትዳይሳዳ ኦዶሶና። 33 ሄሳፈ ጉየ፥ ኤንቲ ጌሻ ዱንካንያነ እያ ሚሸታ ሙሰኮ ኤህዶሶና። ሄሳትካ፥ ካጨታ፥ ቱሳታ፥ ልዮታ፥ ቱቀታነ ኤንቲ ኤቅያ ቶሆታ። 34 ቦላ ካማስ፥ ዞኦ ቃላመን የግድ ከስዳ ዶርሳ እተ፥ ሃሸትዳ ዶአ እተ፥ ማጋራጁዋ፥ 35 ታሙ ኪታታ ኦይክዳ ታቦትያ፥ እያ ቶክያ ካሶ ምታነ ናጋራ አቶተ ካማ፥ 36 ፃርጴዛነ እያ ሚሸታ ኡባ፥ ጎዳ ስንን ደእያ ጌሻ ዳቡዋ፥ 37 ዋላህ ባይና ዎርቃፈ ኦሰትዳ ፆምፐ ዎያ ኮጫ፥ እያ ቦላ ደእያ ፆምፐታ፥ እያ ሚሸታ ኡባነ ፆምፐ ዛይተ፥ 38 ዎርቃፈ ኦሰትዳ ያርሾ በሲ፥ ሹማተ ዛይተ፥ ሳውያ እፃነ፥ ጌሻ ዱንካንያ ፐንገ ማጋራጁዋ፥ 39 ናሰ ብራታፐ ኦሰትዳ ያርሾ በሲ፥ ናሰ ብራታ ተቅያ፥ ቶሆ ካሶ ምታነ እያ ሚሸታ ኡባ፥ ሜቻ ከረነ እያ ዎይሳ፥ 40 ዳባባ ገልያ ፐንገ ማጋራጁዋ፥ ቱሳታነ፥ ኤንቲ ኤቅያ ቶሆታ፥ ዳባባ ማጋራጁዋ፥ ቶለ ዎዶሮታ፥ ሸታ፥ ጌሻ ዱንካንያን ጎኤትያ ሚሸታ ኡባ፥ 41 ካህነት ጌሻ በሳን ማእያ ቦንቾ ማኦታ፥ አሮንነ እያ ናይት ማእያ ካህነተ ማኦታ።
42 እስራኤለ አሳይ ኦሶ ኡባ፥ ጎዳይ ሙሰ ኪትዳይሳዳ ኦዶሶና። 43 አሳይ፥ ኦሶ ኡባ፥ ጎዳይ ኪትዳይሳዳ ኦዳይሳ ሙሰይ በእስ። ሄሳ ግሾ፥ ሙሰይ ኤንታ አንጅስ።