ከሳ ማፃፋ 28

ካህነታ ማኦ

1 "ነ እሻ አሮናነ እያ ናይታ ናዳባ፥ አብዮዳ፥ አላዛራነ እታማራ ኔኮ ፄጋ። ኤንቲ ካህነ ግድድ ታዉ ሀጋዛና መላ እስራኤለ አሳ ግዶፈ ኤንታ ዱማያ። 2 እያዉ ቦንቾነ ቴማ እማና መላ ነ እሻ አሮናስ ቦንቾ ማኦታ ጊግሳ። 3 አሮን ካህነተን ዱማትድ ታዉ ሀጋዛናዳ፥ ታኒ ሂላተ እምዳ ኦሳንቾታ ኡባ ፄጋዳ፥ አሮናስ ማኦታ ጊግሳና መላ ኦዳ። 4 ኤንቲ ጊግሳና ማኦትካ ሀይሳታ፤ ትራን ማኤትያ ማኦ፥ ኤፉደ፥ አዱሳ ቃምሰ፥ አሌቀትድ ዳደትዳ ሻምዘ፥ ቃጨነ ዳንጮ። ነ እሻይ አሮንነ እያ ናይት ካህነ ግድድ ታዉ ሀጋዝሸ ማአና መላ ጌሻ ማኦታ ኤንታዉ ጊግሶ። 5 ኩሸ ሂላንቾት ሄ ማኦታ ዎርቃ ጫቻፈ፥ ካሎሰፐ፥ ኦቻ ቴራ ዳነይሳፈ ዞኦ ቃጭናፐነ አልኦ ሊኖፐ ጊግሶ።

ኤፉደ

6 "ኤፉደ ጌተትያ ማኡዋ ዎርቃ ጫቻ ቃጭናፐ፥ ካሎሰፐ፥ ኦቻ ቴራ ዳነይሳፈ፥ ዞኦ ቃጭናፐነ አልኦ ሊኖፐ ኩሸ ሂላንቾት አሌቅስድ ጊግሶ። 7 ናምኡ ሀሽያራ ዎድ፥ ናምኡ ባጋ ዎል ጋድ ቃቻናዉ ማድያ ቃንጎት ደኦ። 8 ኤፉደይ ኦሰትዳባፐ ሂላን ኦሰትዳ ዳንጮይ ኤፉድያራ ዎላ ኦሰትዳባ ግድድ እስፈ ኦይከቶ። 9 ማርግደ ጌተትያ ናምኡ ሹቻታ ኤካዳ፥ ታማነ ናምኡ ያይቆባ ናይታ ሱን ኤንታ ቦላ ዎጫዳ ፃፋ። 10 ኤንታ የለታ ማራዳ እስ ሹቻ ቦላ ኡሱፑን ሱንታ፥ ሀንኮ ሹቻ ቦላ አትዳ ኡሱፑን ሱንታ ዎጫዳ ፃፋ። 11 ሀ ናምኡ ሹቻታ ቦላ ታማነ ናምኡ ያይቆባ ናይታ ሱን ዎጫድ ፃፋናዉ ሂላንቾ ደማ፤ ሄ ፃፈትዳ ሹቻታ ኤፉድያ ቦላ ኦይናዉ እያ ዩሹዋ ዎርቃን ላንፃ። 12 ያታዳ ታማነ ናምኡ እስራኤለ ሼሻ ቆፍስያባ ግዳና መላ ሀ ናምኡ ሹቻታ ኤፉድያራ ኦይዳ ሀሽያራ አያ ቃንጉዋ ቦላ ዎ። ታኒ፥ ጎዳይ፥ ታ አሳ ኡባ ዎደ ሀሳያና መላ አሮን ኤንታ ሱን ባ ሀሽያን ቶኮ። 13 ሄ ሹቻታ ኦይከይሳ ዎርቃፈ ኦ። 14 ቃስ ዋላህ ባይና ዎርቃፈ ዎዶሮዳ ዶቀትዳ ናምኡ ሳንላታ ሀሽያራ አያ ቃንጉዋራ ኦይከታና መላ ኦ።

ትራን ማኤትያ ማኦ

15 "ጎዳ ሸንያ ኦይችድ ኤራናዉ፥ ትራን ማኤትያ ማኡዋ ኩሸ ሂላንቾን ኦስሳ። ሄ ትራን ማኤትያ ማኡዋ ዎርቃ ጫቻ ቃጭናፐ፥ ካሎሰፐ፥ ኦቻ ቴራ ዳነይሳፈ፥ ዞኦ ቃጭናፐነ አልኦ ሊኖፐ ኤፉድያዳ አሌቅስድ ጊግሶ። ካሎሰፐ ኦሰትዳባፐ ኦዳ አሌቅሳ። 16 እያዉ ጌሳይነ ጎምፓይ እስ እስ ታካ ግድድ ኦይዱ ማዛነይ ደኦ። 17 እያዉ ኦይዱ ማራን አልኦ ሹቻታ ዎ። ኮይሮ ማራን ሳርድዮነ፥ ቶጳዘነ ጶልያ አልኦ ሹቻታ ዎ። 18 ናምአን ማራን ባሉረ፥ ሳንፐረነ አልማዘ ጌተትያ አልኦ ሹቻታ ዎ። 19 ሄን ማራን ያክንተ፥ ከልቀዶነነ አመተስፅኖሳ ጌተትያ አልኦ ሹቻታ ዎ። 20 ኦይዳን ማራን ብረለ፥ ማርግደ፥ ያስጵደ ጌተትያ አልኦ ሹቻታ ዎ። ሀይሳቲ ኡባይ ዎርቃ ካቁዋ ቦላ ዎሰቶ። 21 እስራኤለ ናይታስ ቆፍሶ ግዳና መላ ሀ ታማነ ናምኡ አልኦ ሹቻታ፥ እስ እስ ያይቆባ ናይታ ሱንይ፥ እስ እስ ሹቻ ቦላ ዎጨትድ ፃፈቶ።

22 "ትራን ማኤትያ ማኡዋስ ዋላህ ባይና ዎርቃፈ ዎዶሮዳ ዶቃዳ ሳንላታ ኦ። 23 ናምኡ ዎርቃ ምግዶታ ኦዳ፥ ትራን ማኤትያ ማኡዋስ ቆሞ ጋፃ ማዛንያን ጋዳ ኦይ። 24 ሄ ናምኡ ዎርቃ ሳንላታታ ምግዶታራ ጋዳ ኦይ። 25 ሀንኮ ባጋን ደእያ ናምኡ ሳንላታ ጋፃ ናምኡ ቃንጎታራ ጋሰ። ሄሳዳ ኦዳ ስን ባጋራ፥ ሀሽያራ ዎያ ኤፉድያ ቃንጉዋራ ጋሰ። 26 ቃስ ናምኡ ዎርቃ ሳጋዮታ ኦዳ፥ ኤፉድያፐ ጋ ባጋራ ካልድ ደእያ ትራን ማኤትያ ማኡዋስ ናምኡ ማዛነታ ፄራን አ። 27 ሄሳዳካ፥ ዎርቃፈ ሀራ ናምኡ ምግዶታ ኦዳ፥ ኤፉድያስ ስን ባጋ ሀሽያራ ዎያ ቃንጉዋስ ጋርሳ ባጋራ ጋሰ። ኤፉድያ ስኩዋ ማታን ዳንጩዋፈ ቆሞ ባጋራ ኤንታ ጋሰናዉ በሴስ። 28 ትራን ማኤትያ ማኡዋን ደእያ ምግዶታ ኤፉድያን ደእያ ምግዶታራ ጋዳ ካሎሰ ቃጭናን ቃቻ። ሄሳዳ ኦኮ፥ ትራን ማኤትያ ማኦይ ፄሳፈ ቆሞን ደእያ ግሾ፥ ቃሾይ ዶልኤና።

29 "አሮን ጌሻ በሳ ገልያ ዎደ እስራኤለ ማይዛታ ሱን ኦይክዳ፥ ትራን ማኤትያ ማኡዋ ማኦ። ያንያ ግሾ፥ ታኒ፥ ጎዳይ ኡባ ዎደ ታ አሳ ቆፓና። 30 ቃስ ሳማ የግያ ናምኡ ጌሻ ሹቻታ ትራን ማኤትያ ማኡዋን የጋ።✝28:30 ታይቦ 27:21፤ ዛረ 33:8፤ እዝ 2:63፤ ናህ 7:65. አሮን ጌሻ ዱንካንያ ገልያ ዎደ ባ ትራን ኤንታ ቶክድ ገሎ። ታ ሸንያ እስራኤለ አሳ ኤርሳናዉ ታ ስን ገልያ ዎደ ኡባን ትራ ኪስያፐ ይሶፎ።

ሀራ ካህነ ማኦታ

31 "ኤፉድያፐ ቦላራ ማእያ አዱሳ ማኡዋ ኩመ ካሎሰ አፍላፐ ጊግሳ። 32 ሄ አዱሰ ማኡዋስ ሁጰ አያ ሉሆ መ። ሄ ሉሆይ ፔቶና መላ ጉየ ቃላምአዳ ዩሻ አዳ ስካ። 33 አዱሳ ማኡዋስ ዱገ ባጋ ማጫራ ዩሹዋን ካሎሰ፥ ኦቻ ቴራ ዳነይሳንነ ዞኦ ቃጭናፐ፥ ኦሮማነ ቴራ ምስለ መ። ያታዳ ኤንታ ግዶን አ አ ዎርቃፈ ኦሰትዳ ዳላታ ኦ። 34 ዎርቃ ዳላትነ ኦሮማነ ቴራ ምስለት ሄ አዱሰ ማኡዋስ ዱገ ባጋ ማጫራ ዩሹዋን አ። 35 አሮን ካህነተን ኦያ ዎደ ሀ አዱሳ ማኡዋ ማኦ። ጎዳ ስን፥ ጌሻ በሳ ገልያ ዎደነ ከይያ ዎደ፥ ዳላይ ጊራና፤ እካ ሀይቀና። 36 ዋላህ ባይና ዎርቃፈ እስ አሌቆ ኦዳ፥ እያ ቦላ ‘ጎዳስ ዱማትስ’ ያጋዳ ዎጫዳ ፃፋ። 37 ያታዳ ሁጵያ ቃጭያ ቦላ ካሎሰ ቃጭናራ ቃቻ። 38 አሮን እያ ባ ሶምኡዋን ዎ። ሄሳን እስራኤለ አሳይ ጎዳስ እሞታ እምሸ ባልዳባይ ደእኮ፥ ሄ ባላ አሮን ቶኬስ። አሳይ ኤህያባ ጎዳይ ኤካና መላ እ ሄሳ ኡባ ዎደ ባ ሶምኡዋን ዎናዉ ኮሼስ።

39 "አሮና ሻምዝያነ ቃጭያ አልኦ ሊኖፐ ዳዳ። ቃስ ዳንጩዋካ አልኦ ሊኖፐ ዳዳዳ አሌቅሳ። 40 አሮና ናይታስ ቦንቾነ ፑላ እማና መላ ሻምዘታ፥ ዳንጮታነ ሁጰን ዎያ ቆበታ ጊግሳ። 41 ኔኒ ሀ ማኦታ ነ እሻ አሮናነ እያ ናይታ ማይዛ። ኤንቲ ካህነተን ታዉ ሀጋዛና መላ ኤንታ ሻማሆ ዛይተን ትያዳ ታዉ ዱማያ። 42 ኤንታ ካሎይ ካመታና መላ ጋርሳን ማእያ ማኡዋ ፄሳፈ ብድ ዎድረ ጋካናዉ ካምያባ አልኦ ሊኖፐ ጫርቀፈ ሱረ ጊግሳ። 43 አሮንነ እያ ናይት ጌሻ ዱንካንያ ገልያ ዎደ ዎይኮ ጌሻ በሳን ካህነተን ሀጋዛናዉ ያርሾ በሲ ሺቅያ ዎደ ሀ ማኦታ ማኦ። ሄሳዳ ሀንኮ፥ ኤንቲ ባንታ ቦላ ሀይቆ ኤሆኮና። ሄስ አሮናስነ እያ ሼሻታስ መርና ዎጋ ግዶ።