ከሳ ማፃፋ 5

ሙሰይነ አሮን ግብፀ ካዉዋ ስንን

1 ሄሳፈ ጉየ ሙሰይነ አሮን ግብፀ ካዋኮ ብድ፥ "ጎዳይ፥ እስራኤለ ፆሳይ፥ ‘ታ አሳይ ታና ቦንቻናዉ መላ ቢታን፥ ባኣለ ኦና መላ ኤንታ የዳ’ ያጌስ" ያግዶሶና።

2 ካዎይ፥ "ታኒ እያዉ ኪተታዳ እስራኤለ የዳናዉ እ፥ ጎዳይ ኦኔ? ታኒ ጎዳ ኤርከ፤ እስራኤላካ የድከ" ያግስ።

3 ኤንቲ ዛሪድ፥ "እብራወታ ፆሳይ ኑስ ቆንጭስ። ሀእ ኑኒ ጎዳስ፥ ኑ ፆሳስ፥ ያርሾ ያርሻናዉ ሄ ጋላሳ ኦገ መላ ቢታ ባና መላ ኑና የዳርክ። ሄሳ ኑ ኦና እፅኮ እ ኑና ሀርገን ዎይኮ ኦላን ይሳና" ያግዶሶና።

4 ሽን ግብፀ ካዎይ፥ "ሙሰ፥ አሮና፥ አሳ አይስ ኦሶ ድገቲ? ጉየ ብድ ህንተ ኦሱዋ ኦተ። 5 ሄኮ፥ ሀ ቢታን ህንተ ዳርደታ፤ ቃስ ህንተ አሳ ኦሶ ድገታ" ያግስ።

6 ካዎይ ሄ ጋላስ ግብፀ ካፖታነ እስራኤለታ ኦስሰይሳታ ሀይሳዳ ያግድ ኪትስ፤ 7 "ካሰይሳዳ ፁበ ኦናው አሳስ ኡቱላ እሞፍተ። ኤንቲ ኡቱላ ባንታዉ ኮይድ ሺሾ። 8 ሽን ካሰይሳፈ ታይቡዋ ጉና ኤንቲ ፁበ መድ ሺሻና መላ ኪትተ፤ እስኖካ ፓጭሶፕተ። ኤንቲ፥ ‘ኑኒ ኑ ፆሳስ ያርሾ ያርሻና መላ ኑና የዳ’ ያግድ ታና ኦይቸይ ኤንታዉ ኦሶይ ጉፅዳ ግሾሳ። 9 ኤንቲ ኦሶን ጉንዳና መላነ ዎርዶ ኦዳ ስኦናዉ ኤንታዉ ዎደይ ዶና መላ ኦሶ ዴፅስተ" ያግድ ኪትስ።

10 ግብፀ ካፖትነ እስራኤለታ ኦስሰይሳት ከይድ፥ አሳኮ፥ "ካዎይ፥ ‘ታኒ ህንተዉ ኡቱላ እምከ። 11 ህንተ ብድ አዉፐካ ኮይድ ደምተ። ሽን ህንተ ኦያ ፁበ ታይቡዋፐ እሶይካ ፓጨና’ ያግስ" ያግዶሶና። 12 ሄሳ ግሾ አሳይ ኡቱላ ኮያናዉ ግብፀ ቢታ ኡባን ላለትዶሶና። 13 ግብፀ ካፖት ኤንታዉ ኡቱል እመትን ኤንቲ ኦያ ፁበ ታይቡዋ ኬና ኦድ ሺሻና መላ ኤንታ ኡንኤዶሶና። 14 ግብፀ ካፖት ባንታፈ ጋርሳራ ደእያ እስራኤለ ካፖታ፥ "ህንተ ካሰ ኦያ ፁበ ኬና አይስ ኦ ሺሽበከቲ?" ያግድ ዋዶሶና።

15 ሄሳፈ ጉየ እስራኤለ ካፖት ካዋኮ ብድ፥ "አቤት ጎዳዉ፥ ኔኒ ነ አይለታ ሀይሳዳ አይስ ኦይ? ያግድ ማጋንዶሶና። 16 ነ አይለታስ ኡቱል እመተና፥ ሽን ፁበ ኦና መላ ኪተትዳ። ሄሳ ቦላ ኑና ዋሶና፤ ሽን ባላይ ነ አሳ ቦላና" ያግዶሶና።

17 ሽን ካዎይ፥ "ህንተ ኦሶ ዶሶና አዛላታ፤ ህንተ ዎራ ዎዳ አዛላታ። ህንተ፥ ‘ኑኒ ጎዳስ ያርሻናዉ ባና፤ ኑና የዳ’ ያግድ ዛር ዛር ታና ኦይቸይ ሄሳ ግሾሳ። 18 ሀእ ጉየ ብድ ኦተ። ህንተዉ አይባ ኡቱልካ እመተና፥ ሽን ህንተ ካሰይሳ ኬና ፁበ ኦናዉ በሴስ" ያግስ።

19 እስራኤለ ካፖት፥ ኤንቲ ካሰይሳ ኬና ፁበ ኦና መላ ኪተትዳ ዎደ ኤንቲ መቶን ገልዳይሳ ኤርዶሶና።

20 ኤንቲ ካዉዋ ማታፐ ከይድ፥ ባንታና ካረን ናግያ ሙሰኮነ አሮናኮ ብዶሶና። 21 ኤንቲ ሙሰኮነ አሮናኮ፥ "ህንተ ኑና ካዎይነ እያ ሞርናት እፃና መላነ ዎና መላ ህንተ ኦዳይሳ ፆሳይ ፄሎ፤ እ ፕርዶ" ያግዶሶና።

ሙሰ ዎሳ

22 ሙሰይ ጎዳኮ ስሚድ፥ "ጎዳዉ፥ ኔኒ ሀ አሳ ቦላ መቶ አይስ ኤሀዲ? ኔኒ ታና ኪትዳይ ሄሳሴ? 23 ታኒ ነ ሱንን ካዋስ ኦዳናዉ ብዳ ዎደፐ ዶምን እ ሀ አሳ ቦላ መቶ ሀ ዳርስስ። ቃስ ነካ ነ አሳ አሻባካ" ያግስ።