ታቦተ
(ከሳ 25:10-22)
1 ባስልኤል ታቦትያ ሶቃላ ምፈ ጊግስስ። ታቦትያ አዱሳተይ ናምኡ ዋነ ባጋ፥ ጎምፓይነ ጌሳይ እስ ዋነ ባጋ። 2 ታቦትያ ጊግስድ፥ ጋነ ካርያ ዋላህ ባይና ዎርቃን ላንፅስ። እያ ዩሹዋ ቦላካ ዎርቃን ላንፅስ። 3 ኦይዱ ዎርቃ ሳጋዮታ ታቦትያስ ኦይዱ ገዳታ ቦላ፥ እስ ባጋራ ናምኡ ሳጋዮታ፥ ቃስ ሀንኮ ባጋራ ናምኡ ሳጋዮታ አስ። 4 ያትድ ሶቃላ ምፈ ኦሰትዳ ካሶታ ከስድ ኤንታ ዎርቃን ላንፅስ። 5 ታቦትያ ቶካናዉ፥ ታቦትያስ ምይያን ደእያ ሳጋዮታን ካሶታ አስ።
6 ዋላህ ባይና ዎርቃፈ፥ አዱሳተይ ናምኡ ዋነ ባጋ፥ ጎምፓይ እስ ዋነ ባጋ ግድዳ ናጋራ አቶተ ካማ ኦስ። 7 ቀፈይ ደእያ ናምኡ ክሩበታ ቆፀትዳ ዎርቃፈ ኦድ፥ 8 እስ ክሩብያ እስ ባጋን፥ ሀንኮ ክሩብያ ሀንኮ ባጋን ዎድ፥ አቶተ ካሙዋራ እስኖ ኦድ መስ። 9 ክሩበት ባንታ ቀፍያ ምጭድ፥ አቶተ ካሙዋ ካምድ፥ እሶይ እሱዋ ፄሎሶና።
ዳቦ ፃርጴዛ
(ከሳ 25:23-30)
10 አዱሳተይ ናምኡ ዋ፥ ጎምፓይ እስ ዋ፥ ጌሳይ እስ ዋነ ባጋ ግድዳ ፃርጴዛ ሶቃላ ምፈ መስ። 11 ዋላህ ባይና ዎርቃን እያ ላንፅድ፥ ዩሹዋካ ዎርቃን ላንፅስ። 12 ሄሳዳካ፥ ጎምፓይ ታካ ግድያ ጎሰ ኦድ፥ እያ ዎርቃን ዩሽ አድ ላንፅስ። 13 ታቦትያ ቶካናዉ ማድያ ኦይዱ ዎርቃ ሳጋዮታ መድ፥ ኦይዱ ገዳታ ኦይዱ ማዛነታ ቦላ ዎስ። 14 ፃርጴዛ ቶካናዉ ካሶታ አያ ሳጋዮት ፃርጴዛ ጎሳ ማታን ኦሰትዶሶና። 15 ፃርጴዛ ቶክያ ካሶ ምታ ሶቃላ ምፈ ከስድ፥ ዎርቃን ላንፅስ። 16 ሄሳዳካ፥ ፃርጴዛ ቦላ ዎያ ዱማ ዱማ ሚሸታ ዋላህ ባይና ዎርቃፈ መስ። ሄሳትካ ሳነታ፥ ጭልፓታ፥ ከረታ፥ ዎይነ ያርሾ ትግያ ፁአታ።
ፆምፐ ዎያ ኮጫ
(ከሳ 25:1-40)
17 ሄሳፈ ጉየ፥ ባስልኤል ፆምፐ ዎያ ኮጫ ዋላህ ባይና ዎርቃፈ ኦስ። ኮጫ ኤስያ ቶሁዋነ ቶማ ቆፀትዳ ዎርቃፈ ጊግስስ። አሌቆስ ኦሰትያ፥ እያ ጋምቡታ፥ እያ ዋላፃታነ እያ ጪሻታ ኡባ እያራ እስፈ ኦይድ መስ። 18 እስ ባጋራ ሄ ታሸት፥ ቃስ ሀንኮ ባጋራ ሄ ታሸት ደእያ ኡሱፑን ታሸታ እያ ምይያን መስ። 19 ኡሱፑን ታሸታስ ፄራን ፄራን ሄ ሄ አሌቆ ጋምቡትነ ጪሻት ደእያ ላዉዘ ም ጪሸ ዳንያባ መስ። 20 ፆምፐ ዎያ ኮጫ ግዶን ደእያ ቶማ ፄራን ኦይዱ አሌቆ ጋምቡትነ ጪሻት ደእያ ላዉዘ ም ጪሸ ዳንያባ መስ። 21 ዋን ደእያ ሄ ሄ ታሸታፐ ጋርሳን እስ እስ ጋምቡ ኦሰትስ። 22 ጋምቡት፥ ታሸትነ ፆምፐ ዎያ ኮጫይ እስኖ ግድድ፥ ዋላህ ባይና ዎርቃፈ ቆፀትድ ኦሰትዶሶና።
23 ፆምፐ ዎያ ኮጫስ ላፑን ፆምፐታ፥ ፆምፐ ቶይስያ ቃጰታነ ኤንታ ዎያባታ ዋላህ ባይና ዎርቃፈ ኦስ። 24 ፆምፐ ዎያ ኮጫነ እያዉ ጎኤትያ ሚሸ ኡባ ኦናዉ ሀስታማነ እቻሹ ክሎ ግራመ ግድያ፥ ዋላህ ባይና ዎርቃ ኦንግስ።
እፃነ ፃርጴዛ
(ከሳ 30:1-5)
25 ባስልኤል እፃነ ጩይስያ ፃርጴዛ ሶቃላ ምፈ ጊግስስ። እያዉ ኦይዱ ማዛነይ ደኤስ። ሄ ፃርጴዛስ አዱሳተይነ ጎምፓይ እስ ዋ፤ ቃስ ጌሳይ ናምኡ ዋ። ኦይዱ ማዛንያን ደእያ ካጨት እያራ እስኖ ግድ ኦይከትድ ኦሰትዶሶና። 26 እያዉ ቦላ ባጋ፥ ኦይዱ ምያነ ካጨታ ዋላህ ባይና ዎርቃን ላንፅስ፥ እያ ዩሹዋካ ዎርቃን ላንፅድ ዩሽ አስ። 27 እያዉ ጋፃ ቦላ ቶካናዉ ማድያ ናምኡ ዎርቃ ሳጋዮታ መድ፥ ናምኡ ባጋ ምይያን ዎስ። ኤንቲ እፃነ ፃርጴዛ ቶክያ ዎደ ካሶ ምታ አናዉ ማደይሳታ። 28 ካሶ ምታ ሶቃላ ምፈ ከስድ፥ ዎርቃን ላንፅስ።
29 ጌሻ ሹማተ ዛይትያነ ሳውያ ሎኦ እፃነ ሽቶዳ ዋላክድ ኦስ።