ከሳ ማፃፋ 38

ፁሳ ያርሾ በሲ

1 ሶቃላ ምፈ ፁሳ ያርሾ በሲ ኦስ። ሄ ያርሾ በሳ አዱሳተይነ ጎምፓይ፥ እቻሹ እቻሹ ዋ፥ ቃስ ጌሳይ ናምኡ ዋነ ታካ። እያዉ ኦይዱ ማዛነይ ደኤስ። 2 ኦይዱ ማዛነታራ ኦይከትድ ኦሰትዳ ካጨታ መስ። ያትድ፥ ሄ ያርሾ በሳ ናሰ ብራታን ላንፅስ። 3 ሄ ያርሾ በሳን ጎኤትያ ሚሸታ፥ ድስተታ፥ ባልደታ፥ አካፋታ፥ አሹዋ ቃጵያ ቃጰታነ ታማ ጮጨታ ኡባ ናሰ ብራታፐ መስ። 4 ናሰ ብራታፐ ግተ ዳንያ ተቀ ያርሾ በሳስ ጊግስድ፥ ያርሾ በሳስ ግዶ ዛዋ ዩሽ አድ ዎስ። 5 ቶካናዉ ማድያ ካሶታ አናዉ፥ ኦይዱ ሳጋዮታ መድ፥ ኦይዱ ማዛነታ ቦላ ዎስ። 6 ሶቃላ ምፈ ያርሾ በሳ ቶክያ ካሶ ምታ ከስድ፥ ናሰ ብራታን ላንፅስ። 7 ሀ ካሶታ ናምኡ ምየን ደእያ ሳጋዮታን አስ። ያርሾ በሳ ፃዉላፐ ጊግስድ፥ ግዱዋ ካይስ ኦስ።

ሜቻ ከረ

8 ናሰ ብራታፐ ሜቻ ከረነ እያ ዎያ ቶሆ መስ። ሄ ናሰ ብራታይ፥ ጌሻ ዱንካንያ ፐንገን ኦያ ማጫሳት ኤህዳ ማስቶትያፐ ኤከትስ።

ጌሻ ዱንካነ ዳባባ

9 ጌሻ ዱንካንያስ ዳባባ ባጋ ገቻናዉ አልኦ ሊኖፐ ማጋራጆ ኦስ። ዱገሀ ባጋ ገሸታስ አዱሳተይ ፄቱ ዋ። 10 ገሸታስ ካተ ግዳና መላ ላታሙ ቱሳታነ ኤንቲ ኤቅያ ቶሆታ ናሰ ብራታፐ ኦስ። ኤንታ ፃምአታነ ካጨታ ብራ ብራታፐ ኦስ። 11 ፑደሀ ባጋ ዳባባይካ ሄሳዳ ሀንድ ኦሰትስ። 12 ዉሎሀ ባጋ ገሸታ አዱሳተይ እሻታሙ ዋ። ኤንታዉ ታሙ ቱሳትነ ቱሳት ኤቅያ ታሙ ቶሆት ደኦሶና። ቱሳታስ ብራ ብራታፐ ኦሰትዳ ፃምአትነ ካጨት ደኦሶና። 13 ዳባባ ገልያ ፐንገይ ደእያ፥ ዶሎሀ ባጋ ማጋራጁዋ ጎምፓይ እሻታሙ ዋ። 14 እስ ባጋራ ደእያ ማጋራጁዋ አዱሳተይ ታማነ እቻሹ ዋ። እያዉ ሄ ቱሳትነ ቱሳት ኤቅያ ቶሆት ደኦሶና። 15 ሀንኮ ባጋራ ደእያ ማጋራጁዋ አዱሳተይ ታማነ እቻሹ ዋ። እያዉ ሄ ቱሳትነ ቱሳት ኤቅያ ቶሆት ደኦሶና። 16 ዳባባ ዩሹዋን ደእያ ገሸት ኡባይ አልኦ ሊኖፐ ኦሰትዶሶና። 17 ቱኡሳት ኤቅያ ቶሆት ናሰ ብራታፐ ኦሰትዶሶና። ፃምአት፥ ካጨትነ ቱሳታ ፄራ ጎሳት ብራ ብራታፐ ኦሰትዶሶና። ዳባባ ዩሹዋን ደእያ ቱሳት ኡባይ ብራ ፃምአታን ኦይከትዶሶና። 18 ዳባባ ፐንግያን ደእያ ማጋራጁዋ አልኦ ሊኖፐ ኦድ፥ ካሎሰን ኦቻ ቴራ ዳነይሳንነ ዞኦ ቃጭናን ዳድድ አሌቅስስ። እያዉ ሀንኮ ዳባባ ገሸታዳ አዱሳተይ ላታሙ ዋ፤ ቃስ ጌሳይ እቻሹ ዋ። 19 እያ፥ ኦይዱ ቶሆት ደእያ ኦይዱ ቱሳታ ቦላ ካቅስ። ካጨት፥ ፃራ ካመይሳትነ ፃምአት ብራ ብራታፐ ኦሰትዶሶና። 20 ጌሻ ዱንካንያ ሸትነ እያ ዩሹዋን ደእያ ገሸታ ሸት ኡባይ ናሰ ብራታፐ ኦሰትዶሶና።

ጌሻ ዱንካነን ጎኤትያ ብራታ ሚሸታ

21 ታሙ ኪታታ ኦይክዳ ናምኡ ሎቸ ሹቻት ደእያ በሳን፥ ጌሻ ዱንካንያን፥ ጎኤትያ ሚሸታ ማዝጋበይ ሀይሳ። ሄ ሚሸታ ማዝጋባና መላ ካህንያ አሮና ናአ እታማራ አዋተ ጋርሳን ደእያ ሌወታ ሙሰይ ኪትስ።

22 ይሁዳ ሼሻፐ ግድዳ ሁራ ናኣ ናኣ፥ ኡረ ናኣ፥ ባስልኤል፥ ጎዳይ ኪትዳይሳዳ ኡባባ ኦስ። 23 ዳነ ሼሻፐ ግድዳ አህሳማካ ናኣ ኤልያብ፥ ኩሸ ሂላንቾይ፥ ኦያባስ ኮይሮ ሀልቾ ከስያ አስ፤ እ፥ ካሎሰ፥ ኦቻ ቴራ ዳነይሳነ ዞኦ ቃጭናን አልኦ ሊኖ ዳድድ አሌቅስያ አስ። 24 ጌሻ ዱንካንያ ኦሱዋስ ሀናና መላ ጎዳስ እመትዳ ዎርቃይ ጌሻ ዱንካነን ኤረትዳ ምዛነን እስ ሙኩሉ ክሎ ግራመ ግድስ። 25 ታይቦን ደእያ አሳፐ ኤከትዳ ብራይ ጌሻ ዱንካነን ኤረትዳ ምዛነን፥ ሄ ሙኩሉነ ኦይዱ ፄታነ ሀስታሙ ክሎ ግራመ ግድስ። 26 ሄስካ፥ ታይቦን ገልዳ አደ አሳይ፥ እሶይ እሶይ ጌሻ ዱንካነን ኤረትዳ ምዛንያ ልከን ኮየትያ ኡባ እምዶሶና። ላታሙ ላይነ እያፐ ቦላ ግድዳ፥ ማዝጋበን ገልዳ፥ አደ አሳ ታይቦይ ኡሱፑን ፄታነ ሄ ሙኩሉነ እቻሹ ፄታነ እሻታማ። 27 ጌሻ ዱንካንያነ ማጋራጆታ ኤሳናዉ ማድያ ፄቱ ቶሆታ ኦናዉ 3,400 ክሎ ግራመ ብራ ብራታ ኤክዶሶና። ሄስካ፥ እስ እስ ቶሆይ ሀስታማነ ኦይዱ ክሎ ግራመ ብራ ብራታ ኤክስ። 28 ባስልኤል፥ አትዳ ሀስታሙ ክሎ ግራመ ብራ ብራታን ፃምአታ፥ ካጨታነ ቱሳታስ ፄራ ጎሳታ ኦስ። 29 አሳይ ጎዳስ እምዳ ናሰ ብራታይ 2,425 ክሎ ግራመ። 30 ሄ ናሰ ብራታን ጌሻ ዱንካንያ ፐንግያ ኤስያ ቶሆታ፥ ግተ ዳንያባራ ናሰ ብራታ ያርሾ በሳነ እያ ግዶን ጎኤትያ ዱማ ዱማ ሚሸታ መስ። 31 ቃስ ዳባባ ዩሹዋን ደእያ ድርሳ ቶሆትነ ፐንግያ ቦላ ኤቅዳ ቶሆት፥ ጌሻ ዱንካነይነ እያ ዩሹዋን ደእያ ዳባባ ድርሳ ሸት ኡባይ ሄ ናሰ ብራታፐ ኦሰትዶሶና።